Read turkana 1 Ngikorintoi 2 Bible Online

1 Ngikorintoi 2 - turkana bible

1 Ngikorintoi 2

¹Ngikaitotoi kang, nakolong abunio nikus akitatam esi ngakiro na iteni namunonoe a Akuj, peeruoro ayong achii ngakiro a epit aloajokon kori a aosou.

²Kainyo etusubun ayong anikus emam ibore ayeni, mati akiyen Kiristo bon lokolong aramakinio napir.

³Nakolong kirukitor ayong ka esi, apalag ayong nabo amarani lokojokon noi aemit,

⁴ngakiro naalimorit ayong ka na etatami ngitunga, peeruoro ayong a epit alo echiere ngakiro a aosou, araakasi ngakitatamet nguna na edodiunit Akuj atamar eraakasi na iteni a ngakitoodikinet anakaalak ka agogongu a Etau a Akuj.

⁵ Ekokini ayong neni sodi kigienokinotor esi ananupit kus agogongu a Akuj, meere aosou a ngitunga.

⁶Tani kikote neni, esuruori ayong lu ikiuna dir ananupit kech ngakiro na aosou, nakaneni meere aosou ngina na a akwap kana, kori meere tani ngaka ngikapolok a akwap kana, ngapolon na engopiari apolou kech.

⁷Aosou naalimorit ayong ngesi aosou a Akuj na imunonitae eweitae alotunga, nakaneni aseuni kolong ngesi eringa tani akwap nyesubuna, toliwor na kipuruunitere ngoni.

⁸Emam ngikapolok lua ngakwapea kanu lu ayenete ngakiro a aosou kangina. Arai kolong toyenete kesi, pekeramakinito Ekapolon a ekipur napir.

⁹ Nakaneni, ikote nguna eger lo igiritere nagiran kona, “Ngakiro nakolong nyeanyungara akongu a ache kori nyiirara akit, ngakiro na nyimuito etau a itwaan, nguna ngesi asubaki Akuj kotere lu eminasi ngesi.”

¹⁰Nakaneni erai ngoni ngesi kiteyenuni Akuj ngakiro namunonoe, kotere Etau keng. Ingichingichi Etau ngakiro daang, tani ngakiro a Akuj na iweitae lokojokon.

¹¹Kona eraakar itwaan etau keng a ilope eyeni ngakiro keng, loger lopei ngolo, Etau a Akuj bon ngesi eyeni ngakiro a Akuj.

¹²Nyeanyuna kolong ngoni etau a akwap kana, erai kianyuni ngoni Etau lo abuni ani a Akuj sodi kitoyenea Etau ngolo ngoni nakitaanyu ngoni Akuj.

¹³Tokona bocha, nyikiruoro sua ngakiro na itatamio a aosou a ngitunga, nakaneni kiruoro a ngakiro ana itatami Etau a Akuj, erai kisisanakini lu aanyut Etau ngolo ngakiro a Akuj na iteni.

¹⁴Itwaan cha daang ni nyeanyuna Etau a Akuj, nyeanyuni ngainakinet na a Etau a Akuj. Nyeyenuni itwaan ni ikoni ngini ngainakinet nguna eraakasi anikeng ngakiro pasiek, kainyo lu eraakasi ngika Etau make kesi eyenunete ajokis a ngakiro kanguna.

¹⁵Itwaan cha daang ni aanyu Etau a Akuj, epedori ayenun aronis ka ajokis a ibore kadaang, nakaneni emam itwaan epedori akirirare ngesi.

¹⁶ Loger lo igiritere nagiran kona, “Ngae eyeni ngitamen a Ekapolon? Ngae epedori akisuruor ngesi torik?” Nakaneni eya ngitamen a Kiristo niyok.