Read turkana 1 Ngikorintoi 11 Bible Online

1 Ngikorintoi 11 - turkana bible

1 Ngikorintoi 11

¹ Kirokosi eboyor kang loger lopei erokoritor ayong lo a Kiristo.

²Kepuruunit ayong esi ani kitamunitotor esi ayong ngirwa daang nabo iwapito esi ngakiro nakolong ketatami ayong esi.

³Nakaneni asaki ayong esi toyena atamar epolokinit Kiristo itwaan daang, epolokinit ekile aberu keng, nabo epolokinit Akuj Kiristo.

⁴Nakaneni ekile daang lo ilipi kori iruoro ngakiro a Akuj enapit ibore anakou, imenyarit Kiristo.

⁵Ani aberu na ilipi kori iruoro ngakiro a Akuj emam ibore enapit anakou, imenyarit ekile keng. Emam ibore etiakit ngesi ka aberu na ebanyaritae ngitim.

⁶Ani pekenap aberu ibore anakou, esibit ejok tani ebanyari ngitim keng. Ani kona eronia aberu ebanyi akou keng kori echudari ngitim keng, ejoikinit enapi ibore anakou keng.

⁷Nyejoikinit ekile enapi ibore anakou keng kainyo erai ngesi ekisikwaane a Akuj nabo isileereunit ekipur a Akuj. Nakaneni aberu isileereunit ekipur a ekile,

⁸kainyo peasubunio kolong ekile anaberu, nakaneni aberu asubunio alokile.

⁹Kori peasubunio ekile kotere aberu, pearai aberu asubunio kotere ekile.

¹⁰Ejoikinit aberu enapi ibore anakou kotere ni epolokinitor ekile keng, nabo kotere ngimalaikae dang.

¹¹Ani kaneni dang, alongaren Ekapolon Yesu, igieno aberu ekile nabo igieno ekile aberu.

¹² Loger lokolong asubunere aberu alokile, aloger alopei kangolo, aberu idouni ekile, nakaneni erai Akuj eyakar ibore daang.

¹³Totiakutu esi ngikulepek kejok aberu ilipi Akuj emam ibore enapit anakou.

¹⁴Ikwa nyikiyeni tani ngoni sek atamar epenikinito ekile ngitim lu kooyak a?

¹⁵Nakaneni isibusito aberu ngitim lukooyak. Etooyae Akuj ngitim keng toliworos kesi erapito akwaan keng.

¹⁶Nakaneni ani keyei itwaan ni epega ngakiro nugu, daang na apedori alimun ngesi na abala emam sua kori ngitunga a ngikanisae a Akuj ngitalio ngiche anakilip.

¹⁷Ani anakiro ana tokona alimuni kanu, nyekepuruuni ayong esi. Nyekepuruuni ayong esi kainyo eroko ngakiro na esubeenete ngitunga a ngikanisae kus na iriamiriameta.

¹⁸Akiroit na a ekingaren, kalimokin ayong atamar nairiameta esi, itiakanasi esi ipegasi. Anupit ayong atamar epewae a ngakiro kanguna eraakasi iteni. (

¹⁹Ayeni ayong dir atamar ejoikinit atiakatiaka eyei nikus sodi tatakanuuneta lu etenooko.)

²⁰Nairiameta esi wapei, meere akimuj a Ekapolon inyamete esi.

²¹Kainyo na imujeta esi, elomakini itwaan daang akinyam akimuj keng, sodi tanyam ngiche akoro, kirakarito ngiche epurot.

²²Emam esi ngawiyei kus na imujeta nabo tamaasa a? Kori kijoikinit esi akimenyar ngitunga a ekanisa a Akuj nabo kisuruma lu emam ibore etingito ngileech? Anu isakete esi ayong katolimok esi anakiro kanguna? Ejoikinit ayong kepuruuni esi a? Mam jik!

²³Kainyo aanyuni kolong ayong ani Ekapolon Yesu ngakitatamet nakalimokini ayong esi, na atamar na arikokinere Ekapolon Yesu ngitunga, abu tolem amugati,

²⁴tobuak Akuj alakara, tonyil, sodi tama, “Akwaan kang naga, na erai akus. Kikwaanakisi nege kitamunito ayong.”

²⁵ Aloger alopei kangolo, naarumoreta akinyam akimuj, tolem ekopo sodi tama, “Erai ekopo lo achamunet a Akuj nakitetet na eyookin a ngaakot kang. Nacha imaasa esi, tamaseta kitamunitotor ayong.”

²⁶Idodiunit ibore ngini atamar esaa daang lo inyameta esi amugati naga nabo tamaasa ekopo lo, ilimorito esi akitu a Ekapolon Yesu tanang na ebunio ngesi.

²⁷Kongina bocha, ani kenyam itwaan idio amugati a Ekapolon kori kemasea ekopo keng a eger alo ejamuaritor Ekapolon, asechaki ngesi akwaan a Ekapolon ka ngaakot keng.

²⁸Tokona bocha, ejoikinit itwaan daang iningo mono ilope bon, ani erumor tanyam amugati nabo tamasea ekopo.

²⁹Kainyo ani kenyam ngesi amugati kori kemasea ekopo eringa nyeyena lokojokon eger a akwaan a Ekapolon Yesu, isichanyuna ngesi bon ilope eriras na enyamea amugati, tamasea ekopo.

³⁰Ngakiro nguna ngesi epalagageta ngikaalak kus, todeakas, nabo atoaka ngiche kus.

³¹Arai eningos ngoni make, pekichanyu eriras a Akuj.

³²Nakaneni na kiriraa ngoni Ekapolon Yesu, kitatamio ngoni atojokearator, sodi nyikirirae ngoni ka ngitunga lu nyerai ngikanupak aapei.

³³Tokona bocha ngikaitotoi kang, nairiamiriameta esi akinyam akimuj a Ekapolon Yesu, kidarunos daang.

³⁴Ani keyei itwaan ni enyamit akoro, ejoikinit ngesi imuji anawi sodi nyiichanyut esi eriras a Akuj na iriamiriameta. Ani ngakiro nache, kesisakini ayong esi nakiriamiriamea.