Read turkana 2 Ngikorintoi 11 Bible Online

2 Ngikorintoi 11 - turkana bible

2 Ngikorintoi 11

¹Esibit cha ayong tanaikis esi ngakiro kang tani bo tani kabangaana ayong wadio. Ekoe, tanaikisi kare!

²Katingit ayong etereku kotere esi ani araakar itwaan a Akuj. Ikote esi apese na nyepero ka ekile a ache, na enerit ekile epei bon akuut, lo erai Kiristo.

³Nakaneni aemit ayong esibit edikino ngitamen kus ibatarosi sodi tapalikis esi amuno ka anupit Kiristo lokojokon, loger lokolong engalaa emun Awa a alioko ana a amodeanut keng.

⁴ Kainyo iminasi esi anaikin ngakiro a itwaan cha kadaang ani ebuni nikus akitatam ngakiro a Yesu a eche, meere lo kitatami sua ngakiro keng. Ichamunete esi tani etau eche ka ngakiro naajokak ngache na etiakak ka Etau a Akuj lokolong ianyunete esi anikosi!

⁵Nyetamit ayong atamar ayong ngesi adit noi ani eya ngulu iyenikinito esi noi inyarito be “ngimeanara!”

⁶Ngaye robo kerai ewae a ekiruor itamarete esi nyayeni ekiruor, nakaneni aos ni erai aosou. Kisileereunit sua ngakiro nugu daang anikus awadaang jiik.

⁷Emam ibore ketelem ayong esi naketatamea esi Ngakiro Naajokak a Akuj. Etiditeun ayong sodi kitoyenikinere esi. Kori robo kechwangakinit ayong kotere nguna?

⁸Naasubea ayong etich anikus, ngitunga a ngikanisae aluche kesi katacheenete ayong. Kikok ibore ngini ni ademi ayong kesi ngiboro sodi kengarakinea esi.

⁹Nakirukitor ngoni, nyichana ayong esi asaki kingarakis na echenar ngaropiyae. Apot ngikaitotoi lu apote alo Makedonia kainut ayong ibore daang ni eitanit. Loger lo a ngirwa kangulu ta lumonan isidiunosi, nyekechani ayong esi jik!

¹⁰Loger lo anupitor ayong iteni dir ngakiro na Kiristo, kechikakinit esi atamar emam alowaitin kadaang a Akaya ni isililingere ngiwog lukang lugu.

¹¹ Alimunit mono ayong nugu ani nyakaminar esi a? Eyeni Akuj atamar kamina ayong esi!

¹²Arubakini ayong asubi naasubi tokona sodi tongopik luche ebaasi kesi, “ngimeanara” ibore ni iwogatar ebaasi kisubi kesi dang etich loger kosi.

¹³Eraakasi ngitunga ngulu ngimeanara lukaliokok lu itusubuna ngimeanara a Kiristo.

¹⁴Karika, emam nguna nakitalarete! Nger tani Esiitan dang kitusubun emalaikat a akicha!

¹⁵Nakaneni nyetiono ngikasubak etich keng akitusubun ngikasubak etich lu etenooko dir. Ani arumoret kanguna, eanyunete kesi na itemem kana esubete kesi.

¹⁶Alimunit nabo kona, nyeetama itwaan kori arai ayong ekabangabangat. Nakaneni ani kitamito esi kongina, tachamunae robo arai ekabangabangat sodi toyakar ayong dang ibore idio ni enisar.

¹⁷Nyerai na tokona eruoro ayong na esaki Ekapolon eruor. Anakiro ana ngiwog kanu, eruoro ayong loger a ekabangabangat.

¹⁸Nakaneni kona eyakatar lukaalak lu iwogasi kotere ngakiro na eboyor a ngitunga, ewoga ayong dang kongina.

¹⁹Esi ngesi iosok noi, ibore ngini ngesi iminatar esi akipup ngakiro a ngikabangabangae!

²⁰Inaikinito esi ngakiro a itwaan kadaang ani kitiliworit esi ngikedalak kori ani kitoosor kori ani kilokit esi kori ani kimenyarit esi kori ani kibapabapae esi.

²¹Kerumito ayong ngileech achamuni atamar kipalag sua pekipedori akisub nguna! Nakaneni ani keyei itwaan ni esaki akiwoga kotere ibore idio, eruoro cha ayong nugu loger a ekabangabangat, eyei ayong dang ibore ni ewogar.

²²Eraakasi kesi Ngieburaniae a? Arai ayong dang. Eraakasi kesi Ngisirael a? Arai ayong dang. Eraakasi kesi ngalesea ka Aburaam a? Arai ayong dang.

²³Eraakasi kesi ngikasubak etich a Kiristo a? Ekoe asub ayong itwaan ni ikerepikinit ani eruoror kona! Arai ayong ekasuban etich loajokon noi lo edwangit kesi! Ationikinit ayong noi akisub etich, kaen ayong alojala ngaenet ngakaalak, kedesitae lokojokon noi, nabo akot akitu jiik.

²⁴Kebungaare ayong Ngiyaudi a ngaburoi ngakibungaet ngakan, karamete ngaramet ngatomwon-uni ka ngakan-koomwon.

²⁵Kedeese ayong Ngiroma a ngalita ngakideset ngauni. Katachak a ngamoru achaket apei. Kabuko ayong atubwa ngabukoret ngauni. Ebooyi ayong anakipi apaaran juui ka akwaar kiiya.

²⁶Analooso kang anakaalak, kichanyuunun ayong ka ngichan ngigelagelae lua ngakalel ka lua ngirukooi ka lua a Ngiyaudi ta lua ngibukui lu nyerai Ngiyaudi. Aya ngichan lorerea ka nariet ka nganamea ta ngikaitotoi lukamodeanak.

²⁷Asub ayong etich echanakin. Akieny ayong ngirwa ngikaalak nyejotooro. Kanyam ayong akoro ka akure. Aroneene ayong akimuj a ngirwa a ngikaalak ebooyi anikalapatan emam ngiworui.

²⁸Kanguna kadaang, kesibuusikinit ayong akolongit daang etich lo a ngikanisae aluche kadaang.

²⁹ Ani epalag itwaan apalag ayong dang. Ani na esechea itwaan kariebete ayong ngakiro keng etau.

³⁰Ani kejoikinit ayong ewoga, ewoga kotere ngakiro na idodiunito apalagu kang.

³¹Akuj na erai Apakeng a Ekapolon Yesu, na erai ngesi epiarit nakajik, eyeni atamar nyeruoro ayong alioko.

³²Naayakar ayong Damasko, abu ngolo aweikinit akwap ngina ngirwa lua ekapolon Areta, tolimok ngikeyokok atamar keteut ayong alodorin a ere kerumut.

³³ Nakaneni apon keyeeliun ayong kesitor kidiama awas dio atobuchar.