Read turkana Ngiroma 14 Bible Online

Ngiroma 14 - turkana bible

Ngiroma 14

¹Tachamutu itwaan ni nyenupit lokojokon anikus, nakaneni warasi nyiitopega ngesi anakiro ana itamit ngesi atamar ayeni.

²Etiakatiaka ngitunga, epedori itwaan ipei akinyam ibore cha daang. Nakaneni ani itwaan ni nyenupit lokojokon, epedori ta akinyam ngikito a moding make.

³Itwaan ni enyami akimuj daang, nyejoikinit imenyari itwaan ni nyenyami. Ani ngini nyenyameene akiring, nyejoikinit irirae ni enyami akimuj daang, kainyo achamu Akuj ngesi.

⁴ Ngae iyong irirae ekasuban etich a itwaan aniche? Erai Ekapolon keng etiakuni atamar ewei ngesi kori edakara. Nakaneni, esubi ngesi niajokon kainyo Ekapolon elope ngesi ingarakini ngesi tosub niajokon.

⁵Etamari ta itwaan iche kori ejok akolongit apei idwangit ngirwa luche, tarai etamari niche ikwaan ngirwa daang. Ejoikinit itwaan daang eseuni na ejoikinito ngesi.

⁶Itwaan cha daang ni itojokit akolongit apei noi, ikokini neni erai itoodiunit arima ani a Ekapolon. Itwaan cha daang ni enyami ibore enyami erai itoodiunit arima ani a Ekapolon, kainyo ebuakini ngesi Akuj alakara kotere akimuj. Itwaan cha daang ni engeri akinyam ngamuja ngache, ikokini neni itoodiunit arima ani a Ekapolon, sodi tobuak Akuj alakara.

⁷Emam ngoni itwaan eyari kotere ngesi bon, nabo emam ngoni itwaan ni etoani kotere ngesi bon.

⁸Ani kiyari ngoni, erai Ekapolon kiyarea. Ani kitoaka ngoni erai Ekapolon ngesi kitoakea ngoni. Erai bocha ani kiyari ngoni kori kitoaka, kirai ngoni ngika Ekapolon.

⁹Kainyo atoani Kiristo nabo toyaru sodi toliworor Ekapolon alu eyarete ka lukatoak.

¹⁰Ani iyong lo nyinyameene akiring, nyo irira iyong lokaatokon? Ani iyong lo inyameene ibore daang, nyo imenyaritor iyong lokaatokon? Kiwei ngoni daang alongaren Akuj sodi kirira ngesi.

¹¹ Kainyo igiritae nagiran kona, “Ebala Ekapolon, kona araakar ayong Akuj na ayari, eriediki itwaan daang alongaren kang, sodi tolim itwaan daang atamar arai Ayong Akuj.”

¹²Isisakini ipei yok daang Akuj ngakiro na asubi ngesi.

¹³Tokona bocha, tapalikisi akirira make. Ejoikinit ngoni kitiekuni atamar nyikisubakini ibore ni isichwangakini lokaatoyok kori ni edakakini ngesi nakisech.

¹⁴Ayeni ayong, nabo kedodik Ekapolon Yesu dir atamar emam epit a ibore ni erono, nakaneni ani ketama itwaan erono ibore be ati anikeng, eliwor ibore ngini niaronon anikeng.

¹⁵Ani kinyam iyong ibore ni ekadakinit lokaatokon, ikoni ibore ngini ni nyimina iyong lokaatokon. Wara akimuj na inyami iyong nyinyasu itwaan nikolong atoanea Kiristo!

¹⁶Wara ngitunga nyiitoron ibore ni kijoikinit iyong.

¹⁷Kainyo meere apolou a Akuj aka ekimuje ka emase, nakaneni erai eka ateneanut ka ekisil ta alakara nakitaanyuni Etau a Akuj.

¹⁸Ani na esubea itwaan etich a Kiristo alopit kalo, ejoikini Akuj ka ngitunga eboyor keng.

¹⁹Kongina bocha, ejoikinit ngoni ngirwa daang kineikina akiwapit ngakiro na erikito ekisil kanguna kingarakinete ngoni.

²⁰Warasi nyiinyasut nguna asub Akuj kotere akimuj. Epedorio akimuj ngamuja daang, nakaneni erai akisech akinyam ibore ni itosechi itwaan niche.

²¹Ejoikinit ipalikini akinyam akiring kori akimat emuna lo epuritoe kori akisub ibore cha daang ni edakari lokaatokon.

²²Kiwap iyong na inupit anakiro kanu, eraakasi ngaka akiding kon ka Akuj. Ejok itwaan erai ani ketiaku na esubakini, nyengayak nabo alotau keng!

²³Nakaneni ani kengayat ngesi ibore ni ejoikinit enyami, irirae Akuj ngesi na enyamea, kainyo nyesubi ngesi ngakiro nguna ani enupitor. Nabo ibore daang ni nyesuba kotere anupit, erai akisech.