Read turkana Ngiroma 8 Bible Online

Ngiroma 8 - turkana bible

Ngiroma 8

¹Emam eriras eringa eyei ni eya ngulu erukito aapei ka Yesu Kiristo.

²Kainyo etal a Etau a Akuj lo kitaanyuni akiyar kotere akimorikin ka Yesu Kiristo aapei, kalachaki ayong dir nyewapit etal a akisech ka akitu.

³Nanyesubakina etal, kotere asechanu a eboyor a itwaan, tosubak Akuj. Kirira ngesi akisech aloboyor a itwaan ani ameunea Lokookeng, lo abuni ikwaan eboyor keng ka lo a ngikasechak, sodi totuborea ngesi akisech.

⁴Asubi Akuj nguna sodi kiyookinotor ngakiro na eteniyete Alotal, kiyookin aniyok alu kiyari kiwapit epit a Etau a Akuj, meere epit a eboyor yok.

⁵Kainyo lu ibooyete iwapito na esakete ngawat kech, erikito ngitamen kech ngakiro na esakete ngawat kech. Ani lu ibooyete iwapito na itoodikinit Etau a Akuj, erikito ngitamen kech na esaki Etau a Akuj.

⁶Ani kiriko iyong ngakiro a eboyor a akwaan, ianyuni akitu. Ani kirik iyong Etau a Akuj, ianyuni akiyar ka ekisil.

⁷Nakaneni eliwor itwaan emoit a Akuj, erai kerik ngesi eboyor lo erai eka a akwaan, kainyo nyiwapit ngesi etal a Akuj, iteni dir, emam ngesi kona iwapi.

⁸Ngitunga lu iwapito ngakiro na esaki eboyor a ngawat kech, nyitalakarete Akuj.

⁹Nakaneni nyibooyete esi loger lo esakea esi eboyor a ngawat kus kibooyoto, erai ibooyete esi loger lo kitoodikinit Etau a Akuj, erai robo kiboi Etau a Akuj anikus. Itwaan cha daang ni emam Etau a Kiristo, meere ika Kiristo.

¹⁰Nakaneni ani keyei Kiristo tooma kus, erai Etau a Akuj akiyar anikus kainyo etenoono eboyor kus ani a Akuj, erai tani ketoaka ngawat kus kotere akisech.

¹¹ Ani keyei Etau a Akuj ana eteyaruni Kiristo nikus, eanyunete ngawat kus dang nakasechak akiyar ani eyei lo kolong eteyaruni Kiristo, ani eyakar Etau keng nikus.

¹²Tokona bocha ngikaitotoi, eya na ejoikinit ngoni kiwapi, nakaneni meere akiwap na esaki eboyor yok ngoni atosuba.

¹³Kainyo ani kiboikinosi esi iwapito na esaki eboyor a ngawat kus, itoakete esi. Nakaneni ani kitapalik esi etau a Akuj asecheenen, iyarete.

¹⁴Ngitunga lu erikit Etau a Akuj, eraakasi talokookeng a Akuj.

¹⁵Kainyo Etau lo ianyut esi ani a Akuj nyikitiliwori esi ngirikon sodi tokurieketa, erai kitiliwori esi ngide a Akuj, nabo kotere agogongu a Etau a Akuj, ekaloutu ngoni atanyarata Akuj atamasi, “Apa! Apakang!”

¹⁶Imorikin Etau a Akuj kalu yok kitoodiu atamar kirai ngoni ngide a Akuj.

¹⁷ Kona kiraakar ngoni ngide a Akuj, kianyuni ngoni ibore ni idaritor Akuj ngitunga keng esaki apiarea kesi, nabo kianyuni ka Kiristo aapei ibore ni idaritor ngesi Akuj. Kainyo ani kiboliare ngoni loger lokolong aboliare Kiristo, kianyuni ngoni dang apolou keng.

¹⁸Esibit ayong nyitemio ngichan lua ngirwa kalu ka apolou nakitoodikinio ngoni.

¹⁹Idarit ibore daang nikolong asubuni Akuj imuit noi akingolikin Akuj itoodiuni talokookeng.

