Read turkana 1 Ngikorintoi 13 Bible Online

1 Ngikorintoi 13 - turkana bible

1 Ngikorintoi 13

¹Apedori ayong akiruor ngabukui a ngitunga ka na a ngimalaikae dang, ani kemam ayong amina, ekoni ayong ibore ni eruo pas loger a ekaadongot.

²Nabo, apedori ayong aanyun ainakinet na eruoror akiroit a Akuj niajokon noi, atoyen ngakiro na imunonitae daang ka ibore daang. Apedori ayong aanyun anupit daang na esiyotokinio ngimoru, nakaneni ani kemam ayong amina, arai ayong pas.

³ Apedori ayong akipotor ibore daang ni atingit, nabo atacham tani akwaan kang inomio, nakaneni ani kemam ayong amina, emam naajokak aanyuni ayong.

⁴Etitiny amina tapatana, emam amina etereku ka ngiwog kori ekinis,

⁵nyesubi amina ngakiro na a ngileech kori nyerorokana kori nyengoyeene atipei, nyimari amina ngakiro naaronok.

⁶Nyelakar amina kotere naaronok nakaneni elakar kotere ngakiro na a iteni.

⁷Imuki amina ngakiro daang, enupi ngakiro daang, igienokin ngakiro daang nabo etitinyikini ngakiro daang.

⁸Nyesaluni amina. Epalikinio ngainakinet na edwarere ngakiro. Etuborosi ngainakinet nakiruoret ngabukui nagelayek. Engopiyarete ngainakinet na a aosou.

⁹Kainyo kiyeni ngoni epewae a aosou atodwarete ngakiro epewae,

¹⁰nakaneni ani ebuni ibore ni ikiuna, tongopia ni erai epewae.

¹¹Nakolong araakar ayong ikoku, eruoro ayong nikoku, ayeni ngakiro nikoku, nabo etami ngakiro loger a ikoku. Ani kona tokona araunea itwaan apolon, apalik ayong ngakiro a ekiditeu.

¹²Ikoni tokona ibore ni kitee ngoni etorube lo emuimui inwakunit akiyo, na enangea ngirwa ngulu, kianyungari ngoni ngesi a ngakonyen yok. Ayeni tokona ayong ngakiro epewae make, na enangea ngirwa ngulu, ayenuni daang, loger lo eyenea Akuj ngakiro kang daang.

¹³Ani ngirwa lu tokona lugu, erubakinete nauni nugu eya, anupit ka akigieno ta amina, nakaneni na etenoono kanguna kadaang ngesi amina.