Read turkana 1 Ngikorintoi 15 Bible Online

1 Ngikorintoi 15 - turkana bible

1 Ngikorintoi 15

¹Asaki tokona ayong ngikaitotoi kang akisitamun esi Ngakiro Naajokak nakolong ketatami, dio tachamut esi nabo erai tokona ni ewaar anupit kus neni.

² Ngakiro Naajokak a Yesu Kiristo ketatami ayong esi ngesi nguna. Kiyuunete esi Ngakiro Naajokak nguna erai kirubakis esi inupito, ngaye robo kerai kolong anupit kus apasit.

³Abu ayong kesiporok esi nguna atenooko noi na aanyuni ayong, atamar atoani Kiristo kotere ngasechesea yok, kona igiritere nagiran,

⁴atamar tonukae ngesi nabo kiteyarunae adaunet a ngirwa a nguuni, kona igiritere nagiran atamar,

⁵atakanuuni ngesi ani a Petero ani erumor tatakanu alomeanara alutomon ka ngiarei.

⁶Sodi tatakanu ngesi atipei alorukitos keng alu idwangito ngamiae ngakan. Eringa ngikaalak kech eyarete, tani bo ketoakito ngiche dang.

⁷ Sodi tatakanu ngesi ani a Yakobo ani ekisidi tatakanu ani eya ngimeanara daang.

⁸Ani ekisidi kadaang tatakanu ngesi tani anikang, alo ekoni itwaan ni edounio eringa ngirwa lukidounet nyitemokino.

⁹Kainyo arai ayong loochi noi alomeanara, nyejoikina tani kanyarao emeanara, kainyo aboliar kolong ayong ngitunga a ekanisa a Akuj.

¹⁰Nakaneni arai ayong itwaan ni arai kotere ajokis a Akuj, nakaneni pearai ajokis nakeng ngina anikang aka pas. Ani kikote neni dang, asub ayong etich lokojokon noi akidwang ngimeanara luche daang, nyerai ayong elope asubi nguna bon, nakaneni arai ajokis a Akuj ketusubi ayong kongina.

¹¹Tokona bocha, keraakasi kesi etatamete kori ayong, nguna kesi kitatami sua daang nabo kesi inupito esi.

¹²Ani kona tokona itatamere atamar ayaru Kiristo anakitu, ikokinete ngiche kus ebaasi abe nyeyarunete ngikatoak ai?

¹³Ani keraakasi nguna iteni, idodiunit ibore ngini atamar nyiteyaruna kolong Kiristo.

¹⁴Ani pekiteyarunitae kolong Kiristo, eraakasi ngakiro na kitatami sua ngapasiek nabo erai anupit kus dang apasit.

¹⁵Kanguna kadaang, kiliwor sua ani a Akuj ngitunga lu kiruoro alioko kainyo alimuni ngesi atamar eteyaru Kiristo, nakaneni ani kerai iteni atamar nyeyarunete ngikatoak, ikwa nyiteyarunit ngesi Kiristo.

¹⁶Kainyo ani pekiteyarunio ngikatoak, ikwa nyiteyarunitae tani Kiristo.

¹⁷Ani pekiteyarunitae Kiristo, erai anupit kus apasit nabo eringa asechanu eyei nikus.

¹⁸Idodiuni ibore ngini dang atamar ebukoro ngikanupak daang lu atoaka.

¹⁹Ani kerai kigienor ngoni Kiristo akiyar a ngirwa kalu make, ejok ngoni kitasenokin noi akidwang itwaan daang anakwap.

²⁰Nakaneni ngakiro na iteni ngesi na atamar eteyarun Kiristo sodi kidodiun dir atamar iteyarunio tani lu atoaka.

²¹Kona etorunio akitu nitwaan, loger lopei ngolo, itoruni akiteyaruno nitwaan.

²²Kona etoaketa ngitunga daang ani eraakatar ngipei ka Adam, aloger alopei kangolo, eyarunete daang ani eraakatar ngipei ka Kiristo.

²³Nakaneni iteyarunio itwaan daang alopit keng, isiauni mono Kiristo, ani ngirwa lu ebunio ngesi, toyarut lu eraakasi ngikeng.

²⁴Ani na enangea esal, ebuakini Kiristo Akuj Apa apolou erai kinyasu mono ngesi arikoru daang ka ngapolosio ta agogongu a arieng kadaang.

²⁵Kainyo echamit Kiristo epolokini tanang ni iwaakinea Akuj ngimoe daang kwap nakejen keng, toreu ngesi.

²⁶Emoit lo esal idwangio ngesi akitu.

²⁷Kainyo igiritae nagiran kona, “Ewaakini Akuj ngiboro daang kwap nakejen keng.” Ileerete nguna dir atamar ngakiro be “ngiboro daang” nyimarunito Akuj alope, na iwaakini ngiboro daang kwap Kiristo.

²⁸ Nakaneni na elemunere ngiboro daang topolok Kiristo, ani ngesi elope, Lokookeng a Akuj, iwaakin kwap Akuj, nakolong ewaakini ngiboro daang kwap keng, sodi topolok Akuj daang.

²⁹Ani kemam ayarun a, nyo igienosi ngitunga lu ibatisao a ngirora a ngikatoak aanyun? Ani pekeyarunete ngiche iteni dir loger lo ebalatar ngiche, nyo ibatisaare ngitunga ngulu a ngirora a ngikatoak?

