Read turkana Ngiroma 15 Bible Online

Ngiroma 15 - turkana bible

Ngiroma 15

¹Ani ngoni lu kinupit dir, ejoikinit kingarakini lupalag dir alochan kech. Warasi nyikiminak eboyor yok a ngikulepek.

²Ejoikinit ipei yok daang italakari erukitos keng anakiro anaajokak esubi sodi kisikokinea ngesi anupit keng.

³Kainyo peamina kolong Kiristo eboyor keng a elope, erai ekoni eger lo igiritere nagiran kona, “Aliwor ngiyeny lu kiyenyere esi ngikang.”

⁴Kainyo daang nakolong egirio, egirio erai kitatamere ngoni, sodi ataanyutu ngakiro na kigienokin kotere anaikinit ka akingarakina na kianyunit anagiran.

⁵Kimiekisi Akuj na erai nikeng itorunit anaikinit ka akingarakin, kitiliwo ngitamen kus ngipei ani iwapitotor ekitetemes a Yesu Kiristo,

⁶ sodi kipuruunioto esi daang a etoil a epei Akuj na erai Apakeng a Ekapolon yok Yesu Kiristo.

⁷Tachamun make robo kotere apolou a Akuj, kona kolong kichamunea esi Kiristo.

⁸Kainyo kalimokinit ayong esi ngakiro na iteni atamar asubi kolong Kiristo etich ani a Ngiyaudi, sodi kidodiu ibore ngini atamar ngaka iteni ngakiro a Akuj. Sodi kiyookinotor ngakichikakinet nakolong echikakini ngesi ta apayok,

⁹ nabo kipuruuneto ngibukui lu nyerai Ngiyaudi dang Akuj kotere akisienut keng. Loger lo igiritere nagiran kona, “Kotere nguna, kepuruuni iyong ani eya ngibukui lu nyerai Ngiyaudi, ekusi ayong ekiro kon.”

¹⁰ Igiritae nabo nagiran kona, “Talakaros esi ngikubui lu nyirai Ngiyaudi, talakaros ka ngitunga a Akuj aapei!”

¹¹Igiritae nabo kona, “Esi ngibukui daang lu nyirai Ngiyaudi, kipuruutu Ekapolon, esi ngitunga daang kipuruutu!”

¹² Alimuni nabo Isaya tama, “Ebuni itwaan ni erai ales a Yese, epolokini ngesi ngibukui lu nyerai Ngiyaudi, igienokinosi kesi ngesi.”

¹³Kimiekisi Akuj na erai nikeng itorunit akigienokin kileleb esi alakara ka ekisil kotere ni inupitotor esi ngesi. Kisikokin akigieno kus kotere agogongu a Etau a Akuj.

¹⁴Ngikaitotoi kang, ayeni ayong elope atamar ijokak esi noi, ayeni nabo tani atamar iosok esi noi ipedorete akitatama make.

¹⁵Nakaneni eyakanara ngakiro nakegirak ayong esi anabarua kana peaemit sodi kesitamunea esi ngakiro ngache. Ekokini ayong neni kotere ajokis naketaanyu ayong Akuj

¹⁶ketiliwor ekasuban etich a Yesu Kiristo alobukui kadaang alu nyerai Ngiyaudi. Etatami ayong Ngakiro Naajokak a Akuj arai emuron a akai a Akuj sodi toliworos ngibukui lu nyerai Ngiyaudi ngakipeyos na echamunit Akuj, na etaleu Akuj a Etau keng.

¹⁷Kona kimorikinor ayong ka Yesu Kiristo, enisar ayong etich lo a Akuj lo asubi ayong.

¹⁸Emam ibore iche alimuni ayong mati ni asub ayong ani a Kiristo, topedoreta ngibukui lu nyerai Ngiyaudi kiwapa ngakiro a Akuj. Asubi ngesi nguna anakiro ka ngitichisio,

¹⁹kotere agogongu a ngakitoodikinet anakailiilok ka nakatalarak, nabo kotere agogongu a Etau a Akuj. Sodi atolot ayong napei alo Yerusalem tanang Iluriko, etatam ayong noi Ngakiro Naajokak a Kiristo.

²⁰Ibore ni eitanit ayong noi ngesi akitatam Ngakiro Naajokak alowaitin alu eringa ngitunga nyiirara ngakiro a Kiristo, sodi nyaaduk nabo ayong naduket nakolong aduki itwaan niche.

²¹ Kona igiritere nagiran atamar, “Daang lu nyelimokina ngakiro kang ingolikinete, ani lu eringa nyiirara eyenete.”

²²Ngakiro nguna ngesi keratakinere ayong ngirwa lukaalak nyaabu nikus.

²³Ani kona tokona arumorea ayong etich alowaitin kalu, nabo kona kolong asakitor ayong ngirwa ngikaalak abunere inaa aanyun esi,

²⁴etamit atamar abuni tokona. Asaki etoru nikus naalosio ayong Sipania, sodi kingarakis esi ayong analosit kangina, erai kilakar mono ka esi aapei wadio.

²⁵Nakaneni, alosi tokona ayong Yerusalem atingit ngiboro lu ingarakinotor ngitunga a Akuj kaina.

²⁶Kainyo atiakut ngitunga a ngikanisae alu eya Makedonia ka Akaya adekuunun ngiboro lu ingarakinere ngitunga a Akuj lu iboosit lu eya Yerusalem.

²⁷Kesi ngikulepek atiakunete kongina, nakaneni ani bo kikote neni dang, ejoikinit kesi ingarakinete ngikebootok ngulu. Ani aliworotor ngibukui lu nyerai Ngiyaudi ngipei ka Ngiyaudi eanyunete apiaro a Etau, ejoikinit kesi dang ingarakinete Ngiyaudi ngiboro luyaret lu eraakasi Akuj einakinit kesi.

²⁸Ani karumo ayong etich ngolo, ainak kesi ngiboro daang lu adekunio kotere kesi, abuni ayong aanyun esi naalosio Sipania.

²⁹ Naabunio ayong nikus, ketaanyuni esi apiaro naajokon noi na Kiristo.

³⁰Kemaimai esi ngikaitotoi kang atamar, kotere Ekapolon yok Yesu Kiristo ka amina na kitaanyunit Etau a Akuj, elipa ka ayong aapei kilipakinito ayong.

³¹Kilipa sodi katoyuun ayong alotunga alu nyenupito alu eya Yudea, nabo tachamuneta ngitunga a Akuj lu eya Yerusalem ngakiro na asubi ayong.

³²Nakaneni abuni ayong nikus alakara noi ani kerai echami a Akuj, eanga ayong niajokon nakipeyonitor ka esi.

³³Kimiekisi Akuj na erai nikeng itorunit ekisil daang kiruko ka esi daang. Aamen.