Read turkana Ngiroma 9 Bible Online

Ngiroma 9 - turkana bible

Ngiroma 9

¹Eruoro ayong ngakiro na eraakasi ngaka iteni, arai ayong itwaan a Kiristo dir nyeruoro alioko. Ketoodikinit ayong Etau lo kang, erikit Etau a Akuj atamar nyeruoro ayong alioko.

²Asaki ayong alimun kona, ealolongi ayong noi nabo kariebete ngakiro etau

³kotere ngitunga a ebukut kang, lu eraakasi ngipei ka ayong! Arai tani kingarakinete ngakiro nu kesi, kejoikinit tani ayong kelamio atotiakas ka Kiristo.

⁴Eraakasi kesi Ngisirael, eraakasi dir ngide a Akuj, nabo edodikin apolou a Akuj. Echikakin ngesi ka kesi achamunet, sodi todungok kesi etal, aanyut kesi akilip na erai aka iteni nabo aanyut ngakichikakinet a Akuj dang,

⁵ eraakasi kesi ngalesea kata apaayok alu eraakasi Ngieburaniae lu ayenikinitae. Tani Kiristo dang aloger alo araakar ngesi itwaan, arai eka a ebukut kech. Kimiekisi Akuj na epolokinit daang kipuruunoe jik! Aamen.

⁶Nyabala ayong abukor akiroit a Akuj, kainyo meere Ngisirael daang eraakasi ngitunga a Akuj.

⁷Kori nyeraakasi daang ngide a Aburaam ani eraakatar ngalesea keng. Alimokini Akuj Aburaam tama, “Erai nia Isaka ngesi elimitere ngalesea kon.”

⁸Itoodiunit ibore ngini atamar ngide daang lu idounio nyelimuno Akuj, nyerai ngide a Akuj. Eraakasi ngide lu idounio na elimunio Akuj kesi eraakasi ngalesea a Akuj na iteni dir.

⁹ Kainyo alimuni kolong Akuj akichikakinet keng a ngakiro kanu, “Akolongit ngina eseunitae, abonguni ayong, sodi kidou Sara ikoku nisapat.”

¹⁰Meere tani nguna make, kainyo tani talokookeng a Rebeka luarei, epei apakech, ngesi apaayok Isaka.

¹¹Nakaneni sodi toyenunere atamar epedori Akuj aseun kona esakitor, tani eringa ngikaitotoi ngulu nyidouno, nabo ani eringa nyetiakuna naajokak ani eya naaronok,

¹²tolimok Akuj Rebeka tama, “Esubi edia loapolon etich aloochi.” Kaneni erai aseuno a Akuj na iwapap ka eger lo anyara ngesi alope, meere kotere ngakiro na esubete ngitunga.

¹³ Loger lo igiritere nagiran kona, “Aminakini ayong Yakobo, atoremokin Esau.”

¹⁴Ekoe kitamari tokona ai? Kejongoto ngakiro a Akuj aliwor na eteniyete a? Mam jik!

¹⁵Kainyo alimokini ngesi Musa tama, “Arimakini ayong itwaan daang ni asaki arimakin, kesieni ayong itwaan daang ni kesieni.”

¹⁶Kanguna, esubasi daang kotere akisienut a Akuj meere na esaki itwaan kori na esubi, nakaneni erai nakisienut a Akuj bon.

¹⁷Kainyo igiritae nagiran kona ngakiro a ekapolon a akwap a Misiri alo enyaritae Parao, “Ketiliwori ayong iyong ekapolon asaki iyong tosub etich lo itoodiuni agogongu kang. Sodi tokeik iyong ekipur kang nakwap daang.”

¹⁸ Tokona bocha, itoodiuni Akuj akisienut anitwaan kadaang ani esaki nabo itininiki etau a itwaan kadaang ani esaki akitininik.

¹⁹Kingisete esi ayong tamasi, “Ani kikote neni, ikokini Akuj eanyuni atamar esechit itwaan ai? Ngae engeri ngakiro na echamit Akuj?”

²⁰Nakaneni ekone iyong tokona irai nyo isaki akitepeg Akuj? Nyingisi amot nalupe itwaan ni ayeuni tama, “Nyo kolong kiyeunea iyong ayong kona?”

²¹ Kainyo itwaan nikayen ngamoti, eyee ngamoti a echoto loger lo esaki ngesi. Kori eyeuni tani ngamoti ngaarei a echoto a epei, toyeu apei na ejok noi sodi toyeu nache napasit.

²²Ikote tani ngakiro ani a Akuj neni. Asaki ngesi akidodiun anyunyura keng ka agogongu keng. Nakaneni anaikinit ngesi noi totitinyik ngakiro kangulu adikino eanyunete anyunyura keng, ngulu ejoikinit inyasunosi.

²³Asaki ngesi akisileereun eger lo epoloo ngesi noi, nabo kitaanyun ngoni ngitunga lu kisienit ngesi ngakiro nguna. Ngoni lu kisubakin ataanyutu apolou keng.

²⁴Kainyo kirai ngoni ngitunga lu anyarae ngesi meere lu kinyaraunio Aloyaudi make, erai tani lu anyaraunio alobukui alu nyerai Ngiyaudi.

²⁵ Ngakiro nguna ngesi na elimunit Akuj anakitab a Osea ebala, “Ngitunga lu nyerai ngikang, anyarae ayong, ‘Ngitunga kang.’ Ngibukui a akwap ana kolong peamina ayong anyarae ‘Ngiminan kang.’

²⁶ Ani nipei kolong alimonokinere kesi tamarae, ‘Meere esi ngitunga kang,’ enyarao kesi kaneni talokookeng a Akuj ana eyari.”

²⁷Eremari kolong ekadwaran a Akuj Isaya tolim ngakiro a Ngisirael tama, “Tani kelalak Ngisirael ketia asinyen na eyei nanam, ngipiyayek kech eyuunio,

²⁸kainyo erumori Ekapolon akirirare ngitunga daang a akwap atipei.”

²⁹ Erai Isaya kolong alimuni ekingaren tama, “Arai kolong nyeepiyanu Akuj na idwangit agogongu keng na ibore kadaang ngide ngiche lu eraakasi ngalesea yok, kikokinit ngoni ngitunga a ere a Sodom kalu a ere a Gomora.”

³⁰Ekoe kitamari tokona ai? Kitamari kona, emaru Akuj ngibukui lu nyerai Ngiyaudi lu peasakete achamun ka Akuj atamar etenoono eboyor ani a Akuj kotere anupit,

³¹tarai ngitunga a Akuj lu asakete akiwap etal lo itiliwori kesi lu etenoono eboyor ani a Akuj, apot kibatar alotal.

³²Nyoni ebatarotor? Erai ni nyigienokino kesi anupit, egienosi ngitichisio lu asubete. Sodi tadakakinos kesi kidiama “amoru na edakanari”

³³ na erai ngesi igiritae nagiran kona, “Kingolikisi, ewaakini ayong amoru Sion na edakanari ngitunga, ataaba na ibusokini kesi. Nakaneni itwaan cha daang ni enupi ngakiro keng nyirumete ngileech jik.”