²⁰Kainyo etiliworio kolong ibore ni asubunio daang ipasit, peasakete kesi kikokis neni, nakaneni arai Akuj asaki kikokis neni. Tani kikote neni, ayei eger lo egienore atamar

²¹eyuunio monan ibore daang nisubuna, nyinyasun aloriras, nakaneni elachakinio dir taanyut apolou na a ngide a Akuj.

²²Kainyo kiyeni ngoni atamar tanang tani tokona, eriab ibore nisubuna daang loger a aberu ana edikino idouni.

²³Nakaneni meere ngiboro lusubuna make eriabasi, tani ngoni lu kianyu Etau a Akuj erai ainakinet a Akuj na ekingaren, kiriaba alotai yok erai kidarit Akuj kitiliwo ngoni talokookeng ka alachakin eboyor yok dir.

²⁴Kainyo erai akigieno kolong ngesi kiyuunere ngoni, nakaneni ani kianyunga ngoni ibore ni kigieno, nyeringa ibore ngini erai akigieno, kainyo ngae igieno atamar aanyuni ibore ni etee?

²⁵ Nakaneni ani kigienokin ngoni ibore ni nyikitee, kidaruni ngoni ibore ngini kinaikinit.

²⁶Aloger alopei kangolo, kingaranakini ngoni dang Etau a Akuj, tani kisechaka ngoni, kainyo nyikiyeni ngoni eger lo ejoikinit kilipi, Etau a Akuj ngesi ilipit Akuj kotere ngoni, eriaba elimit ngakiro na nyikiyeni ngoni ngikulepek.

²⁷Ani Akuj na eripit ngitai a ngitunga, eyeni ngitamen a Etau alo a Akuj kangolo, kainyo ilipanakini Etau ngolo ngitunga a Akuj, itemem ka ngakiro na echamit Akuj.

²⁸Kiyeni ngoni atamar anakiro kadaang, esubi Akuj naajokak ani eya ngulu eminasi ngesi, lu anyara ngesi kotere echami keng.

²⁹Ngitunga lukolong sek ayeni ngesi ankisiakinet, abu nabo toseu kikwaanikin ka Lokookeng. Sodi toliworor Lokookeng lo a ekingaren, alokaitotoi alukaalak.

³⁰Sodi tanyara Akuj lukolong ayeni. Ani lu anyarae ngesi, kimaru atamar etenoono eboyor anikeng, sodi taanyut kesi ka ngesi apolou aapei.

³¹Anakiro kanguna kadaang, anu ngache kilimuni? Ani kibakit Akuj alowae yok, ngae iche kitepegi ngoni?

³²Nyisieno Akuj tani Lokookeng lo arai epei bon, abu tajal ngesi kotere ngoni daang! Kona kiinakinea ngesi ngoni Lokookeng a, nyikiinakini ngesi ngoni tani ngiboro luche daang pas a?

³³Ngae ititakini ngitunga lu aseu Akuj? Alimu Akuj alope atamar nyesechito kesi!

³⁴Ngae tokona irirae kesi? Erai Kiristo kolong atoani, nabo toyaru ngesi alokatoak, ibooyi tokona anakan ana aloteten a Akuj. Ngesi kilipakinit ngoni!

³⁵Nyo epedori akitiak ngoni ka amina a Kiristo? Ngichan kitiakete a? Kori ngakiro nakationok, kori aboliaro, kori eron a akoro, kori eboot, kori ni ekot akiwan, kori akitu?

³⁶ Kona igiritere nagiran kona, “Ekotoi sua jiik akiar kotere esi, kikok sua ngamesekin na esakio akingol.”

³⁷Nakaneni kipiuni ngoni ngakiro daang kotere ngesi lo kimina ngoni!

³⁸Kainyo ayeni ayong atamar emam ibore kitiaki ngoni ka amina keng, nyikitiaki akitu kori akiyar, kori ngimalaikae, kori ngapolosio a adis kori agogongu ache na tokona eyei nadis kori namonan ebuni,

³⁹kori kidiama nadis kori tooma nalup, emam ibore nisubuna daang nikitiaki ngoni ka amina a Akuj na erai ayok kotere Ekapolon yok Yesu Kiristo.