Read turkana Ngigalatiae 3 Bible Online

Ngigalatiae 3 - turkana bible

Ngigalatiae 3

¹Etige Ngigalatiae, ngikabangabangae! Ngae kirakari esi? Esisao kolong alongaren kus ngakiro na ileerete na atoanea Yesu Kiristo anapir!

²Tolimokinae mono esi ayong akiroit napei naga, ianyunete esi Etau a Akuj ani isubeta ngakiro na esakit etal kori na iirareta ngakiro naajokak tonupa?

³Nyo kitabangaanit esi kona? Isiakinete kolong esi kirikit Etau a Akuj, isakete tokona esi arumor a agogongu kus a ngikulepek a?

⁴Tokona, aliwor ngichan daang lukolong ianyunete esi ngika pas a? Nyetamit atamar ikote neni!

⁵ Ikwa kitaanyuni esi Akuj Etau keng ka akisub ngakitoodikinet nakailiilok anikus ani isubeta esi na esakit, etal kori na iirareta esi ngakiro naajokak tonupa?

⁶Kitamasi eger ka Aburaam, loger lo igiritere nagiran kona, “Anupi ngesi Akuj ani kotere anupit ngina, tacham Akuj ngesi atamar etenoono eboyor keng.”

⁷Echamit esi iyenete robo atamar ngalesea ka Aburaam na iteni dir kesi ngitunga lu enupito Akuj.

⁸Aberakinoi kolong akidwar anagiran atamar echamuni Akuj ngibukui lu nyerai Ngiyaudi kotere eger a anupit. Sodi tolimok Akuj Aburaam Ngakiro Naajokak anagiran tama, “Epiari Akuj ngitunga daang kotere iyong.”

⁹ Anupi Aburaam Akuj, topiarae, nakaneni daang lu enupete Akuj, epiario loger keng.

¹⁰Ilamam ngitunga daang lu igienosi akiwapit etal, kainyo igiritae nagiran kona, “Itwaan cha daang ni nyenupi ngakiro daang na igiritae nakitab a etal, ilamam!”

¹¹Tokona, etakani dir atamar emam itwaan echamun ka Akuj kotere etal. Kainyo igiritae nagiran kona, “Itwaan ni echamuni Akuj kotere anupit keng, ngesi bon eyari.”

¹² Nakaneni etiakak etal ka anupit. Erai ikoni eger lo igiritere nagiran kona, “Itwaan cha daang ni esubi ibore daang ni esakit etal, eyari.”

¹³Kilachuni ngoni Kiristo alolamit a etal, ani etiliworea ngesi ngilam lu araakasi ngiyok ngikeng, kainyo igiritae nagiran kona, “Ilamit Akuj itwaan daang ni inenekino lokitoe.”

¹⁴Asubasi ngakiro nguna sodi taanyuneta ngibukui lu nyerai Ngiyaudi apiaro ani a Yesu Kiristo. Apiaro ngina ngesi nakolong echikakini Akuj Aburaam, sodi ataanyuneta ngoni Etau lokichikakini Akuj ani kinupitor.

¹⁵Ngikaitotoi kang, esisauni ekitetemes lo iyenete esi daang, ngitunga ngiarei na echamuneta akiroit kikongo, emam ipei kech ni esaki akiloch ngakiro nguna kori akisech ngache.

¹⁶Tokona, ekong Akuj ka Aburaam ta ales keng echikakin. Nyigiritae nagiran elalak atamar, “Ngalesea”, nakaneni erai, “ales”, ngesi atamar itwaan ipei bon ni erai Kiristo.

¹⁷Eger a ngakiro ana asaki alimun ngesi lo atamar, ekongete Akuj ka Aburaam sodi kichikak atamar etemokini ngakiro nguna. Nyinyasuni etal lo esidiun ngikaru ngamiae ngoomwon ka ngatomwon-uni achamunet ngina, kikisa akikonget a Akuj.

¹⁸ Kainyo ani kerai ainakinet a Akuj aka etal, ikwa nyeringa erai aka achamunet. Nakaneni, arai kotere achamunet ngesi ainakinea Akuj Aburaam ainakinet ngina.

¹⁹Kerai tokona kolong etal eka inyo? Eatakinio etal sodi kidodiunea akichwangakinet nakaneni asakio torubak eyei tanang ngirwa lu ebunio ales a Aburaam nakolong arai ngesi ekongokinit Akuj achamunet. Ayaunete ngimalaikae etal ngolo sodi kikob itwaan.

²⁰Nakaneni emam ekekoban esakitae ani eraakar itwaan ipei, nakaneni erai Akuj apei.

²¹Idodiunit tokona ibore ngini atamar engerit etal ngachamunet a Akuj a? Mam jik! Kainyo arai kolong taanyunito ngitunga etal lo eyauni akiyar, kechamuna itwaan daang ka Akuj ani iwapea etal ngolo.

²²Nakaneni igiritae nagiran atamar eraakasi ngitunga daang ngikasechak, nakaneni erai lu enupete ngakiro a Yesu Kiristo kesi einakinio ainakinet na ichikakinitae.

²³Kolong eringa ngirwa lu enupitere Akuj nyenanga, kikoni ngoni ngitunga lu kienit etal, tanang ngirwa lukidodikinere ngoni eger lo kinupea ngakiro a Akuj.

²⁴Nakaneni arai kolong etal kirikit ngoni tanang ngirwa lu abunio Kiristo, sodi atachamunotor ngoni ka Akuj kotere nikinupitor ngakiro keng.

²⁵Kona tokona anangea ngirwa lu enupitere Akuj, nyeringa tokona nabo etal kirikit ngoni.

²⁶Erai ni inupitotor esi Akuj ngesi iraakatar esi talokookeng a Akuj, ani iraakatar ngipei ka Yesu Kiristo.

²⁷Kibatisao kolong esi tarata ngipei ka Kiristo, ikokis tokona esi ngitunga lu inap eboyor a Kiristo a elope.

²⁸Nakaneni emam ibore etiakit Ngiyaudi ka ngibukui lu nyerai Ngiyaudi, ngirikon ka ngitunga lu nyerai ngirikon, ngikiliok ka ngaberu, iraakasi esi daang ngipei ani imorikinotor ka Yesu Kiristo.

²⁹ Ani kiraakasi esi ngitunga a Kiristo, iraakasi esi ngalesea ka Aburaam, kotere nguna, ianyunete esi nakichikak Akuj.