Read turkana 2 Ngikorintoi 7 Bible Online

2 Ngikorintoi 7 - turkana bible

2 Ngikorintoi 7

¹Ngipaalon luminan, eraakasi ngakichikakinet nugu daang ngayok. Tokona bocha, ejoikinit ngoni kikiun ani eya daang na inyasunete akwaan ka etau. Atoliworos lu kitaleuno ani kibooyo kikerit Akuj.

²Kimiekisi ngakiro kosi pena lotai kus. Emam itwaan kisechak sua, emam itwaan kiwan sua, kori emam itwaan kingalaa sua ibore.

³Nyalimunit ayong nguna asaki akirirare esi, kainyo, kona sek alimunio, kimina sua esi noi kirai ngipei erai kiyari kori kitoaka.

⁴ Kamuno ayong esi noi, kisuparito esi ayong lokojokon! Alochan kosi kadaang, aringa ayong atitiny noi, alakara ayong lokojokon noi.

⁵Tani kinangu sua Makedonia kerumor, nyiangara sua. Aya ngichan wadaang, kitongolopete ngitunga, tobulite ngitai.

⁶Nakaneni, Akuj na ingaranakini lu itasionosi, abu kingarak sua ani abunio Tito.

⁷Meere abunere keng bon ngesi kingarakini sua, pearai kilakar tani kotere eger lo ingarakineta esi ngesi. Kitolimok sua eger lo kimuitor esi noi aanyun ka ayong, ka eger lo ialolongeto esi. Kitolimok tani eger lo isaketa esi aiikin ayong, nakaneni alakar ayong tokona noi.

⁸Kainyo tani kolong kialolongito esi kotere abarua nakang ngina, nyariaba ayong abala nyo kolong egirea. Kedikino ayong ariaba na engolikinea atamar ialolong esi wadio kotere abarua ngina.

⁹Nakaneni alakara ayong tokona, meere ani ialolongioto esi kotere ayong, pearai ani ilungeta esi naaronok kotere akialolong ngina. Kitojok Akuj eger lo ialolongioto esi ngolo sodi nyiichanyut esi naaronok kotere sua.

¹⁰Kainyo akialolong na itojoki Akuj, erukito ka akilung naaronok na eyaunete ayuuno, nabo emam ibore eriabae iitonorio kaneni! Nakaneni erikit akialolong na erai aka akwap akitu.

¹¹Taanyungasi na asubi Akuj anakialolong anakus kana: iliworosi tokona esi ngitunga lu irichakina nabo iitanito akidodiun atamar nyisechito esi! Iliworosi esi ngitunga lu kikadakinito naaronok, lu irianganakinosi iemito, lu irichunito etich nabo isakito akirirare naaronok! Idodiunosi esi atamar nyisechito esi anakiro kanguna kadaang.

¹²Nakaneni, ani tani kegirit ayong abarua ngina, peegirit kotere itwaan ni asechit kori ni asechakinitae. Egiri ayong sodi kileereunio dir ani a Akuj eger lo irichatar esi kotere sua.

¹³Ngakiro nguna kesi kitililimete sua ngitai. Meere akitililim ngitai bon, pearai kipotu tani atalakaros kotere eger lo alakara Tito, ani ingarakineta esi daang ngesi italakarito.

¹⁴Kepuruunit sek ayong esi anikeng, nakaneni nyisuruma esi ayong ngileech. Kisuruori sua esi ngakiro na iteni jiik, aloger alopei kangolo, aliwor ekipur lo kepuror ayong esi ani a Tito lo a iteni.

¹⁵Nakaneni kiminak ngesi esi lokojokon noi, erai itamunit ngesi eger lo isaketa esi daang akiwap ngakiro keng, ka eger lo isiriameta esi ngesi ikerito tamaranete.

¹⁶Alakara ayong noi ayeni atamar apedori akigienokin esi jik anakiro kadaang.