Read turkana 1 Ngikorintoi 4 Bible Online

1 Ngikorintoi 4 - turkana bible

1 Ngikorintoi 4

¹Ejoikinit esi iyenunete atamar kirai sua ngikasubak etich a Kiristo lu kiseun atoweikisi ngakiro namunonoe a Akuj na eraakasi ngaka iteni.

²Ejoikinit ekasuban etich lo ikoni ngolo erai lo emunoi.

³Nyakachit ayong kirirata esi ayong kori kerirata tani ngitunga a ngakwapea, nyerira tani ayong elope bon.

⁴Emam alotau kang ibore ni esibit asechit ayong, nakaneni nyidodiunit ibore ngini atamar ekiuna ayong. Ekapolon ngesi epedori akirirare ayong.

⁵Tokona, nyejoikinit iriraate itwaan eringa Akolongit na eriras nyenanga. Ejoikinit eriras lo esal imiekinere Ekapolon tanang Akolongit na ebunio. Inwakuni ngesi na iweitae anaribu nabo kisileereu ngakiro na imunonito ngitunga alotamen kech. Sodi taanyu itwaan daang ani a Akuj ekipur lo itemokino ngesi.

⁶Ngikaitotoi kang, eraakasi ngakiro ka Apolo ka nakang naalimu ayong ekitetemes anikus, kotere ekitetemes kang ka lo ka Apolo, asaki ayong esi toyena eger a ngakisikwaanet ana ebeyo, “Kiwapa ngitalio loger lo igiritere.” Nyejoikinit tani ipei kus iwogar itwaan ipei, kimenya niche.

⁷Ngae ebala ijok iyong idwangit luche? Meere kolong Akuj kiinakini iyong ibore daang ni itingit a? Ani kolong kiinakinitae iyong, nyo iwogar iyong tosub kolong pekiinakinio?

⁸Imwoko kolong esi a? Iliworosi kolong esi ngikabarak a? Iliworosi esi ngikapolok tarai eringa sua nyeliworo ngikapolok a? Wae, esibit cha taraut esi ngikapolok atoliworos sua ka esi ngikapolok aapei.

⁹Kainyo esibit kijamuarit Akuj sua ngimeanara kitiliwo ngitunga lu esakio akiar alongaren ngitunga, sodi toliwor kiteete ngimalaikae ka ngitunga.

¹⁰Kirai sua ngikabangabangae kotere Kiristo, nakaneni iosok esi imorikina aapei ka Kiristo! Kipalag sua, nakaneni igogong esi! Kirimae esi, kimenyaritetei sua.

¹¹Kinyamit sua akoro ka akure tani tokona, emamuuna ngiworui, kibapanario nabo kirimit akwap.

¹²Kituburuna sua kisubi etich lokaagongon a ngakan kosi. Ani kimorio sua, atopiasi itwaan ngini, ani nakiboliare sua, atanaikisi.

¹³ Ani nakimorere sua, atatachakisi sua ngitunga ngakiro naajokak. Kikok sua asakatan alotunga a akwap, kikok tani ekabose a akwap anitwaan kadaang!

¹⁴Nyekegirakinit ayong esi ngakiro nugu ani asakea kiruma esi ngileech, nakaneni egir ayong nugu asaki atamar ketatam esi loger a ngide kang aluminan.

¹⁵Kainyo tani kirikito esi ngitunga ngabunge ngatomon aloboyor kus a ekiristoonu, erai apakus epei bon, kainyo aloboyor kus alo iliworotor esi ngipei ka Yesu Kiristo, aliwor ayong apakus ani kainunea esi Ngakiro Naajokak.

¹⁶Kemaimai bocha ayong esi atamar kiwapa ekitetemes kang.

¹⁷ Kotere ngakiro nguna, ameunit ayong Timoteo nikus. Erai ngesi lokookang lominat lo amuno ayong aloboyor alo ekiristoonu. Kisitamuni ngesi esi ngakiro daang na ewapit ayong anakiyar anakitetet ana kiraakar ayong ngipei ka Yesu Kiristo. Eboyor ngolo ngesi etatami ayong alokanisae kadaang, awadaang.

¹⁸Iwogasi ngiche kus ani ebaatar kori nyeringa ayong abuni aanyun esi.

¹⁹Nakaneni ani kechamit Ekapolon, abuni ayong nikus atipei sodi ataanyu ayong elope agogongu nakeanyut ngitunga lu iwogasi, meere ngakiro na iruorosi kesi.

²⁰Kainyo meere Apolou a Akuj aka ekiruor pas, erai agogongu.

²¹Anukiro kijoikinito esi, ayong abunere kedet esi kori abunere nikus a etau alo a amina ka apatanu.