Read turkana 2 Ngikorintoi 4 Bible Online

2 Ngikorintoi 4 - turkana bible

2 Ngikorintoi 4

¹Kiinak ngoni Akuj etich lo kotere ngisien keng, nakaneni nyejoikinit ngoni kilelenyi.

²Kipalik sua ngakiro na imunonitae kana a ngileech daang. Kipalik sua amodeanut ka akibatanar Akiroit a Akuj, nakaneni kisileereu sua ngakiro na a iteni ani kisubea naeraakasi ngaka iteni. Kisaki ngitunga daang pena ngitai luajokak anikosi, alongaren Akuj.

³Kainyo ani kerapap ngakiro naajokak kitatami sua, erapap ani eya ngulu ebukoro make.

⁴Nyenupito kesi kainyo etiribok akuj naaronon nasubuna a akwap kana ngitamen kech. Iratakinit ngesi kesi nyeanyungasi akicha na imakinit kesi, akicha na itorunit Nakiro Naajokak a apolou a Kiristo, alo ikwaan ka Akuj per.

⁵Kainyo meere ngakiro kosi a ngikulepek kitatami sua, kitatami sua ngakiro a Yesu Kiristo atamar erai Ekapolon. Ataraakas sua ngikulepek lu kisubanakini ngesi etich.

⁶ Akuj na alimuni tama, “Imauni akicha anaribu,” ngesi napei esimauni akicha alotai yok. Arai kitaanyuni ngesi ngoni aosou na a apolou a Akuj na imaunit aloreet a Kiristo.

⁷Nakaneni ngoni lu kianyu ebari lo etau, kikoni ngamoti nalupei. Sodi tatakanunea dir atamar erai agogongu nateno aka a Akuj, meere ayok a ngikulepek.

⁸Kianyunit sua ngichan ngirwa daang, nakaneni nyikiarit ngitai. Esaa eche eya nakingaya, nakaneni nyikilounete ngakiro atapalikisi ngakiro nguna,

⁹elalak ngimoe kosi, nakaneni nyengopi cha ekone, ani tani kiwaneneo ngawanet nakaalak, nyikinyasunio sua.

¹⁰Kiwokit sua akitu a Yesu ngirwa daang anawat kosi anapalag, sodi tatakanunea tani akiyar keng anawat kosi.

¹¹Aloboyor kosi kadaang, ekotoi sua akiar kotere Yesu, sodi tatakanunea akiyar keng anawat kosi anapalag kanu.

¹² Idodiunit ibore ngini atamar eyei akitu nikosi, nakaneni eyei akiyar nikus.

¹³Igiritae nagiran kona, “Eruoro ayong kainyo anupit.” Alotau alopei a anupit kangolo, kiruoro sua dang kainyo kinupit.

¹⁴Kiyeni sua atamar Akuj nakolong eteyaruni Ekapolon Yesu, kiteyaruni sua dang ka Yesu, sodi kiyaa ngesi sua aapei ni eyei ngesi.

¹⁵Esubasi nugu daang kotere esi, ani na iatakinotor ngitunga lu eanyunete ajokis a Akuj talalaketa, ilipete kesi noi ebuakinito Akuj alakara a apolou keng.

¹⁶Kotere nugu, nyikipalikini ngakiro nugu jik. Tani kinyasuna ngawat kosi na anikalapatan, itiliwonorio ngawat kosi na alotooma ngakitet a ngirwa.

¹⁷Ekidioko ngichan lu kianyunit ngoni, nabo eraakasi ngikadaunak, nakaneni kiinunete ngoni apolou naajokon na erai aka jik, na etenoono noi idwangit ngichan.

¹⁸Ngiboro lu nyetakanete kesi kitee sua lokojokon, meere lu etakanete. Ibore ni iteeo, ekidioko ngirwa iteere, nakaneni erubi ibore ni nyiteeo nakajik.