Read turkana Ngigalatiae 4 Bible Online

Ngigalatiae 4 - turkana bible

Ngigalatiae 4

¹Nakaneni alimuni ayong kona, ani eringa ekeruman a ebari ka apakeng erai ikoku, emam ibore etiakit ngesi ka ekedalan, tani kerai ebari daang ekeng.

²Ani eringa edit, eya ngitunga lu erikito ngesi echoikinito ebari keng tanang ngirwa lu etiakunit apakeng.

³Aloger alopei kangolo, nakolong kikonea ngoni ngide, kirai ngoni ngirikon a ngipean alu epolokinito ngakwapea nugu.

⁴Ani enangi akolongit na achamitae, tomeu Akuj Lokookeng. Kidou ngesi aberu sodi kiboi iwapit etal a Ngiyaudi,

⁵ ekokini neni sodi talachunea lu ewapito etal, sodi atoliworotor ngoni talokookeng a Akuj.

⁶Kona iraakatar esi talokookeng, ameu Akuj Etau a Lokookeng tooma ngitai yok, Etau lo epodonokini ebala, “Apa, Apakang.”

⁷Kongina bocha, nyeringa tokona iyong irai ekedalan, iliwor ikoku. Ani kirai iyong ikoku keng, irumi iyong daang na idaritor Akuj talokookeng.

⁸Kolong sek eringa esi nyeyenuna Akuj, iraakasi esi ngirikon a ngakujo anasubuna.

⁹Ani kona tokona iyenuneta esi Akuj, nabo kiyenu Akuj esi, nyo nabo isaketa esi abongor lopean lupasiek lu kisieniyete ngulu? Nyo isaketa esi nabo aliwor ngirikon kech?

¹⁰Abe imisikinito esi akirichit ngirwa ngiche, ngilapio, ngakamusio ka ngakiporosea ta ngikaru.

¹¹Ketubulito ayong ngakiro kus! Idodiunit tokona ibore ngini atamar aliwor etich daang lokolong asubi ayong anikus epasit a?

¹²Kemaimai ayong esi ngikaitotoi kang atamar kikwaanikinos kare ka ayong, kainyo kikwaan ayong dang ka esi. Nyesechakina esi ayong.

¹³Iyenete esi atamar ketatami ayong esi ngakiro naajokak kolong ekingaren ani adeakar.

¹⁴Nakaneni tani nakechanitor ayong esi noi a edeke kang, ipot esi nyikimenyasi ayong kori nyikingeor. Arai ipot esi kitopeyon ayong loger lo itopeyoneta emalaikat lo ebunit anadis, kitopeyon esi ayong loger lo itopeyoneta Yesu Kiristo.

¹⁵Ilakara esi lokojokon noi! Anukiro apotu? Alimuni ayong atamar, kikutunito esi ngakonyen kus kiinakis ayong, arai topedorete akikokin neni.

¹⁶Aliwor tokona ayong emoit kus ani kalimokinea esi ngakiro na iteni a?

¹⁷Kiminasi esi ngitunga luche ngulu, nakaneni nyikiminasi naajokak. Esakete kesi akitiak ayong ka esi sodi tominakineta esi kesi.

¹⁸Tokona, ejok aminanu kongina kotere eboyor loajokon, eraakasi nguna ngaka iteni ngirwa daang, meere nakirukitor ayong ka esi bon.

¹⁹Ngide kang luminan! Loger lo eriabar aberu esaa lo esakea akidoun, ariaba ayong dang kongina kotere esi, tanang akolongit na ileereunio Kiristo anikus.

²⁰Arai bo tokona atorukito ka esi dang! Kaanyu cha ayong eger lo ejoikinit kesuruorea esi kainyo ketubulito ayong ngakiro kus!

²¹Kimiekisi kengit esi lu isakete kiwapa ngakiro a etal. Isakete esi kiirasi ngakiro na igiritae Lotal a?

²²Igiritae atamar aya Aburaam ngide lusapa ngiarei, arai ipei ika aberu ana arai akedalan, tarai niche ika aberu anakuuta.

²³Edounio lokookeng lo aberu anakedalan loger lopalem idounere ngide luche, nakaneni edounio lokookeng lo aberu anakuuta ani echikakinea Akuj atamar idounio.

²⁴Eraakasi ngakiro nugu ngakisikwaanet, ikwaan ngaberu naarei nguna ka ngachamunet ngaarei. Ngina idounio ngide keng eraakasi ngikedalak ngesi Agar, ikwaan ngesi ka achamunet na a Emoru a Sinai.

²⁵Ikwaan Agar ka Emoru a Sinai lo eyei nakwap ka Arabia. Erai Agar ekitetemes a ere a Yerusalem alo a ngirwa kalu, alo eraakatar ngitunga lu eya neni daang ngirikon.

²⁶Nakaneni elachakina dir Yerusalem lo a adis, nakaneni ngesi erai itioyok.

²⁷ Kainyo igiritae kona, “Talakar iyong nakolup na nyidoununi! Kirema sodi kimaritetek ilakara, iyong na nyeriabakina a ache! Kainyo eanyuni aberu nakolong aisikinio ngide lukaalak, akidwang lu a aberu ana iusitae.”

²⁸Iraakasi tokona esi ngikaitotoi kang, ngide a Akuj kotere akichikakinet keng, loger lokolong a Isaka.

²⁹Ngirwa ngulu, aboliar edia lo edounio loger a ngide aluche lo edounio kotere agogongu a Etau a Akuj, ikote ngakiro neni tani tokona.

³⁰Nakaneni anukiro igiritae nagiran? Igiritae kona, “Kitwarak aberu nakedalan ka lokookeng, kainyo nyirumete lokookeng a aberu anakedalan ka lokookeng a aberu anakuuta ngibaren ka apakech aapei.”

³¹ Tokona bocha ngikaitotoi kang, meere ngoni ngide a aberu anakedalan, nakaneni kirai ngide a aberu anakuuta.