Read turkana 1 Ngikorintoi 16 Bible Online

1 Ngikorintoi 16 - turkana bible

1 Ngikorintoi 16

¹Anakiro ana kolong kigirakinitae esi kotere ngaropiyae na edekio akingarakinea ngitunga lua akwap a Yudea, ejoikinit esi isubete naalimokini ayong ngitunga a ngikanisae a akwap a Galatia atamar tosuba.

²Akolongit a Jumapili daang, ejoikinit ipei kus daang ikachakini ngaropiyae ngadi itemem ka ngaropiyae na enyami ngesi, sodi nyeelemere ngaropiyae naabunio ayong.

³Naabunio ayong, ainakini ayong ngitunga lu iseut esi ngabaruae na eyaareta ngalemunet nguna Yerusalem.

⁴ Ani kejoikinit ayong dang alosi, kirukori ayong ka kesi.

⁵Abuni ayong nikus erai ketor mono Makedonia, keburakinit akitor Makedonia.

⁶Kori kiruki ayong ka esi a ngirwa a ngiche, kori tani kiruki aapei ngirwa daang lu a aibach. Ani erumor kingarakis esi ayong atolot ni cha alosi.

⁷ Nyasaki ayong akitorun nikus ekirikira epor atolot wache. Asakit akiruk ka esi wadio erai kachamaki Ekapolon Yesu.

⁸Nakaneni ebooyi ayong kane alo Epeso tanang akolongit na Pentekost.

⁹ Elolom nege noi kotere etich loajokon lo asubi ayong, nakaneni elalak bo tani ngiketepegak.

¹⁰Ani kebu Timoteo nikus, tochoikisi nyichanakin na irukitotor ka esi kainyo esubi etich a Ekapolon loger kang.

¹¹ Nakaneni nyejoikinit eyei itwaan ni imenyarit ngesi. Ejoikinit ingarakinete ngesi analotoru keng niajokon sodi tobongunio ni ayei ayong. Kainyo edarit ayong ngesi ka ngikaitotoi yok aapei.

¹²Ani lokaatoyok Apolo, emaima ayong ngesi noi abala kirukut ka ngikaitotoi luche nikus, nakaneni nyesaki ngesi abunere tokona, nakaneni ebuni ngesi erai kemin kona ebuni.

¹³Tochoikinos, torubakisi inupito, totitinyeketo nabo togogongioto.

¹⁴ Tosuba ibore ni isubete daang a amina.

¹⁵Iyenete esi ngakiro a Sitepanas ka ngitunga a awi keng, kesi eraakasi ngikiristoi lu a ekingaren alo Akaya nabo alemun kesi akingarakin ngitunga a Akuj. Kemaimai ayong esi ngikaitotoi kang atamar,

¹⁶kiwapa arikoru a ngitunga alu ikote ngulu, nabo ka itwaan niche daang ni esubi etich ka kesi aapei.

¹⁷Alakara ayong noi ani aponeta Sitepanas ka Porutanato ta Akaiko. Etemokis kesi na adikino esi isubakinete,

¹⁸ nabo ilakarosi esi kotere kesi loger lo alakaror ayong kotere kesi. Ejoikinit kitamunit ngitunga lu ikote lugu.

¹⁹Kimalaate esi ngitunga a ekanisa daang lu eya Asia. Akula ka Prisila ka ngikiristoi daang lu eya nawi kech, kimalaate esi lokojokon.

²⁰Kimalaate ngikaitotoi daang. Kimalas esi make inuanakinosi a aminanu.

²¹Egiri ayong nugu a akan kang a ilope! Kimalae Paulo.

²²Ilamam itwaan cha daang ni nyemina Ekapolon! Marana ta, Ekapolon kosi, bua!

²³Kimiekisi ajokis a Ekapolon Yesu kiruko ka esi.

²⁴Kiruko daang ka amina kang ani a Yesu Kiristo.