Read turkana Ngigalatiae 2 Bible Online

Ngigalatiae 2 - turkana bible

Ngigalatiae 2

¹Adaunet a ngikaru a ngitomon ka nguomwon abu nabo ayong atobongosi ka Barinaba Yerusalem, kirukit ka Tito.

²Alosi ayong ani kedodikinea Akuj atamar tolot. Eriamariama ayong ka ngikarikok a ekanisa make, sodi atolimok kesi Ngakiro Naajokak a Yesu Kiristo na etatami ayong ngibukui lu nyerai Ngiyaudi. Asubi ayong kongina sodi nyeeliwor etich lokolong asubi ayong ka lo tokona asubi ayong epasit.

³Emam itwaan etingak erukitos kang Tito atamar kilengerae, tani bo kerai ngesi Egirikit dang,

⁴nakaneni bo dang, aya ngitunga lu etingakina najore kosi lu asakete akilenger Tito. Alomunito ngitunga ngulu najore kosi esakete aripun eger lo kiraakar sua ngitunga lu kilachakina dir ani a Yesu Kiristo. Asakete kesi akitiliwor sua ngirikon,

⁵ nyechamuna sua ngakiro kech tani wadiochichi, kainyo kisaki sua esi torubakis iwapito ngakiro a Akuj na eraakasi ngaka iteni.

⁶Nakaneni ani ngitunga lu ayenikinitae, alimunit ayong nugu kainyo nyakachit ayong atamar kerai ta kesi ngae, meere akwaan a itwaan nikalapatan ngesi emisit Akuj. Alimunit ayong atamar emam lu ayenikinitae ngulu ngakiro nakiteat naketeyenut ayong.

⁷Ani ikote neni, engolikinete kesi atamar kameari ayong Akuj akitatam ngibukui lu nyerai Ngiyaudi Ngakiro Naajokak, loger lo etiliworere Petero eketataman Ngiyaudi Ngakiro Naajokak.

⁸Kotere agogongu a Akuj, ketiliworio ayong emeanara a Akuj alobukui alu nyerai Ngiyaudi, aloger alo etiliworere Petero emeanara a Yesu Aloyaudi.

⁹Toyena Yakobo ka Petero ta Yoana dang lu ayeninikitae atamar eraakasi ngapirio atamar kainaki ayong Akuj etich lo etenoono logo. Sodi atotinga ayong ka Barinaba kesi ngakan emalata, kidodiu ibore ngini atamar kirai sua daang ngitunga ngipei. Atachamakinos atamar kisubi sua etich alobukui alu nyerai Ngiyaudi, tosuba kesi Aloyaudi.

¹⁰Akiroit apei bon kichikakis kesi sua ebaasi etamutu ngikebootok lu ayakasi najore kech, nguna kesi kemuit ayong akisub jiik.

¹¹Nakaneni naabunio Petero Antiok, etopeg ayong ngesi alotunga kainyo echwangakinit ngesi dir.

¹²Ani eringa ngitunga ngiche ameuni Yakobo nyedoluno, emujeenete Petero ka ngikaitotoi a ngibukui alu nyerai Ngiyaudi. Nakaneni naadoluneto ngitunga ngulu, tapalik ngesi akimujeenen ka kesi, kainyo aemit ngesi ngitunga lu asakete ngibukui lu nyerai Ngiyaudi kilengerae.

¹³Toema ngikaitotoi lu eraakasi Ngiyaudi ka Petero aapei, kibata tani Barinaba akurianu kech.

¹⁴Ani engolikini ayong atamar nyetenoono eboyor kech nyiwapap dir ka ngakiro naajokak a Yesu, atolimok ayong Petero alongaren kech daang atama, “Irai iyong Eyaudit, nakaneni ibooyi ngoon iyong loger a ebukut alo nyerai Eyaudit, meere loger a Eyaudit. Ikokini tokona iyong itingakini ngibukui lu nyerai Ngiyaudi kiboikinos loger a Ngiyaudi ai?”

¹⁵Iteni dir, kidounio ngoni kirai Ngiyaudi, meere, “Ngibukui lu nyerai Ngiyaudi lukasechak,” loger lo enyaritere kesi kongina.

¹⁶Nakaneni kiyeni ngoni dir atamar imarunio itwaan atamar etenoono dir ani a Akuj kotere ni enupea ngesi Yesu Kiristo, meere ani esubea na esakit etal. Kinup sua dang Yesu Kiristo sodi atachamunotor ka Akuj ani kinupitor Kiristo, meere akisub na esakit etal. Kainyo emam itwaan echamunosi ka Akuj ani esubea na esakit etal.

¹⁷Ani kerai nakisakea ngoni achamun ka Akuj ani kiliworor ngipei ka Kiristo, sodi tatakanu atamar kirai ngoni ngikasechak loger lopei a ngibukui alu nyerai Ngiyaudi, idodiunit ibore ngini atamar Kiristo ngesi erikit akisech a? Mam jik!

¹⁸Ani kalomak nabo ayong akirokun ngakiro a etal alo kolong ealari, ekoni ayong itwaan ni echwangakinit etal.

¹⁹Ani alowae alo etal, ekok ayong itwaan nikaar etal, sodi ebooyo ani a Akuj. Kitoaka ayong ka Kiristo aapei anapir keng.

²⁰Nyeringa tokona erai ayong bon ayari, pearai Kiristo eyari anikang. Akiyar na tokona ayari ayong naga, ayari anupit Lokookeng a Akuj, lo kamina ayong sodi tajal akiyar keng kotere ayong.

²¹ Nyasaki ayong akinger ajokis a Akuj. Nakaneni ani kechamunosi itwaan ka Akuj kotere etal, idodiunit ibore ngini atamar ketoani kolong Kiristo pas!