Read turkana Ngiroma 4 Bible Online

Ngiroma 4 - turkana bible

Ngiroma 4

¹Kitamari tokona ngakiro a Aburaam alo erai apaayok ai?

²Ani kolong ketenoono ani a Akuj kotere ngitichisio keng, kepedo ngesi akiwoga, nakaneni nyiwoga ngesi ani a Akuj.

³Kainyo igiritae nagiran kona, “Anupi Aburaam ngakiro a Akuj sodi kimaru Akuj ngesi atamar erai itwaan ni etenoono eboyor.”

⁴Itwaan ni esubi etich itanyamio ngaropiyae. Nyimarunitae ngaropiyae nguna atamar eraakasi ebachit keng. Meere kongina, eraakasi na ejoikinit itanyamio.

⁵Nakaneni itwaan ni igieno eger lo enupitor ngesi Akuj na erimakinea lu nyenupito, emina Akuj anupit a itwaan kangini. Dio tomisik Akuj itwaan ngini atamar etenoono eboyor.

⁶ Ngakiro nguna ngesi kolong eruoro Daudi ebala epiaritae itwaan ni emaru Akuj atamar etenoono, peekachitae ngitichisio keng. Alimunit Daudi tama,

⁷“Epiaritae ngulu arimakin nguna ichwanganakinete, kesi ngulu aburuchiar ngasechesea kech!

⁸Epiaritae itwaan ni nyimari Akuj ngasechesea keng!”

⁹Erai apiaro nakolong alimit Daudi aka ngulu ilengeritae make a? Mam! Erai aka ngulu nyilengeritae dang. Kainyo kilimu ngagiran na igiritae kona, “Anupi Aburaam ngakiro a Akuj, sodi kotere anupit keng, kimaru Akuj ngesi atamar erai itwaan ni etenoono.”

¹⁰Ori kolong asubatar ngakiro nguna? Asubasi nguna kilenger Aburaam kori eringa nyilengera? Asubasi eroko ngesi nyilengera, meere kilenger ngesi kerumor.

¹¹Elengerio ngesi ekisidi, kidodiu akilengero keng atamar kotere ni anupitor Aburaam, emarunit Akuj ngesi atamar erai itwaan ni etenoono, tani eringa ngesi nyilengera. Kaneni, arai Aburaam apakeng kadaang alu enupete Akuj, kimaru Akuj kesi atamar etenooko, tani pekilengeritae kesi.

¹² Erai ngesi apakeng tani alu ilengeritae, alu erai ani kilengeritae dang, iwapito ekitetemes a anupit ana kolong ewapit apayok Aburaam eringa nyilengera.

¹³Na echikakinea Akuj Aburaam ka ngalesea keng atamar eliwor akwap akeng, peechikakini ani ewapitor Aburaam etal, erai ni anupitor ngesi ngakiro a Akuj sodi kimaru Akuj ngesi atamar erai itwaan ni etenoono eboyor.

¹⁴Kainyo arai tarai lu iwapito etal kesi eliwor ngikerumak akwap, kerai anupit a itwaan aka kongin nabo kerai akichikakinet a Akuj aka pas.

¹⁵ Eyauni etal anyunyura a Akuj, nakaneni ni emam etal, emam akisech.

¹⁶Kotere nguna, erai akichikakinet aka a anupit, sodi toliworor akichikakinet ngina einakinit Akuj ngalesea daang a Aburaam pas, meere lu iwapito etal make, erai tani lu enupito ngakiro a Akuj kona kolong ka Aburaam, kainyo Aburaam ngesi erai apayok,

¹⁷kona igiritere nagiran atamar, “Ketiliwo iyong apa keng a ngibukui alukaalak.” Erai anupit a Aburaam na iteni noi ani a Akuj ana anupit Aburaam, Akuj ngina iteyaruni ngikatoak nabo edunguni akiroit sodi tatakanu ibore nisek amam.

¹⁸Anupi Aburaam kigienokin, tani emam ibore ni ajoikinit ngesi igienor, sodi toliwor ngesi apakeng a ngibukui alukaalak. Loger lo igiritere kona, “Elalakearosi ngalesea kon toriyanikinos ka ngikanyer.”

¹⁹Adolokinit ngesi ngirwa ngulu ngikaru amiat apei. Nakaneni peangayat ngesi anupit keng na etamea eger a akwaan keng ana abu tolilimiyo, kori eboyor a Sara ana akolupana.

²⁰Nyepalikina ngesi anupit keng nabo nyengayakina akichikakinet a Akuj. Kitogogong ngesi anupit keng noi sodi kipuruu Akuj.

²¹Anupit ngesi dir atamar epedori Akuj asubakin nguna daang echikakinit ngesi.

²²Ibore ngini ngesi emarunitor Akuj Aburaam ani anupitor atamar, “Erai lo etenoono.”

²³Peegiritae ngakiro nabe, “Emarunio atamar etenoono” kotere ngesi bon.

²⁴Egirio kotere ngoni dang lu kimarun atamar etenoono eboyor yok. Ngoni lu kinupit Akuj na eteyaruni Yesu Ekapolon yok.

²⁵ Epotorio ngesi kotere ngasechesea yok taarae. Aponi kiteyarunae ngesi toyar sodi atachamunotor ngoni ka Akuj.