Read turkana Ngigalatiae 5 Bible Online

Ngigalatiae 5 - turkana bible

Ngigalatiae 5

¹Kilachak Kiristo ngoni nyikiliwor ngirikon! Kiboikinos tokona robo iraakasi ngitunga lu ilachakina, warasi nyiliworosi ngirikon nabo.

²Topupokisi! Kalimokinit ayong Paulo esi atamar, ani kichamut esi kilenger, idodiunit ibore ngini atamar emam ibore niajokon ianyunito esi ani a Kiristo.

³Alimokini nabo ayong itwaan ni echamuni akilengero atamar echamit ngesi iwapi etal daang.

⁴Itiakasi esi ka Kiristo, lu isakete achamun ka Akuj ani iwapitotor etal. Ipakarosi esi anajokis a Akuj.

⁵Ani alowae kosi, kigieno sua atamar kichamun ka Akuj. Ibore nikidarit sua ngini a agogongu a Etau a Akuj alo esubi etich ani kinupitor sua Akuj.

⁶Kainyo nakimorikinor ngoni ka Yesu Kiristo, nyikitiakak ngoni erai kilengeritae kori kemam, anupit na idodiuna anamina ngesi bon itemokino.

⁷Ajok kolong eboyor kus etenikina! Ngae kitapalikini esi akiwap ngakiro na iteni? Ekokini ngesi kisupi esi ai?

⁸Meere ngisup ngulu eka ngolo kinyarit esi.

⁹“Ekitoe lodiochichi lo itubui ngamugati, itubui ngakiria daang etia ni etia.”

¹⁰ Nakaneni eringa ayong kegieno esi. Kotere nikimorikinor ngoni ka Ekapolon Yesu, kegieno ayong esi ayeni atamar emam ibore kiree esi. Itwaan cha daang ni kichani esi, irirae Akuj, tani kerai ngesi ngae.

¹¹Ani alowae kang, ngikaitotoi, ani karubak ayong etatami atamar ejok akilengero, nyo eringa kaboliare ayong? Arai taraakas nguna ngaka iteni, pekeyaunito ngakiro na akitu a Kiristo alomusalaba na etatami ayong ngichan.

¹²Esibit cha ayong totubos ngitunga lu kichanete esi, kimiekisi totubos make!

¹³Ani eliwor esi ngikaitotoi kang, kinyarao kolong esi toliworos lu ilachakina. Nakaneni warasi alachakina na nyeeliwor ibore ni iwapeta esi ngakiro a etereku aloaronon. Ejoikinit esi ingaranakinosi ani ichamatar.

¹⁴Kainyo echunakinitae ngakiro a etal daang Lotal epei, “Tominak ekidunyet kon loger lo iminar iyong akwaan kon a ilope.”

¹⁵ Ani kiboyoto esi ikonyakonyasi nabo towanas loger a ngitieng, tochoikinos robo sodi nyiinyasunosi make.

¹⁶Ngakiro na eraakasi kesi alimunit ayong nugu, kimiekisi Etau a Akuj torik eboyor kus, sodi nyiiwap nabo esi jik eboyor a etereku a ngawat.

¹⁷Kainyo ngakiro na iterekuyarito eboyor a itwaan meere kesi na iterekuyarito Etau a Akuj, ani na iterekuyarito Etau a Akuj, meere kesi na iterekuyarito eboyor a itwaan. Eremem luarei ngulu, nakaneni idodiunit ibore ngini atamar nyikipedori ngoni akisub na kisaki akisub.

¹⁸Ani kirikit esi Etau a Akuj, nyikirikit esi etal.

¹⁹Ileerete ngakiro na esubasi aloboyor a itwaan. Etakanuunete anakiro ana ikote elomit, emalaanu, ngakiro a ngileech,

²⁰akilipit ngakujo nasubuna ka akapel. Eremonokinoi tongolopae, arorokanut, angoyeenen, abolo, atiakatiaka ka akipakanar ngajorei kotere ayan,

²¹etereku, elewas, amera a ekimuje ta ngakiro nache naaronok na ikote nugu. Kechikichiki ayong esi nabo loger lokolong aberakinor akichikichik, atamar nyeanyunete lu esubete ngakiro nguna apolou a Akuj.

²²Nakaneni ngakiro na itorunito loboyor lo kirikitor Etau a Akuj kesi amina, alakara, ekisil, anaikinit ngakiro, ajokis, apatanu, aliwor nikimunoi,

²³akitiditeuna ta akiapunit ngakiro. Emam etal engerit ngakiro nguna.

²⁴Ngitunga lu eraakasi ngika Yesu Kiristo, ekokis ngitunga lu atoana eboyor kech ka etereku kech loaronon daang.

²⁵Kitaanyu ngoni Etau a Akuj akiyar, ejoikinit ngesi tani erikit eboyor yok.

²⁶Nyejoikinit ngoni kiwoga, kori kibenya make kori kiterekuyanar.