Read turkana 2 Ngikorintoi 9 Bible Online

2 Ngikorintoi 9 - turkana bible

2 Ngikorintoi 9

¹Nyejoikinit karika tani ayong kegirakini esi ngakiro a ngiboro alu emeanario lotunga a Akuj alu eya Yudea.

²Ayeni ayong atamar ichamito esi akingarakin, ngesi ewogar ayong anikus kotere nguna alotunga a Makedonia. Alimokini ayong kesi atama, “Napei alokaru alobeen adaun, esakito ngitunga a Akaya akingarakin.” Etonyou alemun kus ngikaalak kech.

³Ameunit tokona ayong ngikaitotoi lu sodi nyeeliworosi ngakiro na kiwogar sua esi ngapasiek. Nakaneni tolemunos esi akingarakin kesi loger lo alimunitor ayong.

⁴Nakaneni, ani kiruku ayong ka ngitunga lua Makedonia atorukautu esi nyesubakina ngakiro kus eriyan, kirumete sua ngileech lokojokon, arai mono pekilimu ngakiro a ngileech kus, ana kimunor sua esi noi!

⁵Engolik bocha ayong atamar ejoikinit ameuni ngikaitotoi lugu toberunos nikus sodi tosubakis mono ngakiro a ngainakinet ana kichikakinete esi ayong atamar ilemunete sodi atoriam ayong ibore ngini na abunio, nabo ileereuni atamar ipotonorete esi ani isakitotor, meere ani kitingakinitere.

⁶Kitamutu atamar itwaan ni itae ngikinyam ngidikidio, elemi ngalemet ngadikidio, nakaneni itwaan ni itae ngikinyam lukaalak, elemi ngalemet nakaalak.

⁷Ejoikinit itwaan daang robo ipotori ibore loger lo atiakunea ngesi, meere ekadakinit ngesi akipotor kori itingakinitae, kainyo emina Akuj itwaan ni ipotori ibore elakara.

⁸Nakaneni epedori Akuj ainakin esi nakaalak na idwangito na isakete esi. Sodi taanyununeta esi jiik daang na isakete esi, nabo taanyut elalak noi idwangito tani na isakete esi kotere asubea naajokak.

⁹ Loger lo igiritere nagiran kona, “Ipotonori ngesi a apataanu, nak ngikebootok erubi ajokis keng jik.”

¹⁰Nakaneni Akuj na erai ngesi inanakini eketan ngikinyam lu itao ka ngamugati na enyamio, kiinakini esi tani ngikinyam daang lu isakete sodi kiturup nabo kitaanyu esi ngalemet nakaalak anapatanu kus.

¹¹Kitabari ngesi esi jiik sodi tapatakerator esi ngirwa daang, sodi tobuakineta ngikaalak Akuj alakara kotere ngainakinet kus naanyut kesi anikosi.

¹²Kainyo etich lo isubete esi logo, ingarakini ngitunga a Akuj alochan kech. Nakaneni nabo dang, ebuakinete ngikaalak Akuj alakara lokojokon noi.

¹³Ani kotere na ileereunioto alotich alo kisubi sua kalo, ebuakinete ngikaalak Akuj alakara ani ineikinotor esi anupit ngakiro naajokak a Kiristo, na ilimorito esi, ka apatanu kus na imoreta esi ka kesi ta ngitunga luche.

¹⁴Nakaneni kilipakinete kesi esi kiminasi kotere ajokis naajokon noi na ianyut esi ani a Akuj.

¹⁵Atobuakisi Akuj alakara noi kotere ainakinet keng na emam ibore itemere!