Read turkana 1 Ngikorintoi 6 Bible Online

1 Ngikorintoi 6 - turkana bible

1 Ngikorintoi 6

¹Ani keyei ipei kus akiroit na esakea akititakin ekiristoit loche, nyo nitibore erikitor ngesi ngesi lotunga lu nyerai ngikanupak akititare peimiekinea ngikiristoi totubo ngakiro nguna?

²Ikwa nyiyenete esi atamar iriraate ngitunga a Akuj akwap a? Tokona, ani kiriraate esi akwap a, ikwa nyitubete esi tani ngakiro nadikidio a?

³Ikwa nyiyenete esi atamar kirirae ngoni ngimalaikae a? Ani ikokinete ngakiro a ngakwapea kanu kikuruworete ngoni ai?

⁴Ikwa na eponeta ngakiro na ipegakinosi esi, iyaarete esi totubo ngitunga lu nyerai ngikanupak a?

⁵Alimunit cha ayong nugu kirumeta esi ngileech! Iteni dir, eyei cha tokona ngon itwaan ipei ni eos anikus ni epedori akitub ngakiro na epegatar ngikiristoi.

⁶Abe aliwor erikori ekiristoit epei loche akititare sodi kimiek lu nyerai ngikanupak etubete ngakiro keng!

⁷Iteni dir, idodiunit ibore ni ititatar esi make atamar kikuruwosi esi na ejoikinit isubete. Nyejoikinit esi kisechanakinio a? Nyejoikinit esi kidemio ngiboro a?

⁸Nakaneni, abe isechakinosi esi make nabo idemanarosi ngiboro, tani lu kata lokaatokus!

⁹Iyenete esi dir atamar nyeanyunete ngikaronok Apolou a Akuj. Warasi nyiingalasi make kainyo ngitunga lu iwapito emalaanu, kori lu ilipito ngakujo nasubuna, kori ngikalomak kori ngikiliok lu iiunete ngikiliok luche,

¹⁰kori ngikokolak kori lukadakak, kori lukelewak kori ngikaswamak ta ngikademak, emam itwaan ani eya ngulu ni irumi Apolou a Akuj.

¹¹Ekote kolong ngichekus neni. Nakaneni ekisar kolong ngasechesea anikus irata esi ngitunga lu italeuno a Akuj. Ichamunosi esi ka Akuj kotere Ekapolon Yesu Kiristo ka Etau a Akuj yok.

¹²Elimuni itwaan iche tama, “Kachamakinitae ayong asubi ibore daang.” Iteni, nakaneni meere ibore daang ejok kotere iyong. Apedori ta ayong atamar kachamakinitae asubi ibore daang, nakaneni nyachamuni ayong ibore iche ketiliwori ayong erikot keng.

¹³Elimuni itwaan iche tama, “Erai akimuj aka akook, nabo erai akook aka akimuj.” Iteni, nakaneni inyasuni Akuj kesi daang. Meere akwaan a itwaan asubet ngakiro naaronok na ikote emalaanu, erai asubet etich a Ekapolon sodi tosub Ekapolon etich anakwaan.

¹⁴ Akuj nakolong eteyaruni Ekapolon Yesu kiteyaruni tani ngoni a agogongu keng.

¹⁵Iyenete esi atamar eraakasi ngawat kus nginerin a Kiristo. Esibit esi apedori ayong alemun ekinier a akwaan a Kiristo etiliwo ekinier a itwaan ani imalaikinit a? Mam jik!

¹⁶Kori nyiyenete esi atamar itwaan ni imorikini akwaan keng ka na a amalaat, eliwor akwaan apei ka nakeng. Igiritae nagiran ngakiro na ileerete atamar, “Eliwor luarei ngulu akwaan apei.”

¹⁷ Nakaneni ni imorikin ka Ekapolon Yesu, eliwor akwaan apei ka ngesi.

¹⁸Tapalikisi elomit ka emalaanu jik! Akisech nache daang na esubi itwaan, nyinyasuni akwaan keng, nakaneni itwaan ni elomit kori imalaikinit, esechakinit akwaan keng a ilope.

¹⁹Nyiyenete esi atamar eraakasi ngawat kus akai a Etau a Akuj alo ibooyi anikus, nabo kitaanyuni kolong esi Akuj a? Nyiraakasi esi ngikus a ngikulepek, nakaneni iraakasi ngika a Akuj,

²⁰ kigieluni kolong ngesi esi a ibore aniapolon. Nakaneni ejoikinit isubeta ngawat kus etich lo ipuruunere Akuj.