Read turkana 1 Ngikorintoi 8 Bible Online

1 Ngikorintoi 8 - turkana bible

1 Ngikorintoi 8

¹Asaki tokona ayong atachun ngakiro nakolong igirito esi kotere ngamuja a ngakujo anasubuna. Eraakasi ngaka iteni dir ngakiro na ebeyo, “Kiosok ngoni daang”. Nakaneni aosou na ikoni ngina, isinisakini itwaan, nakaneni amina itenikini itwaan.

²Itwaan cha daang ni itamit atamar ayeni ibore, nyeyeni loger lo ejoikinitor ngesi eyeni.

³Nakaneni itwaan ni emina Akuj, eyeni Akuj.

⁴Tokona bocha, ani anakiro a akimuj ana elemikinio ngakujo nasubuna, kiyeni ngoni atamar erai akuj nasubuna ekisikwaane a ibore ani emamuuna. Kiyeni ngoni atamar eyei Akuj apei bon.

⁵Tani ta keya ngiborei be, “ta ngakujo,” kerai nadis kori nakwap, kori tani kelalak nabe ta, “ngakujo” kori lube ta, “ngikapolok,”

⁶nakaneni eyei ngoni Akuj apei bon, na erai Apa, na erai akasubunan a ngiboro kadaang nabo ngesi kiyarea ngoni. Eyei ngoni tani Ekapolon epei bon, ngesi Yesu Kiristo lo erai ngesi kolong asubunere ngiboro daang nabo ngesi kiyarea ngoni.

⁷Nakaneni meere itwaan daang eyeni ngakiro na eraakasi iteni nugu. Anaikis kolong ngitunga ngiche ngakujo nasubuna aliwor enyamete akimuj na elemikinitae kesi tani tokona itamito atamar kori erai akimuj ngina aka a akuj anasubuna. Kona epalagagea anupit kech, itamito kesi atamar kori kinyasuni kesi akimuj ngina.

⁸Nakaneni nyepedori akimuj akitaapiyar ngoni nia Akuj. Emam ibore kiituni ngoni erai pekinyam, nabo, emam ibore kianyuni ngoni erai kinyam.

⁹Nakaneni tochoikinos, warasi eboyor kus lo nyikachitotor esi na iseunete nyiisichwangak lu epalag ananupit kech.

¹⁰Ani bo ejok kingolik itwaan ni epalag ananupit keng iyong lo ebeyo “ekooson” imuji alokai ana a akuj anasubuna, ikwa nyelomakini itwaan ngini akinyam akimuj a ngakujo anasubuna kotere ngakiro nguna a?

¹¹Sodi itwaan nipalag ananupit keng ngini, lo erai lokaatokon lokolong atoanea Kiristo, tobukor ananupit kotere “aosou” kon!

¹²Aloger kangolo, isechanakinete esi Kiristo ani isechanakineta ngikaitotoi kus lukiristoi tosub iwana esi anupit kech napalag.

¹³Nakaneni bocha, ani kerai akimuj itosechi lokaatokang, nyanyami ayong akiring nabo jik sodi nyeesecha lokaatokang.