Read turkana 1 Ngikorintoi 9 Bible Online

1 Ngikorintoi 9 - turkana bible

1 Ngikorintoi 9

¹Ikwa meere ayong itwaan ni asubi ngakiro na asaki akisub a? Ikwa meere ayong emeanara a? Ikwa nyeanyungara ayong Yesu lo erai Ekapolon yok a? Nabo ikwa nyiraakasi esi lu ichamunete Akuj ani kitatamea sua esi ngakiro a Ekapolon a?

²Tani pekachamunito luche ayong atamar arai emeanara, iyenete esi ngikulepek atamar arai ayong emeanara! Kotere eboyor kus lo imorikinotor esi ka Ekapolon Yesu, idodiunit ibore ngini dir atamar arai ayong emeanara.

³Ngakiro na atachakini ayong lu kengichingichete ayong kesi nugu.

⁴Nyechamit ayong kainakinio akimuj ka ibore ni amasi kotere etich lo asubi a?

⁵Nyechamit ayong asubi na ikote na esubete ngimeanara luche atorik aberu nakiristoit wadaang ni ateni loger kech ka ngikaitotoi a Ekapolon Yesu ta Petero a?

⁶Kori erai Barinaba bon ka ayong echamit kisubi etich atoyareta?

⁷ Ikwa meere etich lo esubi asiger ngesi eanyunitor ngesi akimuj na eyarea a? Eketan ali nyenyami ageor na enyaritae ngamusabib na ekoniunete ngikito lu itakinit ngesi mana keng? Ekeyokon ali nyemasi ngakile a ngibaren keng?

⁸Ekoe, eruoro ayong ngakiro nugu loger lo iruorotor ngitunga luche a? Ekoe, ikwa nyigiritae Lotal kongina a?

⁹Igiritae Lotal lo a Musa kona, “Wara nyiigol ngakituk a ngimongin alu elemere ngamanat kitonger adak.” Tokona, eraakasi ngakiro a ngimongin ngesi ekachit Akuj a?

¹⁰Ikwa meere ngakiro yok eruoro ngesi naalimunio nguna a? Egirio nguna dir kolong kotere ngoni. Itwaan ni itae ka itwaan ni elemi, esubete etich kech igienosi atamar kimori ngalemet.

¹¹Ani kitakinit sua ekinyamit lo etau nikus, erono kianyu sua ngiboro luyaret anikus a?

¹² Ani kesakete luche ngiboro ngulu anikus, ikwa nyejoikinit sua noi kisaki a? Nakaneni nyesaka sua ngiboro kus loger ngolo. Nakaneni kititinyik sua ngakiro daang sodi tongop eger lo kiratakinea Ngakiro Naajokak a Kiristo.

¹³Iteni dir iyenete esi atamar ngitunga lu esubete etich alokai a Akuj, eanyunete akimuj alokai a Akuj, ani lu elemunete ngakipeyos alokeno alo ipeyonokinere Akuj, eanyunete kesi dang epewae a ngakipeyos.

¹⁴ Aloger alopei kangolo, adungu Ekapolon Yesu atamar ejoikinit lu itatamete Ngakiro Naajokak eanyuununete ibore ni eyareta kaneni.

¹⁵Nakaneni nyesaka ayong ngakiro nguna tani wadiochichi, kori nyegiri tani tokona ayong asaki atamar ekok neni. Nyasubi ayong nguna jik tani kaar ibore! Emam itwaan eree ngakiro na ejoikinit iwogar toliworos ngapasiek.

¹⁶Nyejoikinit ayong ewoga ani etatamea Ngakiro Naajokak. Kainyo kadungokin kolong ayong atamar ekok neni. Oitiakoi! Abe etioko nginyas aanyuni ayong erai peketatam Ngakiro Naajokak!

¹⁷Arai kolong tarai ayong aseunit etich lo akisub, kasak ayong atamar katatach ngaropiyae, pearai asubi tokona ayong etich lo ani adungunio Akuj atamar tosub.

¹⁸Nyo tokona katachio ayong? Ibore ni katachio ayong ngesi akitatam Ngakiro Naajokak pas, erai peasaki atamar ataanyu ibore iche alotich alo akitatam Ngakiro Naajokak.

¹⁹Nakaneni, tani pekarai ayong ekedalan a itwaan a idio, aliwor ayong ekedalan a itwaan kadaang sodi tarauneta ngikaalak ngikanupak.

²⁰Ani nakirukitor ka Ngiyaudi, ebooyi ayong loger a Eyaudit, asaki kesi taraut ngikanupak. Ani tani pekarikit ayong Etal a Musa, ebooyi ayong asibit karikit etal ngolo nakirukitor ka lu erikit etal ngolo, asaki kesi taraut ngikanupak.

²¹Aloger alopei kangolo, nakirukitor ka ngibukui lu nyerai Ngiyaudi, ebooyi ayong loger a ebukut alo nyerai Eyaudit asaki kesi taraut ngikanupak. Nyidodiunit ibore ngini atamar nyewapit ayong Etal a Akuj, ewapit ayong dir etal a Kiristo.

²²Ani alotunga alupalag ananupit, abu ayong atapalagag loger lopei kech sodi atoreunea kesi toliworos ngikanupak. Nakaneni, kikwaanikin ayong ka ngitunga daang anakiro kadaang sodi atoyuunea ngiche kech a eger kadaang alo cha epedor.

²³Asubi ayong nugu daang kotere Ngakiro Naajokak, sodi katopiarere a ngakiro kanguna.

²⁴Iteni dir iyenete esi atamar elalak ngikakerak lu isiakinete akerit, nakaneni epei kech bon eanyuni ebachit.

²⁵Irichakin ekakeran daang totionik akiker esaki kainakin apukot na nyerubi, nakaneni kisaki ngoni ebachit lokajik.

²⁶Ibore ngini ngesi akerea ayong edirarit nirumoret, ibore ngini ngesi ekonea ayong ekajwon ngigum lo nyaramanari ngakan pas.

²⁷Edichi ayong akwaan kang atoboliar sodi tanaikinea eboyor daang, asaki nyakanger ayong lokolong anyarauni luche nakerit.