Read turkana 1 Ngikorintoi 14 Bible Online

1 Ngikorintoi 14 - turkana bible

1 Ngikorintoi 14

¹Erai amina ejoikinit esi isakete noi. Kimiekisi ngainakinet a Etau kimua esi lokojokon, tarai noi ainakinet na edwarere akiroit a Akuj.

²Itwaan ni edwari a ngabukui anagelayek, nyisuruori ngitunga luche, erai Akuj isuruori, kainyo emam itwaan eyeni ngakiro nairuoro ngesi. Iruoro ngesi ngakiro na iteni namunonoe, a agogongu a Etau a Akuj.

³Nakaneni ni edwari ngakiro a Akuj, isuruori ngitunga ingarakinit ka akitogogong ta akisiengun.

⁴Itwaan ni edwari ngabukui nagelayek, ingarakina bon, nakaneni ni iruoro ngakiro a Akuj, ingarakinit ngitunga a ekanisa daang.

⁵Asaki ayong esi daang kiruoro a ngabukui anagelayek, nakaneni ejok noi ianyunete esi ainakinet na idwareta ngakiro a Akuj. Kainyo itwaan ni iruoro ngakiro a Akuj, ejok noi idwangit ni iruoro ngabukui nagelayek, mati keyei itwaan ni ikobuni ngakiro a ngabukui kanguna, sodi kingarakinere ngitunga daang a ekanisa.

⁶Tokona ngikaitotoi a, nyo niajokon ianyunete esi erai kabu ayong nikus eruor a ngabukui anagelayek? Emam jik ibore ajokon, mati robo kedodik ayong esi akidodiunet a Akuj kori aosou kori ngakiro a Akuj na edwaritae kori akitatamet.

⁷Kitemo mono cha iyong ngakiro a ngiboro a ngiche alu ikote ebune kori agita, ikokini itwaan iropori eeos erai pekitenun eruye lokojokon ai?

⁸Ani pekekutaki eketuruon aburuch lokojokon, ngae elemuni ngiboro a ejie?

⁹Aloger alopei kangolo, ikokini itwaan eyenuni ngakiro na iruoro iyong ai, erai pekileerete ngakiro nairuoro iyong a ngabukui anagelayek? Engopikinete ngakiro kus lokuwam!

¹⁰Elalak ngabukui anakwap, nakaneni emam ngabukui na nyeya eger kech.

¹¹Nakaneni ani napenyayenea ayong ngabukui na iruoroe, eliwor itwaan ni iruoro itwaan nigela anikang atoliwor ayong itwaan nigela anikeng.

¹²Ani kona kimuitor esi aanyun ngainakinet a Etau a Akuj, ejoikinit esi irichakinosi noi akingarakin lu elemuna akingarakin ngitunga a ekanisa a Akuj.

¹³Itwaan ni iruoro a ngabukui anagelayek, ejoikinit robo ilipa ainakinet na isisaunea nguna iruoro ngesi.

¹⁴Kainyo ani kelip ayong loger ngolo, ilipit cha dir etau kang, nakaneni nyimorikina ka ngitamen kang.

¹⁵Ejoikinit tokona ayong ekokini ai? Elipi ayong a etau kang, nakaneni elipi nabo a ngitamen kang. Aeokini ayong a etau kang, nakaneni aeokini tani a ngitamen kang.

¹⁶Naibuakinea iyong Akuj alakara a etau bon, ikokini itwaan niche ni eyei lokiriam ngolo elimuni tama, “Aamen” anakilip ana ibuakinitor iyong Akuj alakara kangina ai? Emam ngesi kona eyeni nguna iruoro iyong.

¹⁷Tani kejok akilip na ibuakinitor iyong Akuj alakara, nyingarakinit itwaan niche ngini jik.

¹⁸Abuakinit ayong Akuj alakara ani eruoror a ngabukui anagelayek akidwang esi daang.

¹⁹Nakaneni ani nailipitere Akuj, ejoikinit ayong eruoro ngakiro ngakan na eyenio, sodi etatamea luche, akidwang akiruor ngakiro ngabunge a ngabukui anagelayek.

²⁰Nyiikokis ngide alotamen kus ngikaitotoi kang. Kikokisi ngide anakiro anaaronok, nakaneni toliworos ngitunga luapolok alotamen kus.

