Read turkana 2 Ngikorintoi 12 Bible Online

2 Ngikorintoi 12 - turkana bible

2 Ngikorintoi 12

¹Ewoga cha ayong tani kemam ibore elemunete ngiwog. Nakaneni alimuni tokona ngakiro a ngakitoodikinet ana ketaanyuni Ekapolon.

²Ayeni ayong itwaan iche nikiristoit ni akoporio yaarae nadis na alokidiama noi ngikaru ngitomon ka nguomwon kolong adaunosi. (Nyayeni ayong atamar kesubakina nguna kori keraakasi ngakisingolikinet a Akuj, Akuj bon eyeni).

³Alimuni nabo, ayeni ayong itwaan ni akoporio yaarae najako a Akuj. (Kaneni nabo, nyayeni ayong atamar kesubakina nguna kori keraakasi ngakisingolikinet a Akuj, Akuj bon eyeni.)

⁴Kiira ngesi kaina ngakiro namunonoe na emam kona elimunio.

⁵Tokona bocha, ewogar ayong itwaan ni ikoni ngini, nakaneni nyewoga ayong kotere ayong elope, pearai ewoga kotere ngakiro na idodiunito apalagu kang.

⁶Arai kolong atasaki ayong akiwoga, pakarai ayong ekabangabangat kainyo keraakasi ngakiro na iteni ngesi eruoro ayong. Nyewoga ayong kainyo nyasaki itwaan idio ketojok ayong noi akidwang na itee ngesi ka na epupi anikang.

⁷Nakaneni ani asakere ngakitoodikinet a Akuj nakaalak nguna nyeketajaput ayong enisakin, apon ketaanyun ayong apipilu anakwaan na ikoni eekwae, ameuni Esiitan apipilu ngina kedet ayong sodi nyeenisakin noi.

⁸Elipi ayong Ekapolon ngakilipet ngauni kotere apipilu ngina asaki atamar kitwarak anikang.

⁹Nakaneni katatachak ngesi ayong tama, “Ajokis kang ngesi kitemokino iyong, kainyo etenoono agogongu kon noi na ipalagagea iyong.” Alakara bocha tokona ayong noi enisa anapalagu kang sodi minio agogongu a Kiristo nikang.

¹⁰Nakaneni bocha, alakara ayong anapalagu ka ngiyeny ka ngichan ka aboliaro ta ariaba kotere Kiristo. Kainyo erai na apalagagea ayong ngesi agogongio.

¹¹Asub ayong ekabangabangat, nakaneni erai esi kisikokis ayong neni. Esi kesi ejoikinit kipuruunete ayong. Kainyo tani karai ayong epasit, emam ibore kedwangitotor ayong “ngimeanara” lu iyenikinito esi noi ngulu.

¹²Asubasi kolong ngakitoodikinet nakailiilok ka nakatalarak anikus na idodiunito atamar arai ayong emeanara lo a iteni dir. Asubasi nguna a atitinyu noi.

¹³Nakaneni a, nyoni kingopikinit esi noi akidwang ngitunga a ngikanisae aluche? Mati robo cha eger lo nyichana ayong esi asaki kingarakis ayong. Torimakinae kare kasechakinit esi kotere nguna.

¹⁴Edikino tokona ayong abuni nikus abunet na a ngauni, nakaneni nyekechani ayong esi. Kainyo meere ngaropiyae kus asaki ayong, kasaki esi ngikulepek. Ani bo ikoni dang, erai palem ngikauriak itangatarete ngide kech ngibaren, meere ngide itangatarete ngikauriak kech.

¹⁵Alakar ayong noi erai kalem ibore daang ka akiyar kang dang aapei tadaun kotere esi sodi kengarakinea esi. Kiminakinete esi ayong wadio ani kaminar ayong esi lokojokon a?

¹⁶Ichamunete robo tokona esi atamar nyichana ayong esi. Nakaneni etamari itwaan iche amodeana ayong ngesi kengalaa esi a alioko.

¹⁷Nakaneni a, eya ngimeuna lu ameuni ayong nikus asaki akitiliwor esi ngirikon a?

¹⁸Emaimai ayong Tito asaki tolot, sodi atomeu nabo nikus ekaitotoit eche lokiristoit kirukut ka ngesi. Nakaneni a, kitoosor esi Tito a? Ikwa nyiyenete esi atamar kirikit sua Etau lopei ngolo, nabo erai elote kosi epei a?

¹⁹Kori itamito robo esi atamar kisaki sua kaneni kadaang eger lo kiyuunor anikus. Meere kongina! Kiruoro sua loger lo esakitor Kiristo sua eruoro alongaren Akuj. Ani ibore ni kisubi sua daang ngikaitotoi luminan, erai ikingarakinet esi.

²⁰Etekerikinit cha ayong esibit naabunio nikus, arukauni eboyor kus paikoni lo asaki ayong katorukaunea esi ikote, nabo irukaunete esi eboyor kang peikoni ni isakete esi kikok. Etekerikinit ayong esibit arukauni anikus eburas ka etereku ka anyunyura ka adinga ka ekiyeny ka aswam ka ekinis ta ekurikur.

²¹Ketekerikinit ayong esi abunet namoi abunio ayong, kesurumi ayong Akuj kang ngileech alongaren kus, sodi egor ayong kotere ngikaalak lukolong asechete nakaneni awout akilung naaronok naasubete kesi, na ikote emalaanu ka elomit, ta amera kech.