Read turkana Ngiroma 5 Bible Online

Ngiroma 5 - turkana bible

Ngiroma 5

¹Kona aliworor eboyor yok lo etenoono ani Akuj ani kinupitor ngoni, kisil ngoni ka Akuj ani Ekapolon yok Yesu Kiristo.

²Kotere ni kinupitor ngoni ngakiro a Yesu, kiwaak ngesi ngoni najokis a Akuj, na erai ngesi kiyarea ngoni. Aloger kangolo, kiwoga ngoni kotere akigieno na kimorea ngoni ekipur a Akuj!

³Meere tani kotere nguna make, kilakara ngoni alochan yok kiyeni atamar kititinyer ngoni erai kinaik ngichan,

⁴kichamuni ngoni Akuj kotere anaikinit, sodi ani kichamuni ngoni Akuj, egienokinos ngoni ngesi.

⁵Nyikitaanyuni ngoni akigieno ngina ngileech kainyo abukokin ngitai yok amina lokojokon a Etau a Akuj, alo erai ainakinet nakiinak ngoni Akuj.

⁶Ani kolong eringa ngoni kipalag, totoan Kiristo kotere ngoni lupekinupit Akuj a esaa alo aseunit Akuj.

⁷Etieno itwaan atoanere kotere itwaan ni etenoono. Ngaye robo kesak itwaan atoanere kotere itwaan niajokon.

⁸Nakaneni kitoodik Akuj ngoni dir eger lo kiminar ngesi ngoni, ani kolong atoanea Kiristo kiringa kirai ngikasechak!

⁹Kotere akitu keng, kimaru Akuj ngoni atamar etenoono eboyor anikeng. Kiyuun tokona ngoni ananyunyura a Akuj noi!

¹⁰Kirai kolong ngoni ngimoe a Akuj, nakaneni kiliwor tokona ngipaalon keng kotere akitu a Lokookeng. Kona tokona kiraunea ngoni ngipaalon a Akuj, kiyuuni ngoni Kiristo lokojokon noi ani eyarea.

¹¹Meere nguna make, kilakar ngoni ana asubi Akuj ani a Ekapolon yok Kiristo alo tokona kitiliwo ngoni ngipaalon a Akuj.

¹²Itwaan ipei ngesi ayauni akisech nakwap. Sodi kirukut akisech keng ka akitu. Kotere nguna, akeikin akitu lotunga daang ani asechea itwaan daang.

¹³Ayei kolong akisech nakwap eringa Akuj nyeinakina Musa etal. Nakaneni ni emam etal, emam itwaan imarit ngasechesea.

¹⁴ Nakaneni napei kolong a ngirwa a Adam tanang ngirwa a Musa, ajoikinit ngitunga daang etoakete. Tani ngulu nyesecha lopit lopei asechea Adam, ani angerio akiwap ngakiro na adungokinit Akuj. Arai Adam akisikwaanet a itwaan ani ebuni ekisidi.

¹⁵Nakaneni nyikwaan luarei ngulu, kainyo ainakinet a Akuj na a pas, nyikwaan ka akisech a Adam. Erai iteni dir atamar atoakete ngitunga lukaalak kotere akisech a itwaan anipei kangini. Nakaneni etenoono ajokis a Akuj noi. Etenoono tani ainakinet keng na a pas na eanyunete ngitunga lukaalak kotere ajokis a itwaan a ipei, Yesu Kiristo.

¹⁶Nyikwaan ainakinet a Akuj ka akisech na asechi itwaan nipei ngini, kainyo na asechea itwaan ipei, kirira Akuj ngesi tama erai ekasechan. Ani na asecheta ngitunga lukaalak, yau Akuj ainakinet na a pas na erai ngesi kimarunere ngoni atamar nyikisechit.

¹⁷Erai iteni dir atamar kotere akisech a itwaan a ipei, apot ngitunga toliworos etoakete kotere itwaan nipei ngini. Nakaneni, eteniyete dir ngakiro naasubi itwaan ipei ni erai Yesu Kiristo. Daang lu imarunio atamar etenoono eboyor kech ani a Akuj, taanyut ajokis lokojokon noi, eanyunete akiyar aloboyor kech ani a Kiristo.

¹⁸Tokona bocha, kona erirare ngitunga daang kotere akisech a itwaan a ipei, aloger alopei kangolo, na asubakinere akiroit apei na etenoono, elachakin itwaan daang dir taanyu akiyar.

¹⁹Ani kona aliworotor ngitunga daang ngikasechak kotere ni angerio itwaan ipei akiwap ngakiro na alimokinitae aloger alopei kangolo, imaruni Akuj kesi atamar etenoono eboyor kotere ni ewapea itwaan ipei na alimokinitae.

²⁰Esiakini Akuj etal sodi kiatakinotor ngakiro naaronok. Ani iatakinosi ngasechesea, kiatakin tani ajokis a Akuj noi.

²¹Kongina bocha, loger lopei ayaunea eboyor a akisech akitu, kongina pei, eyaunit ajokis a Akuj eboyor lo etenoono anikeng. Eboyor ngolo kiriki ngoni nakiyar nanyedaun kotere Yesu Kiristo, Ekapolon yok.