²¹ Igiritae nagiran kona, “Ebala Ekapolon, alotunga alu iruorosi ngabukui nagelayek, anakituk a ngitunga a akwap a ache, esuruori ayong ngitunga lugu nakaneni nyepupokinete ngitunga ngakiro kang.”

²²Tokona bocha, ainakinet na iruorore ngabukui nagelayek, eraakasi ngakiro na idodikinitae lu nyerai ngikanupak, meere ngikanupak. Erai ainakinet na iruorore ngakiro a Akuj aka ngikanupak, meere aka lu nyerai ngikanupak.

²³Ani tokona kiriamariam ngitunga a ekanisa daang wapei tolomakis akiruor ngabukui nagelayek, sodi tolomut ngitunga ngiche, kori lu nyerai ngikanupak, ikwa nyetamarete kesi kikeripikinit esi a?

²⁴Nakaneni ani kiruoro itwaan daang ngakiro a Akuj na elomunea itwaan iche ni nyerai ekanupan kori ni nyitatamitae ngakiro a Akuj, echamuni ngesi atamar arai ekasechan kotere ngakiro na iirari. Iriraate ngesi ngakiro daang na iirari,

²⁵isileereunio ngitamen keng lumunonoe daang, sodi toriedik ngesi ilipit Akuj tama, “Iteni dir eyei Akuj nege kirukit ka ngoni!”

²⁶Ngikaitotoi kang, abala ayong nege. Nairiameta esi akilip, eyei itwaan iche eeos, eyei iche akitatamet, iche akidodiunet a Akuj, iche ngakiro a ngabukui anagelayek, ani nabo iche akilokony na iruoroe. Ejoikinit ibore daang ni esubio erai ni ingarakini ngitunga a ekanisa.

²⁷Ani keya ngitunga lu iruorosi a ngabukui anagelayek, echamit eraakasi ngiarei kori nguuni make iruorosi, tolim ipei ani erumor totupak niche, sodi kisisau nabo itwaan iche nairuoroe.

²⁸Nakaneni ani kemam itwaan ni isisauni, ejoikinit itwaan ni iruoro a ngabukui anagelayek ililingi chek sodi kiruoro ka Akuj keng make.

²⁹Ejoikinit ngiarei kori nguuni lu aanyut akiroit a Akuj iruorosi sodi kitemo luche na iruorosi kesi.

³⁰Nakaneni ani keanyu itwaan ni eyei lokiriam akiroit a Akuj, ejoikinit itwaan ni iruoro ililingi.

³¹Kainyo ipedorete esi daang akiruor ngakiro a Akuj, tolim ipei ani erumor totupak niche, sodi kitatamar itwaan daang kingarakinor.

³²Ainakinet nakiruoret ngakiro a Akuj, ejoikinit eweikinit itwaan ni eyei ainakinet ngina,

³³kainyo nyesaki Akuj ngoni apena lokurikur, esaki atopupos nabo esilito. Loger a ngitunga a Akuj kadaang alu a ngikanisae,

³⁴ejoikinit ngaberu ililingete chek alokiriam. Nyechamakinitae kesi iruorosi, loger lo engeritere kesi Alotal a Ngiyaudi eliworosi ngakapolok.

³⁵Ani keya ngakiro na esakete kesi akiyen, ejoikinit ingitunete alokiliok kech anawiyei. Erai ekiruor a aberu alokanisa ibore a ngileech.

³⁶Kori itamito robo esi atamar ebunit akiroit a Akuj anikus? Kori erai kolong esi make ebunitor?

³⁷Ani kitamit itwaan atamar arai ngesi emeuna a Akuj kori aanyunit ainakinet a Etau, ejoikinit eyeni atamar erai nakegirak ayong esi na edungunit Ekapolon.

³⁸Ani kewou ngesi akiirar nugu, nyiirasi esi dang nakeng.

³⁹Tokona bocha ngikaitotoi, ejoikinit esi kimui akiruor akiroit a Akuj, nakaneni nyiitenger itwaan akiruor ngabukui nagelayek.

⁴⁰Ejoikinit ibore daang esubio alorot aloajokon alo eriyan.