Read turkana 1 Ngikorintoi 7 Bible Online

1 Ngikorintoi 7 - turkana bible

1 Ngikorintoi 7

¹Asaki tokona ayong atachun ngakiro nakolong igirito esi. Esubi itwaan niajokon erai pekiuta.

²Nakaneni kona elalaketa ngitunga lu imalaikinit ka ngikalomak, ejoikinit ekile daang emini aberu keng a elope, nabo ejoikinit aberu daang emini ekile keng a alope.

³Tosubea ekile aberu ngakiro na eraakar ekile, tosubea aberu dang alokile keng ngakiro na eraakar aberu, tosub itwaan daang na esaki niche.

⁴Nyepolokinit aberu akwaan keng a alope, nakaneni ekile keng epolokinit, aloger alopei kangolo, nyepolokinit ekile akwaan keng a elope, erai aberu keng epolokinit.

⁵Warasi nyeewou ipei akitoper niche, mati sek ichamakina esi atamar nyiperete ngirwa ngiche isakete akilip Akuj. Nakaneni ani erumor, toperionoto loger lopalem sek. Ani kikokis esi neni, kiratakinio esi nyikining Esiitan erai pekipedorete esi anaikin etereku.

⁶Kalimokinit ayong esi na echamit iwapete, nyadungunit ayong atamar tosuba kongina.

⁷Esibit ayong kikote ngitunga daang ayong, nakaneni egealana ainakinet na ainaki Akuj itwaan daang. Einakinio itwaan ipei ainakinet naga, nakinae niche ainakinet ache.

⁸Tokona, alimunit ngakiro nugu kotere lu nyiutara ka ngapuseru, ejoikinit esi irubakinete akiboi make loger kang.

⁹Nakaneni ani kemam esi kona itikokinete etereku kus, ejoikinit iutarete kainyo ejok akiutar idwangit etereku lo ipeyipeyi akwaan.

¹⁰Ani alotunga alu iutarito, eya ngakiro na adungunit, meere ayong adungunit, erai Ekapolon Yesu. Nyeisik aberu ekile keng,

¹¹ nakaneni ani keisiki, ejoikinit iboikin emam ekile kori tobongok lokile keng, nabo ekile nyejoikinit elaki aberu keng.

¹²Ani luche, alimokinit ayong atamar (ayong elope alimunit, meere Ekapolon Yesu), ani kiusit ekiristoit aberu na nyerai akiristoit, sodi tachamite ngesi akiruk ka ngesi, nyejoikinit ekile ngolo elaki aberu ngina.

¹³Ani aberu nakiristoit na iusit ekile lo nyerai ekiristoit sodi tacham ekile ngolo akiruk ka ngesi, nyejoikinit aberu ngina eisikini ekile ngolo.

¹⁴Kainyo echamuni Akuj ekile lo nyerai ekiristoit ani imorikinotor ka aberu keng, ani aberu na nyerai akiristoit, echamuni Akuj ani imorikinotor ka ekile keng lokiristoit. Arai kolong nyikote ngakiro neni, kikote ngide kech ngide a ngitunga alu nyenupito Akuj. Ani kona tokona ekokineta ngakiro neni, etaleunosi kesi.

¹⁵Kaneni dang, ani kesaki itwaan ni nyerai ekiristoit atamar atotiakas ka nikiristoit, kimiekisi totiakas. Ani kikokis ngakiro neni, epedori ekiristoit kerai ekile kori aberu, akisub na esaki. Kinyar Akuj esi sodi kibooyoto a ekisil.

¹⁶Ikokini iyong iyeni dir aberu nakiristoit atamar nyiyuuni iyong ekile kon ai? Kori ikokini iyong iyeni dir ekile lokiristoit atamar nyiyuuni iyong aberu kon ai?

¹⁷Ejoikinit itwaan daang ibooyi loger lokolong ainakinea Ekapolon ngainakinet, ikoni nikolong anyaraa ngesi Akuj. Etal ngolo ngesi etatami ayong alokanisae kadaang.

¹⁸Ani kechamu itwaan ni ilengeritae Akuj, nyiitingakin robo atamar nyekelengeritae, ani kechamu itwaan ni nyilengeritae Akuj, nyechamit ngesi ilengera.

¹⁹Kainyo nyemisit Akuj kilengeritae itwaan kori kemam, ibore ni etenoono ngesi akiwap ngitalio a Akuj.

