Read turkana 1 Ngikorintoi 5 Bible Online

1 Ngikorintoi 5 - turkana bible

1 Ngikorintoi 5

¹Elimitoe atamar abe eyei emalaanu loaronon noi nikus lo idwangit tani lo a ngibukui alu nyerai Ngiyaudi. Kalimokin ayong atamar abe epereenete ikoku ka aberu a apakeng!

²Ikokinete tokona esi iwogasi ai? Achamit esi ialolongete dio kikotasi itwaan ni asubi ngakiro nguna tojongo arukit ka esi.

³Ayong alowae kang erai tani kalona a akwaan anikus, kirukit ayong ka esi kaina a etau. Ani aloger ekonea ayong itwaan ni ayei neni, erira ayong itwaan ni asubi ngakiro naaronok na a ngileech ikote nguna.

⁴Naichununotor esi wapei a ekiro a Ekapolon Yesu, atorukito ayong ka esi aapei a etau, ani kotere agogongu a Ekapolon Yesu,

⁵ tolemikisi itwaan ngini Esiitan sodi kinyasu akwaan keng, toyuunor etau keng Akolongit na a Ekapolon.

⁶Nyejoikinit esi inisasi! Iyenete esi ngakisikwaanet na ebeyo, “Ekitoe lodiochichi lo itubui ngamugati, itubui ngakiria daang na inyalakinitae.”

⁷Tolemasi ngasechesea nangorok na ikote ekitoe lo itubui ngamugati, sodi tarata lu ikiuna, lu ikote ngakiria a ngamugati anakitetet ana emam itwaan iwaakinit ekitoe lo itubui. Loger lo ayenea ayong atamar ikote esi neni, kainyo alemun Kiristo lo erai Imesek ni italeunitoe a esukukuu a Adeparet, aliwor akipeyos yok.

⁸ Nyikilakar kitamunit esukukuu a Adeparet, a ngamugati ana eya ekitoe lo itubui ngamugati lo erai akisech ka aronis. Nakaneni atalakaros kitamunit akolongit na a ngamugati ana emam ekitoe lo itubui, amugati ngina ngesi na erai akikiuna ka ngakiro na iteni dir.

⁹Anabarua ana kolong kegirakinit ayong esi, kalimokinit ayong esi atamar nyiimorikinosi ka ngitunga lu eminasi emalaanu.

¹⁰Pekesuruori ayong esi ngakiro a ngitunga alu nyerai ngikanupak alu eminasi emalaanu kori lukadakak kori ngikokolak kori lu ilipito ngakujo nasubuna, kainyo arai tarai ngulu abala ayong esi nyiimorikinotor, kejoikinit esi irotokinete anakwap kana jik.

¹¹Nakalimokinit ayong esi ngesi na abala, warasi nyiimorikinosi ka itwaan ni ebala arai lokaatokus nakaneni emina ngesi emalaanu nabo edakana, kori ilipit ngakujo nasubuna, kori eswamana kori ilewana kori erai ekokolan. Wara nyiiboikin kimuja ka itwaan ni ikoni ngini.

¹²Nyo kang ngitunga lu nyeraakasi ngikanupak, eriraa ayong? Ikwa meere lu eyakasi tooma ekanisa ejoikinit esi iriraate a?

¹³ Akuj irirae lu eyakasi nikalapatan a ekanisa. Loger lo igiritere nagiran kona: “Kitwarakisi itwaan niaronon anikus.”