Read turkana 1 Ngikorintoi 10 Bible Online

1 Ngikorintoi 10 - turkana bible

1 Ngikorintoi 10

¹Asaki ayong esi kitamut ngikaitotoi kang ngakiro kata apaayok alu kolong arikit Musa. Ayuunit edou kesi daang sodi totenikis anam a Chamu niajokon.

²Ebatisao kesi daang toliworos ngipei ka Musa ananam ka edou ngolo.

³Apot daang kimuja akimuj napei a etau ngina.

⁴Tamata nabo tani ngakipi na etau nguna, kainyo amaase kesi anataaba ana etau kangina, ataaba ngina ngesi Kiristo elope.

⁵ Tani kikote neni, nyesuba kesi lukaalak ngakiro na ejoikinito Akuj, sodi topetakin ngawat alu atoakete ariet wadaang.

⁶Tokona, eraakasi ngakiro nugu daang ekitetemes aniyok, kitoriangakis ngoni nyikimua ngakiro naaronok loger lokolong kech,

⁷kori nyikilip ngakujo nasubuna loger lokolong elipitotor ngiche kech. Loger lo igiritere nagiran kona, “Eboikinosi ngitunga kimuja nabo tamata ani erumor tonyout kidongata emerasi.”

⁸Nyejoikinit ngoni kilomi, loger lokolong asubete ngiche kech, sodi totoaketa ngitunga ngabunge ngatomwon-arei ka ngauni akolongit apei.

⁹Nyejoikinit ngoni kiningi Ekapolon, loger lokolong asubete ngiche kech, sodi kirikasi kesi ngimunio.

¹⁰ Nyejoikinit ngoni kingurungura, loger lokolong engurunguratar ngiche kech, sodi tomunya Emalaikat a Akitu.

¹¹Asubasi ngakiro nguna daang anikech toliworos ekitetemes ani eya luche, sodi kigirae toliwor nakiteriangakinete ngoni, kainyo aaput tokona ngirwa lu esal.

¹²Itwaan cha daang ni itamit atamar awei lokojokon, ejoikinit echoikin sodi nyeedakar.

¹³Akiningo daang na ichanyut esi, ikwaan ka napalem sek ichanyunete ngitunga luche. Nakaneni irichakini Akuj akichikakinet keng, nyepedori ngesi achamakin esi kiningio akidwang na inaikinete esi. Esaa lo kiningere esi, kitaanyuni ngesi esi agogongu na ititinyikinioto, sodi kitaanyu esi erot lo ibuchunotor.

¹⁴Tokona bocha ngipaalon luminan, tojongoto akilipit ngakujo nasubuna.

¹⁵Kesuruori ayong esi loger a ngitunga alu iosok, kitemo esi ngikulepek na alimu ayong.

¹⁶Nakibuakinea ngoni Akuj alakara na kimasea emuna lo epuritoe a ekopo alo itamunitere ngaakot a Kiristo, nyikimorikin ngoni atarata ngipei a ngaakot a Kiristo a? Ani nakinyilea ngoni ngamugati, atanyama, nyikimorikin ngoni atarata ngipei a akwaan a Kiristo a?

¹⁷ Kona eraakar amugati ngina apei, kirai ngoni daang tani kilalak akwaan apei, kainyo kimori ngoni daang amugati apei.

¹⁸Kitamasi eboyor a Ngisirael, lu enyamete ngakipeyos na elemikinitae Akuj, emorikina ka ngakipeyos na ipeyokinitere Akuj.

¹⁹Esibit tokona asaki ayong atamar akuj nasubuna kori akimuj na elemikinitae ngesi, erai ibore iche ajokon a?

²⁰Mam jik! Asaki ayong alimun atamar, akipeyos na ipeyoete ngitunga lu nyerai ngikanupak, elemikinitae ngipean, meere Akuj. Nyasaki ayong esi tochamas ka ngipean.

²¹Nyipedorete esi amasea ekopo lo emasea Ekapolon sodi nabo tamaasa lo a ngipean dang, nyipedorete esi akimuj Alomeesa a Ekapolon ani nabo kimuja alomeesa a ngipean.

²² Kori kisaki robo ngoni Ekapolon Yesu kiraka etereku? Kitamit ngoni atamar kori kigogong ngoni noi kidwangit ngesi a?

²³Ibalasi esi, “Kichamakinitae sua kisubi ibore daang.” Iteni nguna, nakaneni meere ibore daang ejok. “Kichamakinitae sua kisubi ibore daang”, nakaneni meere ibore daang kingarakini.

²⁴Nyejoikinit itwaan engichit ngakiro na ejoikinito ngesi bon, nakaneni ejoikinit engichit ngakiro na ejoikinito itwaan niche.

²⁵Ipedorete esi akinyam ibore daang ni egielanario anagielet ngiboro, nyingitanarosi atamar ejok kori emam.

²⁶ Kainyo igiritae nagiran kona, “Erai akwap ka ibore daang ni eyei nakwap ika a Ekapolon.”

²⁷Ani kitepeyon esi itwaan ni nyerai ekanupan tochamut esi alosit nawi keng, tanyama ibore daang ni kiinakinio esi, warasi nyingitanarosi ngakiro ngache ani irichakinitotor anupit kus.

²⁸Nakaneni ani kilimok esi itwaan atamar, “Alemikinitae akimuj na ngakujo nasubuna,” warasi nyiinyam akimuj ngina kotere itwaan ni kilimok esi ngini ka ngakiro na eya lotau keng dang,

²⁹meere nguna atamar kotere ngakiro na eya lotai kus, pearai na eya lotau a itwaan aniche. Epedori itwaan iche alimun tama, “Nyo ketengeritotor ayong ngakiro na eya lotau a itwaan aniche akisub naasaki?

³⁰Naabuakinea ayong Akuj alakara kotere akimuj kang, nyo ketepenitor ayong itwaan niche kotere akimuj naabuakinea Akuj alakara?”

³¹Nakaneni ibore daang ni isubete esi, kerai ni inyamete kori ni imaase, tosuba daang ipuruunito Akuj.

³²Kiboyoto eboyor lo nyeyauni ngichan Loyaudi kori lobukui lu nyerai Ngiyaudi kori lotunga a ekanisa a Akuj.

³³Tosuba napei asubi ayong, asaki ayong talakar itwaan daang anakiro ana asubi, nyasaki ayong nakajoikinito ayong elope bon, asaki na ejok alotunga kadaang sodi toyuunotor kesi.