Read turkana 1 Ngikorintoi 1 Bible Online

1 Ngikorintoi 1 - turkana bible

1 Ngikorintoi 1

¹Erai ayong Paulo lo kanyarao kotere echami a Akuj atoliwor emeanara a Yesu Kiristo, ka lokaato yok Sositene kigirunit abarua naga,

² Kigirakinit ngitunga a ekanisa a Akuj lu eya Korinto. Esi daang lukitaleun ani irauneta ngipei ka Yesu Kiristo, kitanyarae tarata ngitunga a Akuj. Kigirakinit tani ngitunga daang lu ilipito Ekapolon yok Yesu Kiristo awadaang, lo erai Ekapolon yok ka kesi aapei!

³Kimiekisi Akuj Apayok ka Ekapolon Yesu Kiristo kitaanyut esi ajokis ka ekisil.

⁴Abuanakini ayong Akuj alakara jiik kotere ni kitaanyunea esi ajokis ani a Yesu Kiristo.

⁵Kainyo kitaanyun esi ibore daang ani irauneta ngipei ka Kiristo, iyena esi tani ekiruor nabo iosokioto noi.

⁶Irubakis esi tani inupito ngakiro a Kiristo lokojokon.

⁷Nakaneni emam apiaro ache eringa esi iitunito, eringa esi idarito Ekapolon yok Yesu Kiristo idodiunio.

⁸Kiturubakini ngesi esi inupito tanang losal, sodi kitoriamunere esi emam akisech, Akolongit na Ekapolon yok Yesu Kiristo.

⁹Kipedori ngoni amuno Akuj dir, Akuj nakolong kinyarae esi tarata ngipei ka Lokookeng Yesu Kiristo, Ekapolon yok.

¹⁰Ngikaitotoi kang, kemaimai ayong esi daang a ekiro a Ekapolon Yesu Kiristo atamar topupokinos anakiro kadaang ana ianete esi. Warasi nyeemin atiakatiaka kiding kus. Kimorikinos toliworos ngipei alotamen kus ka ibore ni isakete esi akisub.

¹¹Kainyo kalimokis ayong ngitunga ngiche a awi a Kileo ngakiro na ileerete ngikaitotoi kang atamar iburaenete esi.

¹²Asaki ayong alimun atamar iruorosi esi daang ngakiro nagelagelae. Elimuni ipei tama, “Arai ayong ika Paulo,” tolim iche tama, “Arai ayong ika Apolo,” tolim iche tama, “Arai ayong ika Kepa,” ani iche tama, “Arai ayong ika Kiristo.”

¹³ Etiakatiaka Kiristo a? Erai Paulo kolong aramakinio napir kotere esi a? Kibatisao kolong esi toliworos ngirukitos a Paulo a?

¹⁴Abuakinit ayong Akuj alakara ani kolong nyibatisaa ayong esi mati Kirispo ka Gayo.

¹⁵Emam itwaan elimuni atamar kibatisakinio esi lokiro kang. (

¹⁶Kori mono ebatisae ayong tani Sitepanas ka ngitunga a awi keng nakaneni nyetamunit ayong itwaan iche ebatisae ayong.)

¹⁷ Pekameari ayong Kiristo akibatisare, kameari ayong atolimo Ngakiro Naajokak a Yesu Kiristo. Nabo, etatam ayong peegienokino ngaososio a ngitunga sodi nyeliworor akitu a Kiristo anapir ibore ni emam agogongu.

¹⁸Kainyo eraakasi ngakiro na a akitu a Kiristo anapir abaangu ani eya ngulu ebukoro. Nakaneni aniyok alu kiyuununio, eraakasi agogongu a Akuj.

¹⁹ Igiritae nagiran kona, “Enyasuni ayong aosou alukoosok nabo aree aosou alu isomato.”

²⁰Tokona bocha, nyaai tokona ni eyei ekooson ka ekesoman? Kori eketepegan lo a ngirwa kalu? Edodiu Akuj atamar erai aosou a akwap kana abaangu!

²¹Kainyo kotere aosou a Akuj, etukuruwo ngesi ngitunga a akwap akiyen ngesi a aosou kech a ngikulepek. Nakaneni, atiakuni Akuj atamar ayuuni ngitunga lu enupete a epit alo akitatam ngakiro a Akuj alo ebaasi ngikoosok erai “abangaanut”.

²²Esakete Ngiyaudi aanyungar ngakitoodikinet nakailiilok tonupeta, ani Ngigirik tasaka aosou.

²³Ani ngoni, kitatami ngakiro a Kiristo alo aramakinio napir, ngakiro na isichwangakinete Ngiyaudi nabo eraakasi abangaanut ani a ngibukui alu nyerai Ngiyaudi.

²⁴Nakaneni ani lu anyara Akuj, Ngiyaudi ka ngibukui lu nyerai Ngiyaudi aapei, eraakasi ngakiro nugu Kiristo, lo erai agogongu ka aosou a Akuj.

²⁵Kainyo ibore ni esibit abangaanut a Akuj, erai aosou na idwangit aosou a ngitunga, ani ibore ni esibit apalagu a Akuj, egogong noi idwangit agogongu a ngitunga.

²⁶Ngikaitotoi, kitamutu atamar ngirwa lu kinyarare esi, alopit alo iraakatar esi ngitunga, meere ngikaalak kus aosok kori araakasi ngikapolok.

²⁷Eyachakini Akuj toseu na ebaasi ngitunga eraakasi abangaanut sodi kisurumea ngikoosok ngileech. Aseuni nabo Akuj na itamito ngitunga a akwap atamar epalag sodi kisurumea ngileech lu ebaasi kigogong.

²⁸Aseu Akuj na ejamuarito ngitunga a akwap ka akimenyarit nabo itamito atamar eraakasi pas, sodi kinyasunea na itamito ngitunga a akwap atamar etenooko.

²⁹Eger kanguna ngesi atamar emam itwaan epedori akiwoga ani a Akuj.

³⁰Nakaneni kitiliwo Akuj esi ngipei ka Yesu Kiristo, nabo etiliwo Akuj Kiristo aosou yok, kotere ngesi, kisisil ngoni ka Akuj, atarata ngitunga a Akuj kitoyuun.

³¹ Nakaneni igiritae nagiran kona, “Itwaan cha daang ni esaki akiwoga, kiwog ani eya nguna asub Ekapolon.”