Read turkana Ngiroma 2 Bible Online

Ngiroma 2 - turkana bible

Ngiroma 2

¹Ekone yaa, ani kirirae iyong luche, emam jik ngakiro na ilimuni iyong toyuunor tani kirai iyong ngae, kainyo na irira iyong luche ani erumor tosub ngakiro napei esubete kesi, irira iyong elope bon.

²Kiyeni atamar iyookinit Akuj na irira ngitunga lu esubete ngakiro na ikote nu.

³Nakaneni iyong ekone, isubi iyong ngakiro na irira luche! Itamit iyong atamar ipuun aloriras a Akuj a?

⁴Kori imenyarit iyong ni ejokia Akuj noi enaikinit nabo totitinyikinite. Iteni dir iyeni iyong atamar epatana Akuj, kainyo esaki ngesi areeun iyong tolung ngasechesea kon.

⁵Nakaneni etioko esi ngitai nabo ichanaka esi noi. Ani ikoneta neni, itoronete esi noi eriras kus Akolongit na etakanuunea anyunyura a Akuj ka eriras keng lo etenoono.

⁶Kainyo einakini Akuj itwaan daang ebachit itemem ka na asub ngesi.

⁷Erubakinito ngitunga ngiche esubete naajokak esakete ekipur ka arimatoi ta akiyar nanyedaun, eanyunete kesi akiyar nanyedaun.

⁸Nakaneni edingaka ngitunga ngiche nabo nyiwapito nguna iteni, pearai iwapito naaronok, eanyunete kesi anyunyura a Akuj ta angoit keng.

⁹Eanyuni itwaan daang ni esubi naaronok ngichan ka ariaba, eanyunete mono Ngiyaudi ka nabo tani ngibukui lu nyerai Ngiyaudi.

¹⁰Nakaneni itaanyuni Akuj daang lu esubete naajokak ekipur ka arimatoi ta ekisil. Eanyunete Ngiyaudi mono ani erumor taanyut ngibukui lu nyerai Ngiyaudi dang.

¹¹ Kainyo irirae Akuj ngitunga daang a epit a epei.

¹²Nyeyenete ngibukui lu nyerai Ngiyaudi etal a Musa. Esechete kesi sodi tobukoros ani nyeyeneta etal. Eyenete Ngiyaudi etal, esechete kesi kirirae a etal.

¹³Kainyo meere akipup ngakiro a etal ngesi imarunere ngitunga atamar etenoono eboyor ani a Akuj, nakaneni erai akiwap na edungunitoe Alotal.

¹⁴Nyeyenete ngikubui lu nyerai Ngiyaudi etal, nakaneni na esubeta kesi na edungunitoe alotal kotere ni ebalar kesi ibore tosuba kongina, itoodiunit ibore ngini atamar, eyenete kesi etal alotai kech, tani pekeyenete kesi etal.

¹⁵Itoodiunit eboyor kech atamar igiritae etal lotai kech. Itoodiunito ngitamen kech dang atamar eraakasi nguna ngaka iteni kainyo idodikinete kesi ngitamen ngiche atamar esechito kesi nabo idodikinete ngiche atamar nyesechito.

¹⁶Aloger kangolo, iwapap ka Ngakiro Naajokak na etatami ayong nu, ikokinete ngakiro neni Akolongit na irira Akuj ani a Yesu Kiristo ngakiro daang na imunonito ngitunga.

¹⁷Ani bo iyong? Abe ibala iyong arai Eyaudit a? Igieno iyong etal kiwoga ibala abe irukito ka Akuj,

¹⁸iyeni iyong na esaki Akuj iyong tosub nabo itatama iyong Alotal aseun na eteniyete,

¹⁹iyeni iyong atamar irai iyong ekarikon a ngimuduk nabo ikoni akicha ani kangulu eya naribu.

²⁰Irai iyong ekarionokinan ngikabangabangae nabo eketataman alu emam ibore eyenete ikote ngide luuchik. Erai Lotal ngesi eyei aosou ka ngakiro na iteni daang.

²¹Itatami iyong luche, nyo peitatamar iyong bon? Ilimorit iyong ibala, “Nyiikoko”, nakaneni anibo iyong, ikokoyeene iyong a?

²²Ibala iyong, “Nyiilom”, nakaneni ilomeene iyong a? Iremokino iyong ngakujo nasubuna, tarai bo ibarit iyong ani ikokoea ngiboro lu eya nakais a ngakujo anasubuna.

²³Iwoga iyong ibala abe iyeni etal a Akuj, ikwa nyiyeni iyong atamar imenyarit iyong Akuj na ichwangakinea iyong etal keng a?

²⁴ Igiritae nagiran a Akuj kona, “Iruorotor ngibukui lu nyerai Ngiyaudi Akuj ngakiro naaronok kotere esi Ngiyaudi.”

²⁵Ani kiwap iyong etal, erai akilengero kon naajokon. Nakaneni ani kichwangak iyong etal, kejoikinit kolong iyong tani pekilengerio.

²⁶Ani kirichak ebukut lo nyerai Eyaudit ni nyilengeritae ngakiro na edungokinitae Alotal, ikwa nyisikokini Akuj ngesi itwaan ni ilengeritae tani pekilengeritae a?

²⁷Loger ngolo, kirirate esi ngibukui lu nyerai Ngiyaudi ani ichwanganakineta esi etal. Tani ta kigirakinitae esi etal ngolo nabo kilengeritetei. Nakaneni iwapito ngibukui lu nyerai Ngiyaudi etal erai tani bo pekilengeritae kesi dang.

²⁸Eya daang, ngae mono erai Eyaudit dir lo ilengeritae na iteni? Meere ebukut lo erai Eyaudit anikalapatan, lo erai akilengero keng ibore ni etakani anikalapatan.

²⁹ Eyaudit lo a iteni dir ngesi lo ebele Akuj asubu ilengeritae etau keng. Erai ibore ngini etich a Etau a Akuj, meere lo a etal alo igiritae. Itwaan ni ikoni neni, eanyunit ekipur keng ani a Akuj, meere lotunga eanyunitor.