Read turkana Ngiroma 3 Bible Online

Ngiroma 3 - turkana bible

Ngiroma 3

¹Eyei ibore idwangitor Eyaudit ebukut loche a? Kori ejok robo akilengero noi?

²Ee, ejok a ngiwaitin kadaang! Mono ekingaren, eteyenuni Akuj Ngiyaudi ngakiro keng.

³Ani ejok bo toya ngiche kech luaronok lu nyirichunito ngakiro nguna? Itoodiunit neni atamar epalikini Akuj aliwor naajokon na irichunit ngitalio keng a?

⁴ Meere kongina! Erai Akuj na iteni, tani keliokono itwaan daang. Loger lo igiritere nagiran kona, “Echamit eyenunio atamar ilimuni iyong ngakiro na eteniyete na iruorikinea. Echamit iyong ipiyori ngakiro nakititakinitere iyong.”

⁵Nakaneni a, ani kitoodiunit aronis yok atamar esubi Akuj na eteniyete a, kitamari ngoni ai? Kitamari ngoni abe esubi Akuj naaronok ani kirira ngoni a? (Eruoro cha ayong nugu lokiruor a itwaan.)

⁶Nyikote neni! Arai tarai Akuj na nyitiriyani ngakiro lokojokon, ikokini ngesi irirae ngitunga a akwap ai?

⁷Kori ilimuni iyong tama, “Ani kisileereunit ni nyerichunitor ayong etal a Akuj atamar ejok Akuj noi, sodi kitiliwo ibore ngini ngesi akapolon noi, ikwa nyejoikinit bo ayong kerirao atamar arai ekasechan”.

⁸Ikoni ibore ngini atamar, “Atosuba naaronok sodi ataanyuneta naajokak!” Abe ngesi kiyenyeta sua ngiche kirirate ebalasi abe kitatami sua kongina. Irirao kesi loger lo ejoikinitor iriraare.

⁹Ekoe, kijokak tokona ngoni Ngiyaudi kidwangit ngibukui lu nyerai Ngiyaudi a? Mam jik! Ketoodik sek ayong esi atamar ikwaan Ngiyaudi ka ngibukui lu nyerai Ngiyaudi eraakasi daang ngikasechak.

¹⁰ Loger lo igiritere kona, “Emam itwaan ni ejok,

¹¹emam itwaan ni eos kori emam ni esaki Akuj.

¹²Areasi daang ani a Akuj echwangakis daang, emam itwaan etenoono, emam tani ipei.

¹³ Ianete kesi ngakiro naaronok noi nakaarak, eliokoko kesi noi, elimito ngakituk kech ngakiro naaronok na ikote akisierit a emun,

¹⁴ileleba ngilam nakituk kech.

¹⁵ Ekeraka ngakejen kech, esakete akinyasun ka akiar ngitunga,

¹⁶ani wadaang ni eloose kesi, ichanete ngitunga ka akinyasuunun.

¹⁷Nyeyenete kesi erot lo erai eka a ekisil,

¹⁸ nabo nyeyenete kesi jik epit lo erai ekeret Akuj.”

¹⁹Kiyeni atamar eraakasi ngakiro a etal ngaka ngulu iwapito etal, sodi tongopea itwaan ni elimuni ngakiro na eyuunor nabo peneta ngitunga daang a akwap loriras a Akuj.

²⁰ Kainyo emam itwaan imaruni Akuj atamar etenoono anikeng ani irichunitor etal. Erai etal lo itoodikini itwaan atamar asub akisech.

²¹Nakaneni esileereun tokona epit lo imarunea Akuj atamar etenoono eboyor yok anikeng, erai pekekachitae epit a etal. Achamunito ngikadwarak a Akuj ka ngakiro na egiritae Lotal atamar ikote nguna neni.

²²Itiliwori Akuj ngitunga lu etenoono eboyor anikeng kotere epit lo enupitotor ngakiro a Yesu Kiristo. Ikwaanakini Akuj neni ani eya daang lu enupito, erai peipakarit nabo ngiche,

²³asecha daang aloketa Anakuj ana epedori ayuun.

²⁴Nakaneni kotere ajokis a Akuj, imaruni Akuj kesi atamar etenoono eboyor kech ani anupeta ngakiro a Yesu Kiristo na elachakinete kesi dir.

²⁵Alemuni Akuj Kiristo sodi taarae torimakinere ngasechesea a ngitunga ani anupeta kesi ngakiro keng. Ekokini Akuj neni sodi kitoodiunea ngesi atamar erai ngesi lo etenoono eboyor keng anikeng. Kolong sek, anaikinit Akuj peakachit ngasechesea a ngitunga.

²⁶ Ani tokona ngirwa lu, alema ngasechesea a ngitunga sodi kitoodiunea eger lo eraakar lo etenoono eboyor nabo itiliwori itwaan daang ni enupi ngakiro a Yesu ni etenoono eboyor keng ani a Akuj.

²⁷Tokona a, nyo ejoikinit ngoni kiwogar? Emam! Kotere nyo? Erai nikirichunea ngoni etal a? Mam! Erai nikinupitor ngoni ngakiro a Akuj.

²⁸Kainyo eliwor itwaan ni etenoono eboyor ani a Akuj kotere anupit keng, meere kotere akirichun etal.

²⁹Kori erai robo Akuj aka Ngiyaudi make? Kori erai aka ngibukui alu nyerai Ngiyaudi dang. Ee robo, erai ngesi Akuj a ngibukui alu nyerai Ngiyaudi dang.

³⁰Erai Akuj apei, nakaneni imaruni ngesi Ngiyaudi atamar etenoono eboyor kech anikeng kotere anupit kech. Imaruni tani ngibukui lu nyerai Ngiyaudi atamar etenoono eboyor kech kotere anupit kech.

³¹ Ekoe, itoodiunito nguna atamar kipalikini ngoni ngakiro a etal ani kiraakar ngikanupak a? Mam jik, kiliwor ngoni lu kirichunit etal.