Read turkana 2 Ngikorintoi 10 Bible Online

2 Ngikorintoi 10 - turkana bible

2 Ngikorintoi 10

¹Kemaimai ayong Paulo esi, ayong lo ebeyo alilim nabo apatana nakirukitor ka esi nakaneni atodedeng nanyikirukitor ka esi. Kemaimai ayong esi kotere apatanu ka ajokis na Kiristo

²atamar nyikitingakis kare atamar atodedenger naabunio nikus, kainyo ayeni ayong atamar apedori adedenger kotere lu ebalasi kisubi sua ngakiro kiwapit eboyor a ngitunga a akwap kana.

³Kibooyi dir anakwap kana, nakaneni nyikiji ejie a akwap kana.

⁴Meere ngiboro lu kijio lua akwap kana nakaneni eraakasi ngiboro a Akuj lujiet lu kinyasununea ngawasea nakaagongok. Kinyasunea apega na alioko,

⁵kitiyauni kwap ibore daang ni inisa ni ekot akitopeg aosou a Akuj, kisaluni ngitamen daang sodi etokera Kiristo.

⁶Ani erumor esi akidodiun atamar ineikina dir akiwapit nguna kilimokinio, kirirae lu engerito akiwap na elimokinitae.

⁷Isemeete esi ngiboro lua anikalapatan. Eyei itwaan idio ni itamit atamar arai ngesi ika Kiristo a? Ani kikote neni a, ejoikinit ngesi itamakini nabo ngakiro a eboyor keng, kainyo kirai sua dang ngika Kiristo loger lo eraakar ngesi.

⁸Kainyo nyekerumito ayong ngileech, tani kewoga ayong noi kotere apolou na kianyu sua ani a Ekapolon, apolou na kitowoea sua esi, meere na kinyasunea.

⁹Nyasaki ayong tosub asaki akitubul esi a ngabaruae kang.

¹⁰Elimuni itwaan iche tama, “Kinomete ngakiro a ngabaruae a Paulo etioko, nakaneni ani kirukit ngoni ka ngesi, epalag ngesi na eraakasi ngakiro keng natenoyek.”

¹¹Ejoikinit itwaan ni ikoni ngini eyenuni atamar nyetiakak ngakiro nakigiri sua nabaruae kosi nakilokia ka nakisubi sua nakirukitor ka esi.

¹²Nakaneni bo dang, nyikisaki sua akimarun kori akikwaanikin ka lu ejapunito. Ebangaaka ngitunga ngulu noi! Abe esiakis kesi eboyor lo itemotor kesi make, nabo irirasi kesi kotere eboyor lo erai ekech a ngikulepek!

¹³Ani cha eliwor sua, nyikiwoga sua noi akidwang eger lo ejoikinit kiwoga, eliwor ekiwog kosi lo itemem ka etich lo kidodik sua Akuj. Epei a ngitichisio kangulu ngesi lo kisubi sua anikus.

¹⁴Ani kona iyakatar esi logerin ngulu, pekiporit sua ngigerin ngulu nakiponea nikus kiyaunit Ngakiro Naajokak a Kiristo.

¹⁵Nakaneni nyikiwoga sua kotere etich lo asuba luche akidwang ngigerin lu kidodik sua Akuj. Pearai kigasi sua atamar kisikokin anupit kus sodi atopedoreta sua akisub etich lo etenoono anikus, itemem ngirwa daang ka ngigerio lu kidodik sua Akuj.

¹⁶ Sodi etatama Ngakiro Naajokak anakwapea anache ana eloka anikus dio nyikiwogar etich lo esuba alomana a itwaan aniche.

¹⁷Nakaneni igiritae nagiran kona, “Itwaan cha daang ni esaki akiwoga, ejoikinit iwoga kotere ngakiro na asubaki Ekapolon.”

¹⁸Kainyo meere itwaan ni ipuruuno bon ngesi itojokitae, erai ngini ipuruunit Ekapolon.