Read turkana 2 Ngikorintoi 5 Bible Online

2 Ngikorintoi 5 - turkana bible

2 Ngikorintoi 5

¹Kainyo kiyeni ngoni atamar na inyasunere eam lo tokona kibooyo ngoni logo, lo erai akwaan yok, kitaanyuni ngoni Akuj ni kiboikin anadis, akai nakajik na nyesubio a ngakan.

²Nakaneni kirurumae tokona ngoni kiitanit noi atamar kitobutakin akai yok na a adis.

³Ejoikinit ngoni dir kibutario kongina sodi nyikiwo alongaren Akuj emam ibore kinapit.

⁴Ani eringa kirukit ka eam lo a akwap logo, kirurumae esibit kichakiyaritae. Meere atamar kisaki sua atotiakas ka akwaan na a ngakwapin naga, nakaneni erai kisaki kitobutakin na a adis. Sodi kibeleo akiyar ibore ni erai ikenyasunan.

⁵Akuj ngesi kireik ngoni akilocho naga, nabo kitaanyu ngesi ngoni Etau keng toliwor ngesi eweikinit daang nakidaritor ngesi ngoni.

⁶Nakaneni kititiny ngoni ngirwa daang. Kiyeni atamar ani cha eringa kiya nawi na a akwaan kana, kiloka anawi ana a Ekapolon.

⁷Kainyo erai akiyar yok aka a anupit, meere na igienore ibore ni iteeo.

⁸Kititiny ngoni lokojokon nabo esibit emiekisi awi na a akwaan sodi eruko ka Ekapolon anawi keng.

⁹Kanguna kadaang, kisaki atosuba na ejoikinito ngesi kerai anawi yok kane, kori kaama.

¹⁰ Kainyo kiwei ngoni daang alongaren ekicholong a Kiristo lo a eriras, kirira ngesi ngoni. Eanyuni itwaan daang na itemem ka nakolong asubea ngesi akwaan keng na a akwap kana, kerai naaronok kori naajokak.

¹¹Kiyeni sua atamar nyoni ekeritere Ekapolon. Kotere nguna, kisaki sua akimaima luche. Kiyeni sua Akuj lokojokon noi, nakaneni etamit atamar kiyenete esi dang ayong alotai kus.

¹²Nyiitamasi robo kori kisaki sua akiwoganakin esi, pearai kisaki sua toyenut ibore ni ejoikinit iwogatar kotere sua. Sodi topedoreta esi akibut ngakiro a ngitunga alu inisatar eboyor a ngitunga lo anikalapatan, peekachito lo a etau.

¹³Ani kesibit kikoporito sua ngikerep, kikoni neni kotere Akuj. Ani kejok sua ngakies, ikote neni sodi kingarakinotor esi.

¹⁴Kirikit sua amina na a Kiristo. Kona tokona kiyenea sua atamar atoani itwaan ipei kotere ngitunga daang, idodiunito ngakiro nguna atamar emorete daang akitu keng.

¹⁵Atoani ngesi kotere daang sodi ani ngulu eyarete, nyeerubakis eyarete a akiding kech make. Nakaneni ejoikinit kesi eyarete kotere lokolong atoani ani nabo kiteyarunae toyar kotere kesi.

¹⁶Nyeringa tokona ngoni nabo jik kirirae itwaan a eboyor alo a ngitunga. Tani kolong kirirat ngoni Kiristo aloboyor a ngitunga, nyeringa tokona nabo ngoni kikoni neni.

¹⁷Naimorikinotor itwaan ka Kiristo, aliwor ngesi itwaan nikitetet, adaun nangorok, apotu nakiteat.

¹⁸Akuj ngesi esubi nugu daang, nakolong kichamakin ka ngoni ani a Kiristo. Nakaneni kidodik ngesi ngoni etich lo kichamakinor ka luche.

¹⁹Ngakiro na kitatamea sua ngesi nakibala etiliwori Akuj ngitunga daang ngipaalon keng ani a Kiristo. Nyimara Akuj ngasechesea kech, nabo kitaanyu ngesi ngoni Ngakiro na elimorito eger lo itiliwonorea ngesi kesi ngipaalon keng.

²⁰Kirai sua lu kiweikinit a Kiristo, nabo Akuj alope imaimai ngitunga anikosi. Kimaimai sua esi kotere Kiristo, tachamunos ka Akuj!

²¹Amam Kiristo akisech. Nakaneni etaanyuni Akuj ngesi akisech sodi ani kimorikin ngoni ka ngesi, ataanyuneta ngoni dang ateneanut a Akuj.