Read turkana 1 Ngikorintoi 3 Bible Online

1 Ngikorintoi 3 - turkana bible

1 Ngikorintoi 3

¹Ngikaitotoi kang, peasaki ayong akisuruor esi loger a ngitunga alu aanyut Etau a Akuj. Kesuruori ayong esi loger a ngitunga alu a akwap, kainyo ikote esi ngide luuchik ananupit kus.

²Tosubut ngakiro nguna ibore ni ketamasi ayong esi ngakile, meere akitanyam akimuj nakaagongon, kainyo eringa esi nyitemokino akiirar ngakiro nguna. Tani tokona, eringa esi nyitemokino akiirar ngakiro nguna,

³kainyo eringa esi ibooyete lopit a ngitunga a akwap ani eringa esi iraakatar lu kirakarit etereku ka lu iburaate make. Ikwa nyidodiunito nguna atamar iraakasi esi ngitunga a akwap kana, lu ibooyete loger a ngitunga a akwap a?

⁴ Naelimunio ipei kus tama, “Arai ayong eka Paulo,” sodi tama niche, “Arai ayong ika Apolo”, ikwa nyidodiunit ibore ngini atamar eringa esi ibooyete loger a ngitunga a akwap kana a?

⁵Tokona mono a, Apolo ngesi ngae? Nabo Paulo ngesi ngae? Kirai sua ngikasubak etich a Akuj lu kingarakini esi tonupeta ngakiro a Akuj. Esubi ipei kosi daang etich lokolong edodikini Ekapolon atamar tosub.

⁶Etakini ayong ekinyamit, tobukok Apolo ngakipi, nakaneni Akuj ngesi iturupuni ekinyamit.

⁷Ngini itakini ka ngini ebukokini ngakipi, emam itwaan ekachit ngakiro kech. Akuj alope na eturupuni ngesi etenoono.

⁸Eriyan itwaan ni itae ka ni ebukokini ngakipi, einakini Akuj ipei kech daang ebachit itemem ka etich lo esubi ngesi.

⁹Kainyo kirai sua ngikaitotoi lu kisubi etich aapei ka Akuj, iraakasi esi amana keng. Nabo iraakasi esi akai a Akuj.

¹⁰Kotere ainakinet a ajokis a Akuj, esiak ayong eduke, loger a ekadukon alo echoiyarit eduke, nakaneni eduki itwaan iche nateak nakolong esiakini ayong.

¹¹Kainyo emam eduke eche nabo isiakini itwaan mati lokolong esiakin, ngesi Yesu Kiristo.

¹²Nadukoru ngina, edukete ngiche a egolit kori akwangat na elalak ngaropiyae, kori ngamoru ngache naajokak noi. Ani ngiche, toduko a ngakito, kori a nginyia, kori ngakasirim.

¹³Etakanuuni etich a itwaan kadaang Akolongit na isileereunio Kiristo, kainyo Akolongit ngina, isileereuni akim etich a itwaan kadaang. Itemi akim ngina etich a itwaan taanyu atamar ikoni etich a itwaan ai!

¹⁴Ani pekenomia akim ibore nikolong aduki itwaan ngini, eanyuni ekadukon ebachit.

¹⁵ Nakaneni ani kenomia ibore ni aduki itwaan ngini, nyeanyuni ngesi ebachit, nakaneni eyuun ngesi elope, kikok ibore ni abuchun anakim.

¹⁶Iyenete esi dir atamar iraakasi esi akai a Akuj, nabo ibooyi Etau a Akuj anikus!

¹⁷ Ani robo kinyasu itwaan akai a Akuj, inyasuni ngesi dang Akuj, kainyo italeuno akai a Akuj, nabo iraakasi esi ngikulepek akai keng.

¹⁸Warasi nyiingalasi! Ani kitamit itwaan anikus atamar aos ngesi kotere epit lo a ngakwapea kanu, ejoikinit ngesi ebangaaner sodi tooseror na iteni.

¹⁹Kainyo aosou a ngakwapea kanu erai abangaanut ani a Akuj. Loger lo igiritere nagiran kona, “Irumuni Akuj ngikoosok kisalu anamodeanut kech.”

²⁰Igiritae nabo nagiran ngache kona, “Eyeni Ekapolon atamar eraakasi ngitamen alukoosok ngipasiek.”

²¹Emam robo tokona itwaan epedori akiwoga kotere ngakiro na esubete ngitunga, kainyo erai ibore daang ikus:

²²eraakasi Paulo ka Apolo ta Petero ngikus. Eraakasi ngakwapea nugu ta akiyar ka akitu, ka ngakiro na a ngirwa kalu ka namonan isidiunosi, eraakasi nugu daang ngakus,

²³nakaneni iraakasi esi ngika Kiristo, tarai Kiristo eka a Akuj.