Read turkana 1 Ngikorintoi 12 Bible Online

1 Ngikorintoi 12 - turkana bible

1 Ngikorintoi 12

¹Asaki tokona ayong atachun ngakiro nakolong igirito esi kotere ngainakinet a Etau a Akuj. Asaki ayong esi toyena ngakiro nugu lokojokon ngikaitotoi kang.

²Iyenete esi atamar kolong eringa esi nyeliworo ngikanupak, ibatara esi lokojokon ilipito ngakujo nasubuna na nyeyarete.

³ Nakaneni toyena atamar emam itwaan anikus ni erikit Etau a Akuj ni elimuni tama, “Kilamae Yesu!” nabo emam itwaan elimuni tama, “Yesu erai Ekapolon,” erai pekerikit ngesi Etau a Akuj.

⁴Egelagela ngainakinet a Etau a Akuj, nakaneni erai Etau epei lo ipotonori.

⁵Egelagela ngirotin lusubet etich, nakaneni Ekapolon epei ngesi esubio etich keng.

⁶Egelagela ngirotin lu kisubea ngoni etich, nakaneni erai Akuj apei na itaanyuni itwaan daang aosou kotere etich ngolo.

⁷Etakanuuni ayakau a Etau a Akuj anitwaan a erot a echegela, kingarakinea luche daang.

⁸Elimokini Etau a Akuj itwaan ipei ngakiro na a aosou, ani niche tolimok ngakiro na a achwaanu, loger lo echamitor Etau lopei ngolo.

⁹Etau lopei ngolo, itiliwori itwaan ipei ikanupan, sodi kitaanyu itwaan niche agogongu na itojokea ngikadeakak.

¹⁰Itaanyuni itwaan ipei agogongu na esubea ngakitoodikinet nakailiilok, kitaanyu iche agogongu nairuoror ngakiro a Akuj, kitaanyu iche agogongu na etiakunea ngainakinet na eraakasi ngaka a Etau a Akuj ka na nyerai ngaka a Etau a Akuj. Kitaanyu iche agogongu nairuoror ngabukui nagelayek, ani iche kitaanyu aosou na isisaunea eger a ngabukui kanguna.

¹¹Nakaneni erai Etau lopei ngolo ngesi esubi nguna daang, loger lo esaki ngesi, itaanyuni ngesi itwaan daang ainakinet nagela.

¹²Ikoni Kiristo akwaan na elalak nginerin, erai ngesi akwaan apei tani kelalak nginerin.

¹³ Aloger alopei kangolo, ngoni daang, kirai Ngiyaudi kori ngibukui lu nyerai Ngiyaudi, kirai ngirikon kori ngitunga lu nyikienitae, kibatisak Etau nakwaan apei, nabo kikok ngoni lu kitamas Etau lopei ngolo.

¹⁴Kainyo meere ekinier epei bon eyei nakwaan, nakaneni elalak nginerin.

¹⁵Arai kolong tolimuni akeju tama, “Kona nyaraakar ayong akan, meere ayong ngipei ka akwaan,” pekiratak ibore ngini ngesi aliwor ekinier a akwaan.

¹⁶Ani arai tolim akit tama, “Kona nyaraakar ayong akongu, meere ayong ngipei ka akwaan,” pekiratak ibore ngini ngesi aliwor ekinier a akwaan.

¹⁷Arai tarai akwaan daang akongu bon, kikok iirari ai? Nabo arai tarai akit bon, kikok inguuni ai?

¹⁸Nakaneni bocha tokona, ewaakini Akuj ekinier daang nakwaan loger lo asakitor ngesi.

¹⁹Kemam akwaan eyei arai kolong tarai wadaang ekinier epei!

²⁰Nakaneni bocha tokona, eya nginerin lukaalak tarai akwaan apei.

²¹Nakaneni nyelimokini akongu akan tama, “Nyakasaki ayong iyong!” Kori nyelimokini akou ngakejen tama, “Nyakasaki ayong esi!”

²²Eya daang, nyesubi akwaan etich emam nginerin a akwaan lu kimenit ngoni kibala epalag.

²³Kichoikinit ngoni noi nginerin lu emenitae, ani nginerin luche luajokak noi erichutu lokojokon noi,

²⁴akidwang nginerin luche. Nakaneni asubi kolong Akuj akwaan lokojokon sodi torimare tani nginerin a akwaan lu ipasakinitae,

²⁵tongopea eger lo esibitor akwaan etiakatiaka, nakaneni erukito nginerin keng daang aapei ingaranakin.

²⁶ Naepipilearor epewae a akwaan, epipilearosi nginerin luche dang ka ngesi aapei. Ani kipuruun ekinier epei, ipuruunio nginerin luche dang ka ngesi aapei.

²⁷Iraakasi esi daang akwaan a Kiristo, nabo erai ipei daang ekinier a akwaan kangina.

²⁸Alokanisa a ngitunga a Akuj, ewaak Akuj daang wapei: Mono ekingaren ngimeanara, lu a ngiarei ngikadwarak a Akuj, lua nguuni, ngiketatamak, ka ngulu esubete ngakitoodikinet nakailiilok, kiwaput lu eyei agogongu na itojoketa ngikadeakak kori akingarakin luche kori akirik luche kori akiruor a ngabukui anagelayek.

²⁹Nyeliworosi daang ngimeanara kori ngikadwarak a Akuj kori ngiketatamak. Meere itwaan daang eyei agogongu na esubea ngakitoodikinet nakailiilok

³⁰kori akitojok ngidekesinei kori akiruor ngabukui nagelayek kori akisisaun eger a ngabukui kanguna.

³¹Tominakisi noi ngainakinet natenoik. Nakaneni, kedodikini tokona ayong esi erot lo ejok noi.