²⁰Kiboikin itwaan daang loger lokolong anyaraunea Akuj ngesi.

²¹Irai kolong iyong ekedalan na kinyaraa Akuj a? Emam ngakiro, nakaneni ani kipedori iyong alachakin, kikok ngitunga luche, talachakin.

²²Kainyo ekedalan lo anyara Ekapolon, erai itwaan a Ekapolon Yesu ni elachakina, aloger alopei kangolo itwaan ni elachakina ni anyara Kiristo, erai ekedalan keng.

²³Kigieluni kolong Akuj esi a ibore aniapolon nakaneni nyiiraut robo ngikedalak a ngitunga.

²⁴Ngikaitotoi kang, ejoikinit ipei kus daang erukito ka Akuj loger lopei kolong kinyaraa ngesi esi.

²⁵Asaki tokona ayong atachun ngakiro nakolong igirito esi kotere ngitunga lu nyiutarito. Emam ngakiro nakadungoki ayong Ekapolon Yesu kotere kesi. Nakaneni alimunit ayong nugu arai itwaan ni epedorio akinup ngakiro kotere ni kesienitor ayong Ekapolon Yesu.

²⁶Nakaneni, kotere ngichan lu eya ngirwa lugu, etamit ayong atamar ejoikinit itwaan ibooyi loger lo ikoni.

²⁷Eyei iyong aberu a? Wara robo nyisak akitwarakin. Eringa iyong nyiutara? Wara robo nyiisak aberu.

²⁸Nakaneni ani kiuta iyong, nyesecha iyong, nabo ani kius apese na nyiusitae sek, emam akisech esubit ngesi. Nakaneni esibit cha ayong tobuchunos esi alochan alu a ngirwa kadaang alu eanyunete lu iutarete.

²⁹Ngikaitotoi kang, na asaki ayong alimun kesi nugu: ekidioko ngirwa lu idongito. Napei tokona jik, kiboyoto lu iutarito ikwa ngitunga lu nyiutarito.

³⁰Ani lu igorosi tosubut nyesurur ngitai, ani lu ekianasi tosubut nyelakara, ani lu egielete ngiboro, tosubut ngiboro lu egielete kesi meere ngikech.

³¹Ani lu eya ngakiro esubete anakwap, tosubut nyekachito kesi noi na esubete, kainyo anang eboyor lo tokona a akwap kana ni edaunor.

³²Asaki ayong esi tapalikis ariaba ngakiro. Imuit ekile lo nyiutara akisub etich a Ekapolon Yesu, ani esakea ngesi akitalakar Ekapolon.

³³Nakaneni ani ekile lo euta, imuito ngakiro na ngakwapea kanu, ani esakea akitalakar aberu keng.

³⁴Sodi kikok ngesi lo iriyaritae alowaitin a ngiarei. Ani aberu na nyiusitae kori apese, imuit akisub etich a Ekapolon kainyo esaki ngesi akitaleun akwaan keng ka etau aapei. Nakaneni imuito aberu na iusitae ngakiro a akwap kainyo esaki akitalakar ekile keng.

³⁵Alimunit ayong nugu meere kotere akiratakin esi, pearai asaki akingarakin esi, tosuba ibore ni etenoono ka ni iyookino, sodi tolemunos jik akisub etich a Ekapolon emam ibore iche iukito.

³⁶Ani keyei ekile lo nyejoikinit atiaka ka apese nasek enerit ngesi akiut, tarai eyeni ekile ngolo atamar ekot etereku a akwaan keng akitosechakin apese ngina, ejoikinit kesi iutasi loger lo esakitor ngesi. Nyeliworosi nguna akisech.

³⁷Nakaneni ani ketiaku ekile bon emam itwaan itingakinit atamar nyeutari, ani ketitinyiki ngesi etereku a akwaan totiaku na esubi, ani kikote neni, ejok erai pekiut ngesi apese ngina.

³⁸Nakaneni ekile lo iutari, esubi niajokon, ani lo nyiutari, esubi niajokon noi akidwang lo iutari.

³⁹Irukete aberu ka ekile keng ngirwa daang lu eyarea ekile keng. Nakaneni ani ketoana ekile keng, epedori ngesi achamun ekile lo cha esaki ngesi, kerai ekile ngolo ekiristoit.

⁴⁰Elakar aberu ngina noi erai pekius nabo. Eraakasi nguna na etami ayong, nakaneni ayeni ayong atamar eyei ayong dang Etau a Akuj.