Read turkana Ngiroma 6 Bible Online

Ngiroma 6 - turkana bible

Ngiroma 6

¹Kitamari tokona ngoni ai? Ejoikinit ngoni kirubakini kirai ngikasechak sodi kiatakinor ajokis a Akuj a?

²Meere kongina jik! Kikoni ngoni ngitunga lu kitoaka alosech, kirubakinit kirai ngikasechak ai?

³Kainyo iyenete esi dir atamar nakibatisaare ngoni emorikin ka Yesu Kiristo, kibatisao ngoni emorikin ka akitu keng.

⁴ Na kibatisaare ngoni, ekokisi ngitunga lu kitoaki ka ngesi kitomur aapei. Sodi kona kolong eteyarunere Kiristo a ekipur a Apa, ataanyuneta ngoni dang akiyar nakitetet.

⁵Kainyo kona kiliworor ngoni ngipei ka ngesi tosub kitoaka loger lokolong atoanea ngesi, aloger alopei kangolo, kiliwor ngoni ngipei ka ngesi ani kiteyarunere loger lokolong eteyarunere ngesi.

⁶Kiyeni atamar kikok ngoni lu atoana eboyor yok longorot aramakin ka Kiristo napir, sodi kinyasunere epit a akisech, nyikiliworor nabo ngoni ngirikon a akisech.

⁷Kainyo itwaan na etoanea, elachakin dir nyeringa nabo erai ekasechan.

⁸Kona kikokinea ngoni lu kitoaka ka Kiristo aapei. Kinupit ngoni atamar kiyari ngoni dang ka ngesi.

⁹Kainyo kiyeni ngoni atamar eteyarun Kiristo nyeringa etoani nabo, arai akitu na atoani ngesi, nakidwanget jik akitu.

¹⁰Ani kona atoanea ngesi atoanet apei totoaniarea akisech, eyari tokona ngesi erukito ka Akuj aapei.

¹¹Aloger alopei kangolo, ejoikinit tokona esi dang iyenunete atamar ikokis esi lu atoaka eboyor kus nyisechete. Ikokis esi lu iyarete ka Akuj aapei ani imorikinotor ka Yesu Kiristo.

¹²Nyejoikinit nabo esi isecheenete toliwor iwapito etereku a ngawat kus.

¹³Warasi nyiijal tani ekinier epei a ngawat kus toliwor ibore ni esubere naaronok ka akisech. Ejoikinit esi ijalasi ani a Akuj loger a ngitunga alu eteyarun toyara, sodi tajalakis ngesi eboyor kus daang toliwor esubere nguna eteniyete ani a Akuj.

¹⁴Nyejoikinit akisech kiriki esi, kainyo nyeringa esi iwapito ngakiro a etal, iwapito esi ngakiro a ajokis a Akuj.

¹⁵Kitamari tokona ngoni ai? Ejoikinit kisechi ani eraakar meere ngakiro a etal kiwapit ngoni, erai na a ajokis a Akuj kiwapit a? Mam jik!

¹⁶Iyenete esi dir atamar na ijalatar esi toliworos ngirikon lu iwapito ngakiro a itwaan aniche, iraakasi esi dir ngirikon a ekapolon alo iwapito esi ngakiro keng, kiraakasi ngirikon a akisech ana eyauni akitu, kori ngirikon a akiwapit na kilimokinitae, na erai ngesi eyauni ateneanut.

¹⁷Nakaneni, kibuakini Akuj alakara! Kainyo tani kolong sek kiraakasi esi ngirikon a ngasechesea, iwapa esi a ngitai kus kadaang ngakiro na iteni nakolong kitatamio.

¹⁸Kilachakinio esi dir tojongoto asecheenen sodi toliworos ngirikon a eboyor alo etenoono ani a Akuj. (

¹⁹Alimunit ayong nugu a ngabukui anapalem sek iruorosi ngitunga luche dang, kotere apalagagu kus.) Kolong sek ijaluna esi iraakasi lu kitikit emalaanu ka erukoonu loaronon erupunit anikus. Aloger alopei kangolo, tajalunos esi jik tarata ngirikon a eboyor alo etenoono ani a Akuj, toliworos lu italeuno.

²⁰Nairaakatar esi ngirikon a ngasechesea, peiwapito esi eboyor lo etenoono ani a Akuj.

²¹Nyo kolong ipot esi taanyut na isubeta ngakiro na tokona kitimito esi? Esalunete ngakiro nguna anakitu!

²²Nakaneni kilachakin tokona esi nyeringa iwapito akisech, irata esi ngirikon a Akuj. Ibore ni ianyut esi ngesi akitaleuno ani a Akuj, na erai esal keng ngesi akiyar nanyedaun.

²³Kainyo akitu ngesi kitachakinio kotere akisech, nakaneni akiyar nanyedaun ngesi erai ainakinet a Akuj na a pas ani a Yesu Kiristo, Ekapolon yok.