Read turkana 2 Ngikorintoi 2 Bible Online

2 Ngikorintoi 2 - turkana bible

2 Ngikorintoi 2

¹Nakaneni atiaku ayong atamar nyabuni nabo nikus akisialolong esi.

²Kainyo ani kesialolong ayong esi, ngae idongi ketalakarit ayong? Erai nabo ngitunga lupei esialolong ayong ngulu.

³Ngakiro nguna ngesi kegirakinitor ayong esi abarua ngina, peasaki ayong abunere nikus kesialolong esi ngitunga lupei ejoikinit ketalakarete. Kainyo ayeni ayong dir atamar naalakaror ayong, ilakarosi esi daang.

⁴Kegirakini ayong esi kanomito ngakiro etau kesigor ngakiyo cholae, peasaki ayong akisialolong esi, nakaneni asaki ayong esi toyena eger lo kamina ayong esi daang.

⁵Ani keyei itwaan itongoit niche, meere ayong ketongoit, erai esi daang kitongoit, kori itongoit epewae kus. (Alimunit ayong nguna kainyo nyasaki adedenger noi anikus.)

⁶Itemokino atamar erirata ngikaalak kus itwaan ngini a eger kangolo.

⁷Tokona bocha, ejoikinit esi irimakinete ngesi kingarakis sodi nyialolongio jik kinyasun.

⁸Kemaimai tokona ayong esi kidodikis ngesi atamar iminasi esi ngesi dir.

⁹Kegirakini ayong esi abarua ngina erai asaki akiyen dir eger lo ipedorete esi akiwap ngakiro nakalimokini ayong esi.

¹⁰Nairimakineta esi itwaan a ngakiro ana asub ngesi, arimakini ayong dang ngesi. Kainyo naarimakinea ayong, erai keyei ibore ni ejoikinit arimakini, asubi ayong nguna ani a Yesu Kiristo, kotere esi,

¹¹sodi tongopikinea Esiitan eger lo kidwangea ngoni, kainyo kiyeni ngoni ngakiro na ereat ngesi.

¹²Naanangunea ayong Turoa akitatam Ngakiro Naajokak a Kiristo, atoyen atamar kengaa Ekapolon erot lo esubere etich keng kaina.

¹³ Nakaneni ealolong ayong noi kainyo nyeriamuna ayong lokaatokang Tito. Sodi atolimok ayong ngitunga lu kaina atamar kidongo robo ani erumor atolot ayong Makedonia.

¹⁴Nakaneni kilakara noi ani a Akuj! Kainyo kirikit ngesi ngoni jiik anakipiun ana a Yesu Kiristo. Erai ngesi kipetaritor ngoni ngakiro na iteni a Kiristo tokeikin wadaang loger a aurus anakakukunyon.

¹⁵Kainyo kikoni ngoni aurus nakakukunyon noi na alemiki Kiristo Akuj, aurus ngina ekeikina ni eya ngulu eyuununio kangulu ebukoro.

¹⁶Kangulu ebukoro, ikoni aurus ngina ekabose lo kitulari kitaar, nakaneni ani ngulu eyuunio, erai aurus a akiyar. Ngae tokona epedori akisub etich lo ikoni lo?

¹⁷Nyikikoni sua ngitunga luche lu itisibito ngakiro a Akuj ibore ni emuchuruseenu. Nakaneni kona eraakar Akuj kimeunit sua, kiruoro sua na iteni dir anikeng kirai ngikasubak etich a Kiristo.