Read turkana Ngiroma 7 Bible Online

Ngiroma 7 - turkana bible

Ngiroma 7

¹Ngikaitotoi kang, ayeni ayong atamar iyenete esi dir na asaki ayong alimun, kainyo iyenete esi daang ngakiro a etal. Iwapete ngitunga ngakiro a etal ngirwa daang lu eringa kesi eyareta.

²Erai tokona kilimuni ekitetemes anaberu ana iusitae, echamakinitae Alotal ngesi irukete ka ekile keng ngirwa daang lu eyarea ekile, nakaneni ani ketoana ekile keng, nyeringa nabo aberu ngina iwapit ngakiro a etal kangolo.

³Ani kechamu aberu ngina echekile eringa lokile keng eyari, eliwor ngesi akaloman. Nakaneni ani ketoana lokile keng, echamakinitae Alotal ekile eche iusi ngesi. Ani kuut ngesi ekile eche, meere ngesi akaloman.

⁴Ikote ngakiro neni anikus ngikaitotoi kang. Ikokis esi ngitunga lu itoaka alopit a ngakiro a etal kainyo iraakasi esi epewae a akwaan a Kiristo. Iliworosi tokona esi ngipei ka lokolong eteyarunio sodi tosubakinea Akuj etich loajokon.

⁵Kainyo nakolong kibooyo ngoni lopit lopalem sek, toroner etereku yok noi kisikokin anawat yok ani ayakar etal, sodi atoliworos ngoni kisubi ngakiro na erikito akitu.

⁶Nakaneni kilachak tokona ngoni Akuj anakiro a etal, kainyo kikok ngoni ngitunga lu kilachun anakiro ana kolong kienito. Nyejoikinit tokona ngoni nabo kisubi etich kiwapit ngakiro nakolong ngorok egiritae Lotal, nakaneni ejoikinit kisubi etich alopit a Etau a Akuj.

⁷Kitamari tokona ngoni abe kori ikwaan etal ka akisech a? Mam jik! Erai etal kolong ketoodikini ayong atamar akisech ngesi nyo. Arai kolong nyigiritetei Lotal kona, “Wara nyikiraka etereku kotere ibore a itwaan aniche,” pekayeni ayong ngakiro a etereku kangolo.

⁸Kotere epit a akichikakinet kangina, aanyu akisech eger lo isiakinea ngiterekui lugelagelae anikang. Ani emam etal, ikoni akisech ibore ni etoanit.

⁹Ayakasi kolong ngirwa lu ayarea ayong dang peayeni etal. Nakaneni na ayenunea ayong akichikakinet a Akuj, abu akisech tatakanu,

¹⁰ekok ayong ibore ni atoana. Sodi akichikakinet na kolong asakitae yau akiyar, yau akitu alowae kang.

¹¹ Taanyu akisech eger lo kengalaa ayong anakichikakinet kikok ibore ni kaar ayong.

¹²Nakaneni erai etal lo ebekoono nabo ebekoono akichikakinet dang, erai na etenoono na ejok.

¹³Tokona, idodiunit ibore ngini atamar ibore niajokon ngini kaari ayong a? Mam jik! Akisech ngesi kaari ayong. Etoruni akisech esubi nguna lotal loajokon yau akitu nikang, sodi toyeneta dir ngitunga atamar akisech ngesi nyo. Ani kanguna kotere akichikakinet, kitoodiunere akisech atamar erono noi lokojokon.

¹⁴Kiyeni ngoni atamar erai etal eka a Etau a Akuj, nakaneni arai ayong itwaan nikarikit akisech.

¹⁵Nyayeni ayong ngakiro naasubi kainyo nyasubeene ayong na asaki akisub, erai na aremokino ngesi asubeene.

¹⁶Kona eraakar na nyasaki ayong akisub ngesi asubeene, itoodiunit ibore ngini atamar achamunit ayong atamar etenoono etal.

¹⁷Nakaneni meere ayong asubi ngakiro nguna, erai akisech na eyei tooma kang ngesi ketusubi ayong kongina.

¹⁸Ayeni ayong atamar emam ibore ajokon eyei tooma kang, ngesi atamar, tooma nakwaan kang, kainyo, tani ta kemuit ayong akisub naajokak, nyapedori ayong akisub.

¹⁹Nyasubi ayong naajokak na asaki akisub, nakaneni asubi naaronok na nyasaki ayong akisub.

²⁰ Ani kasubi ayong na nyasaki akisub, itoodiunit ibore ngini atamar meere ayong asubi nguna, erai akisech na eyei nikang.

²¹Nakaneni aanyu ayong atamar eyei etal lo ikoni lo nikang, naasakea ayong akisub ibore niajokon, toliwor ibore niaronon bon ngesi asubakini ayong.

²²Eminarit etau kang etal a Akuj lokojokon.

²³Nakaneni, etee ayong ngakiro a etal a eche alo egealana anakwaan kang, etal lo ejiete ka etal lo kajoikinit ayong. Ketiliworito nguna ayong erikot a etal alo a akisech alo eyei nakwaan kang.

²⁴Wae! Ekoe aluchan lu katingito ayong lu? Ngae kayuuni ayong anakwaan ana karikit nakitu kana?

²⁵Abuakinit Akuj alakara noi kotere Ekapolon Yesu Kiristo lo kiyuunor ngoni! Ikoni tokona eboyor kang ne, ayong elope anaosou kang, ewapit etal a Akuj, nakaneni ani aloger alo araakar itwaan, ewapit etal a akisech.