Read turkana Ngiroma 13 Bible Online

Ngiroma 13 - turkana bible

Ngiroma 13

¹Ejoikinit itwaan daang iwapit ngakiro a ngitunga alu esubete etich a arieng, kainyo erai nia Akuj ngesi itorunit apolou daang, ani lu eraakasi ngikapolok, Akuj ngesi ereikinit kesi apolou.

²Kotere ngakiro nguna, itwaan cha daang ni engeri ngakiro a ngikapolok, engerit ngakiro na adungu Akuj, ani ni ikoni neni, eanyuni eriras lo erai ekeng a ilope.

³Kainyo nyeemete lu esubete naajokak ngikapolok, ngitunga lu esubete naaronok kesi eemete. Tokona, isaki iyong nyiem ekapolon a? Tosub naajokak, sodi kipuruu ngesi iyong,

⁴kainyo erai ngesi ekasuban etich a Akuj, lo esubi etich ngolo kotere iyong. Nakaneni ani kisub iyong naaronok, toem ngesi, kainyo epedori ngesi dir akirirare iyong. Erai ngesi ekasuban etich a Akuj nakaneni itemonokini eriras a Akuj ani eya ngulu esubete naaronok.

⁵Kotere nguna, ejoikinit iwapi ngakiro a ngikapolok, meere kotere akerit eriras a Akuj bon, erai tani ni kitoodikinitor iyong etau kon atamar kikok neni.

⁶Eraakasi ngakiro napei nguna ngesi ibukioto esi echur, kainyo esubete ngikapolok etich a Akuj na esubeta ngitichisio kech.

⁷ Nakisi itwaan daang ibore ni erai ikeng, tobukokisi lu esakete echur, echur, tobuko ngaropiyae na esakio tobuko aloboro kus, ani ni ejoikinit erimae, kitoodiutu arima anikeng.

⁸Warasi nyeemin ibore iche kiding kon ka itwaan niche, mati aminakin bon. Itwaan cha daang ni emina itwaan niche, iwapit ngakiro a etal.

⁹Kainyo ngitalio lu ebeyo, “Nyiilom, nyiiar, nyiikoko, nyikiraka etereku”, ka luche daang, eya lotal lopei lo, “Tominak ekidunyet kon loger lo iminar iyong ilope akwaan kon.”

¹⁰ Itwaan ni emina ekidunyet keng, nyesubea niaronon. Kotere ngakiro nguna, erai amina akirichun etal daang.

¹¹Kanguna kadaang, iyenete esi atamar alurwa tokona lu, eraakasi tokona ngirwa lu lukienyunet anaju, kainyo aapuu noi ni edikino ngoni kiyuunea Akuj edwang nikolong sek kinupea ngoni ngakiro a Akuj.

¹²Esibit tokona adil akwaar edikino iwalari. Ejoikinit tokona ngoni kipalikini ngakiro daang na a aribu, atanapa ngiboro a ejie lu eraakasi ngika a akicha.

¹³Ejoikinit eboyor yok eliwor loajokon lo ikoni lo elosere anakicha, lo nyiturukitoe ka ngakiro naaronok na ikote amera kori elewas ka emalaanu, kori eboyor lo a ngileech ta eburas kori etereku.

¹⁴Nakaneni tanapa ngiboro a ejie lu eraakasi ngika Yesu Kiristo, sodi tapalikis akachit ngakiro a eboyor kus alokasechan ka akisub na isakete esi akisub.