Read turkana Ngiroma 16 Bible Online

Ngiroma 16 - turkana bible

Ngiroma 16

¹Kalimokinit ayong esi atamar erai nakaatoyok Poebe na esubi etich alokanisa a Kenikirea itwaan ajokon.

² Kitepeyono ngesi a ekiro a Ekapolon, loger lo ejoikinit ngitunga a Akuj esubete, kingarakisi ngesi erai keyei ibore idio iitanit ngesi anikus, kainyo arai kolong ngesi apae naajokon alotunga alukaalak kengarakinit tani ayong.

³Kimalakinae Pirisila ka Akula, na kisubi ka ayong aapei etich a Yesu Kiristo,

⁴ajalito kesi akiyar kech kotere ayong. Alakara ayong noi kotere kesi, meere ayong dang bon, elakara tani ngitunga daang a ngikanisae a ngibukui alu nyerai Ngiyaudi.

⁵Kimalata tani ngitunga a ekanisa lu iriameenete nawi kech. Kimalakinae Epaneto lopae kang lominat, lo erai ngesi kolong esiauni anakwap a Asia akinup ngakiro a Kiristo.

⁶Kimalakinae Mariam naasub etich lokojokon noi kotere esi.

⁷Kimalakinae tani Aduroniko ka Junia, Ngiyaudi lukolong kienitae ka ayong aapei. Ayenikinitae kesi alomeanara, nabo aliworosi kesi ngikiristoi eringa ayong nyeliworo.

⁸Kimalakinae Ampuliato, lopae kang lominat ani kiraakar ngipei ani a Ekapolon.

⁹Kimalakinae tani Urubano, lo kisubi ka ayong etich a Kiristo aapei, kimalakinae tani lopae kang lominat Sitaku.

¹⁰Kimalakinae Apele lo eningitoe kemina dir Kiristo. Kimalakinae ngitunga a awi a Arisitobulo.

¹¹ Kimalakinae Erodina, itwaan a akwap kang, ka ngitunga daang a awi a Narikis lu emorikin ka Ekapolon.

¹²Kimalakinae Turupena ka Turuposa lu esubete etich a Ekapolon ka lopae kang Peris lo asub nakaalak kotere Ekapolon.

¹³Kimalakinae Rupo, ekiristoit lo eyenikinitae alotich a Ekapolon ka itiokeng na erai itiokang.

¹⁴Kimalakinae Asunikirito, Pilegoni, ka Erimes, ka Patiroba, ka Erima ta ngikaitotoi lukiristoi daang erukito ka kesi.

¹⁵Kimalakinae Pilologo ka Julia, Neera ka nakaatokeng ta Olumpa ta ngitunga daang a Akuj lu erukito ka kesi.

¹⁶Kimalas esi make itoodiunito atamar iminan. Kimalaate esi ngitunga daang a ekanisa a Kiristo.

¹⁷Ngikaitotoi kang, kemaimai esi atamar tochoikinos ani eya lu etiakatiakaate ngitunga nabo kitosecha, engerito ngakiro nakolong kitatamio esi. Warasi nyiruko ka ngitunga ngulu.

¹⁸Kainyo nyesubete ngitunga lu ikote neni etich a Kiristo, erai etich losaket akimuj ngesi esubete. Iruorosi kesi ngakiro nakaabok, todiakito ngitunga esakete aaruar ngitai a ngitunga alu nyemodeaka!

¹⁹Eira itwaan daang eger lo iwapitotor esi ngakiro a Akuj, nakaneni alakara ayong noi kotere ngakiro nguna. Asaki ayong esi toosokioto noi anakiro anaajokak, sodi nyikilimun anakiro anaaronok.

²⁰ Ani Akuj na erai nikeng itorunit ekisil, nyemamakini akinyasun Esiitan toreut esi. Kimiekisi ajokis a Ekapolon yok Yesu min nikus.

²¹Kimalae esi Timoteo lo kisubi ka ayong etich aapei, kimalaate tani Lukio ka Yason ta Sosipatiro lu eraakasi ngitunga a akwap kang.

²²Tani ayong Teritio lo egiri abarua na, kemalae a ekaitotonu alo a Kiristo.

²³ Kimalae esi Gayo lo apeyonit ayong anawi keng ka ngitunga a ekanisa daang lu iriamito nawi keng. Kimalae esi Erasito lo erai ekatingan a ngaropiyae a ere kalo ka lokaatokosi Kwarito. [

²⁴Kagatakinit esi daang ajokis a Ekapolon yok Yesu Kiristo. Aamen.]

²⁵Kimiekisi epuruutu Akuj! Epedori ngesi akiturubakin esi inupito jik Ngakiro Naajokak a Yesu Kiristo na etatami ayong, ka ngakiro na iteni nakolong emunonitae nakaneni edodiun tokona.

²⁶Nakaneni tokona, esileereun ngakiro na iteni nguna anagiran a ngikadwarak a Akuj ani nabo kotere ngakiro na adunguni Akuj na nyesaluni, eteyenun ngitunga a ngibukui alukaalak sodi tonupeta kesi daang ngakiro a Akuj kiwapa.

²⁷Kimiekisi ekipur lo itorunit nia Yesu Kristo, min nia Akuj ana erai ngesi bon eos noi! Aamen.