Read turkana 2 Ngikorintoi 8 Bible Online

2 Ngikorintoi 8 - turkana bible

2 Ngikorintoi 8

¹Ngikaitotoi kosi, kisaki sua esi toyena na etemok ajokis a Akuj alokanisae alu eya Makedonia.

²Eningitoe ngikanupak lu kaina lokojokon noi a ngichan alu aanyunete, nakaneni alakara kesi noi apataka anakipotonor kech ngiboro, tarai bo arai kesi ngikebootok.

³Kalimokinit ayong esi dir atamar alemunete kesi na apedorete alemun, tolemut tani elalak noi idwangito na ajoikinit elemunete. Kotere echami kech a ngikulepek,

⁴kimaimayete kesi sua nabo kitodiaka esakete kimarunae kesi dang toliworos ingaranakinete ngitunga a Akuj lu eya nakwap a Yudea.

⁵Pekitamit sua sek atamar ikokinete neni! Alemunosi kesi mono ani a Ekapolon, ani erumor, tolemun kesi anikosi dang kotere echami a Akuj.

⁶Sodi echikichika sua Tito lo esiakini etich lo atamar torubak esubi sodi torumo etich loteno lo a amina logo.

⁷ Ijoketa esi noi anibore kadaang, ijoketa ananupit, ka ekiruor ka aosou ka eger lo kimuitor akingarakin ta eger lo kiminatar esi sua. Nakaneni kisaki sua esi tapataketa tani aloger alo amina kalo.

⁸Emam ngakiro na adungunit ayong atamar kiwapa esi. Nakaneni asaki akidodikin esi eger lo iitanitotor luche akingarakin sodi atoyenunea kerai amina kus na iteni dir.

⁹Iyenete esi ajokis a Ekapolon yok Yesu Kiristo. Tani kebarit ngesi loger lo ebaritor, abu ngesi tarau ekebootonit kotere esi, sodi tabareta esi ani aliworor ngesi ekebootonit.

¹⁰Esibit ayong torumosi esi tokona etich longoon isiakinete ekaru lobeen adaun. Esi lu ekingaren isakete asubakin kongina nabo kisiaut achamun.

¹¹Torumosi robo tokona etich ngolo! Toliworos ngitunga lu kimuit arumor etich ngolo loger lokolong kimuitor akisiakin, nakaneni tosuba nguna itemem ka ibore ni itingito esi.

¹²Ani kimuit iyong akipotor, echamuni Akuj ainakinet kon itemen ka ibore ni isaki iyong akipotor, meere ibore ni emam iyong.

¹³Nyasaki ayong akitalalare ngichan kus sodi kianguneta luche. Erai asaki atochoikisi eriyane ka ateneanut a ngakiro.

¹⁴Kingarakisi lu ichanasi ani tokona itingitotor esi ibore nikaalan. Sodi ani moi eanyunete kesi dang ngiboro lukaalak, kingarakis esi alochan kus. Sodi toriyanea eboyor lo ingarakinotor esi.

¹⁵ Loger lo igiritere nagiran kona, “Itwaan ni achununi nakaalak, pealalak nakeng noi. Ani itwaan ni achununi nadikidio, peakidioko nakeng noi.”

¹⁶Kibuakinit sua Akuj alakara noi ani imuitor Tito lokojokon akingarakin esi loger lo kimuitor sua!

¹⁷Achamunet keng ngakiro kosi, kimuu ngesi noi akingarakin sodi tacham ngesi elope abunere nikus.

¹⁸Kimeunit sua ngesi ka lokaatoyok epei lo eyenikinitae alokanisae kadaang kotere etich lo itatamea ngakiro naajokak a Akuj.

¹⁹Ani eya nguna, aseut ngesi ngitunga a ngikanisae eruko ka sua na kisubea etich loajokon lo kotere ekipur a Ekapolon ka nabo akidodiun atamar kisaki sua akingarakin.

²⁰Kichoikinit sua atamar nyikiruorotor ngitunga ngiche sua niaronon kotere eger lo kiweikinitor sua etich lo a apatanu lo.

²¹ Kainyo kisaki sua akisub na iyookino, meere alongaren Ekapolon bon, nakaneni tani alongaren ngitunga.

²²Kongina bocha, kimeunit sua lokaatokosi ka kesi. Kining sua ngesi ngirwa ngikaalak kirukau atamar erai ngesi itwaan ni emina noi akingarakin. Ani kona tokona kimunor ngesi esi noi, esaki ngesi nabo noi akingarakin esi.

²³Ani alowae a Tito, erai ngesi erukitos kang lo kisubi ka ayong etich kingarakinit esi. Ani alowae a ngikaitotoi aluche alu erukito ka ngesi, emeunitae kesi alokanisae sodi taanyunea Kiristo ekipur.

²⁴Kidodikisi kesi amina kus sodi toyeneta ngitunga daang a ngikanisae atamar kiyookinit sua ngakiro na kiwogar kotere esi.