³⁰Ani bo ngoni a, nyo kikonea ngoni esaa daang ngitunga lu ekotoi akiwan?

³¹Ngikaitotoi kang, ekotoi ayong akiar jiik! Ekinis lo kenisar ayong esi ani kiraakar ngipei ani a Yesu Kiristo Ekapolon yok, kesi ketilimunito ayong nugu.

³² Arai kolong etijite ayong “Ngitieng a moding” kane alo Epeso kotere etereku a ngitunga, kerai nyo aanyunit ayong? Nakaneni ani pekiteyarunio ngikatoak, kimiekisi robo kikokis eger lo elimunitere a ngakisikwaanet kona, “Kimiekisi emuja nabo atamata, kainyo kitoaki moi.”

³³Warasi nyikingalae, “Inyasunete ngirukitos luaronok itwaan niajokon”.

³⁴Kikokisi ngitunga lu iriangut ajoketa ngakies, sodi tapalikis ngasechesea. Alimuni ayong ngakiro na kisurumete esi ngileech atamar nyeyenete ngiche kus Akuj.

³⁵Ingita itwaan iche tama, “Ikokinete ngikatoak eyarunete ai? Epete kesi ngawat nayesiyek ai?”

³⁶Atige ekabangabangat! Naitakinea iyong ekinyamit, ani peketoana mono, nyerupuni.

³⁷Erai ibore ni itakini iyong ekinyamit, kerai ta lo a ngakanoi kori ekinyamit eche, nyikoni ekitoe lo erupuni ekisidi.

³⁸Einakini Akuj ekinyamit ngolo akwaan na esaki ngesi alope, eanyuni ekinyamit daang akwaan keng a elope.

³⁹Meere ngawat a ngiborei kadaang ngapei. Eraakasi ngawat a ngitunga ngapei, eraakasi na a ngitieng ngapei, eraakasi na a ngikieny ngapei nabo na a ngikolia dang eraakasi ngapei.

⁴⁰Eya ngawat na alokidiama ka ngawat na alokwap. Akibuseanu na erai aka ngawat ana alokidiama, etiakak ka na a angawat ana a alokwap.

⁴¹ Egeal akibuseanu a akolong, egeal akibuseanu a elap, egeal akibuseanu a ngikanyer, ani ngikanyer make, etiakatiaka akibuseanu kech.

⁴²Ikokinete ngakiro neni na eyaruneta ngikatoak. Enukio akwaan erai ibore ni inyasun, ani na iteyarunere nyinyasun.

⁴³Enukio akwaan erono, kiteyarunae ibus.

⁴⁴Na enukere erai akwaan na a nginerin, na iteyarunere, erai akwaan na a etau. Ani kona eyakar akwaan na a nginerin, eyei tani akwaan na a etau.

⁴⁵Kainyo igiritae nagiran kona, “Asubunio Adam itwaan nia ekingaren eyari”, nakaneni Adam lo esal lo eyari ngesi Etau a Akuj lo kitaanyuni akiyar.

⁴⁶Nakaneni meere akwaan na a etau isiauni kingareniu, nakaneni na a nginerin isiauni ani erumor totupuu na a etau.

⁴⁷Adam lo ekingaren lo asubunio analup, abuni analup. Abuni Adam lo a ngiarei anadis.

⁴⁸Ngitunga lu eraakasi ngika ngalup, ikote lo asubunio analup. Ngitunga lu eraakasi ngika a adis ikote lo abuni anadis.

⁴⁹Loger lo kikwaanea ngoni ka itwaan ni asubunio analup, kikwaanikin ngoni tani ka Itwaan ni ebuni anadis.

⁵⁰ Tokona ngikaitotoi, ngakiro na asaki ayong alimun ngesi na abala, ibore nikolong etoruni nakwaan ka ngaakot, nyirumi Apolou a Akuj, ani ni inyasun, nyirumi ni nyinyasun.

⁵¹Topupokisi katolimok ngakiro na imunonitae na eraakasi ngaka iteni nugu, nyikitoaki ngoni daang, erai kilochio ngoni daang

⁵²atipei loger lo irwapakinea akongu, na ekutakinere aburuch na a esal. Kainyo na erukinio aburuch, iteyarunio ngikatoak a ngawat ana nyetoakete nabo sodi kiloch ngoni.

⁵³Kainyo ejoikinit ibore ni inyasun ilochio toliwor ni nyinyasun, akwaan na etoani, ejoikinit ilochio toliwor na nyetoani.

⁵⁴ Nakaneni na ikokineta ngakiro neni, toliwor elocho ni inyasun aliwor ni nyinyasun, sodi kiyookin ngagiran na igiritae kona, “Enyasun akitu epiun arumor!”

⁵⁵ “Kipiun tokona iyong akitu. Emam iyong agogongu na ipedorea akiwan itwaan.”

⁵⁶Eanyuni akitu agogongu keng na kiwanea ani a akisech, sodi taanyu akisech agogongu keng alotal.

⁵⁷Nakaneni kibuakini Akuj na kisipiuni ngoni alakara ani a Ekapolon Yesu Kiristo!

⁵⁸Tokona bocha ngikaitotoi kang luminan, torubakisi itionikinito ngakiro daang. Kirichakinos tosuba etich a Ekapolon iyenete atamar nyeliwor etich a Ekapolon lo isubete esi eka pas.