Read turkana Ngiroma 12 Bible Online

Ngiroma 12 - turkana bible

Ngiroma 12

¹Kongina bocha ngikaitotoi kang, kotere ni ejokia ajokis a Akuj aniyok noi, kemaimai ayong esi atamar, kimiekisi Akuj kibele ngitamen kus, tarata esi ngakipeyos na eyarete ani a Akuj, na italeunitoe kotere etich keng, nabo na ejoikinito Akuj. Akilip na iteni na ejoikinit esi iinakinete ngesi ngina.

² Warasi nyikwaanikinosi ngakiro na isubete esi ka na a ngitunga a akwap, kimiekisi Akuj kibele ngitai kus ani ilochokinotor ngitamen kus. Sodi topedoreta esi akiyen ngakiro na echamit Akuj. Toyena esi atamar nyoni ejok kori ejoikinit Akuj kori nyoni ikiuna.

³Ani kotere ajokis na aanyuni ayong ani a Akuj, kalimokinit ayong esi daang atamar, warasi robo nyiitamasi abe kipolok erai ikeunakasi. Nakaneni kitama na itemem ka esi, nabo kitemos alopit alo eriyan ka anupit na ianyut esi ani a Akuj.

⁴Elalak nginerin a akwaan, eyeni ekinier daang etich lo esubi.

⁵Aloger alopei kangolo, tani kilalak ngoni, kimorikin ngoni ka Kiristo kirau akwaan apei, ekok itwaan daang ekinier ani eyei niche.

⁶Nakaneni, ejoikinit ngoni kilemuni ngainakinet yok nagelagelae alopit a ajokis ana kiinak ngoni Akuj. Ani kerai ainakinet a itwaan ngesi akiruor Ngakiro a Akuj, ejoikinit ngesi iruoro alopit a anupit ana aanyu,

⁷ani kerai akisub etich, ejoikinit ngesi esubi etich, ani kerai akitatam, ejoikinit ngesi itatami,

⁸ ani kerai akitogogong luche, ejoikinit ngesi ikokini neni. Ani itwaan cha daang ni ipotori ibore nak niche, ejoikinit itomori a apatanu. Ani ni epolokinit luche, ejoikinit esubi etich lokojokon. Ani itwaan cha daang ni ingarakini luche ani isienitotor, ejoikinit ingarakini elakara.

⁹Ejoikinit amina kus erai naka dir na emam amodeanut tani nadiochichi. Toremokin ibore niaronon, toneikin niajokon.

¹⁰Tominakin make lokojokon kona iraakatar esi ngikaitotoi lukiristoi, nabo tominakisi akitoodiun atamar ikerer esi make.

¹¹Kiberaketa alotich alo isubete warasi nyiikalanyaketa. Tosuba etich a Ekapolon a ngitai alu elemuna dir.

¹²Talakaros kotere ngakiro na igienosi esi, totitinyikisi ngichan, nabo kilipeeneta jiik.

¹³ Kitomora ngikiristoi lu ichanasi ibore ni itingito esi, kilomuunutu ngipeyok nawiyei kus a apatanu.

¹⁴Topiasi lu kiboliatar esi. Ee robo, tagata atamar topiarae kesi, meere kilamae.

¹⁵Talakaros aapei kangulu elakara, kikaloutu kangulu igorosi.

¹⁶ Tochoikisi ngitunga daang a epit a epei. Tojongoto akiwoga, ejoikinit iliworosi ngipaalon alu itasionosi. Warasi nyiitamasi kori iosok esi.

¹⁷Ani kisubea itwaan iyong ngakiro naaronok, wara nyiitachak. Tasak akisub ngakiro na ejoikinito ngitunga daang.

¹⁸Anakiro cha kadaang ana eraakasi ngaka akiding kon, tasak lokojokon akisilit ka ngitunga daang.

¹⁹Ngipaalon kang luminan, warasi nyiitachakis ngakiro naaronok na kisubere esi, nakaneni, kimiekineta Akuj nguna kainyo igiritae nagiran kona, “Ebala Ekapolon, eraakasi ngakiro a atachanakin naaronok ngaka a akiding kang, ayong ngesi atachakini.”

²⁰Ani eya nguna daang, igiritae nagiran atamar, “Ani kenyamit emoit kon akoro, kisimuj, ani kenyamit akure, kitamat, kainyo ani kikok iyong neni, irumete ngesi ngileech, tosub iwaak ngatotol na enokete nakou keng.”

²¹ Wara ngakiro naaronok nyikipiyosi iyong, kipiu naaronok anaajokak.