Read turkana Ngigalatiae 6 Bible Online

Ngigalatiae 6 - turkana bible

Ngigalatiae 6

¹Ngikaitotoi kang, ani kesech itwaan idio anikus, ejoikinit esi lu eyei Etau a Akuj irikinete ngesi. Nakaneni ejoikinit esi isubete kongina a apalaanut. Tochoikinos esi sodi nyikining esi dang.

²Kingaranakinos make nakitingeta ngichan, sodi kiyookineto etal a Kiristo.

³Ani kitamit itwaan atamar arai ngesi ekapolon, tarai itwaan nipasit, ingala ngesi bon.

⁴Ejoikinit itwaan daang itemi eboyor keng lokojokon. Ani kejok eboyor keng, sodi kinisakin ngesi a ibore ani asub ngesi, tojongo akisikwaan ibore ni asub ngesi ka ibore ni asub itwaan niche.

⁵Kainyo ejoikinit itwaan daang itiri ngichan keng a ilope.

⁶Ejoikinit itwaan ni itatamio ngakiro a Akuj emorete ka lo itatami ngesi ngiboro luajokak daang lu etingit itwaan ngini.

⁷Warasi nyiingalasi make, emam itwaan emodi Akuj. Kainyo elemi itwaan ngalemet na itemem ka ibore ni itakini ngesi.

⁸Itwaan ni iroki naaronok aloboyor keng, eanyuni ngakiro na ikote ngalemet nakikusaunete. Ani kiwap ngesi ngakiro a Etau Akuj, eanyuni alotau kangolo ngakiro na ikote ngalemet a akiyar ana nyedaun.

⁹Warasi robo nyikibur akisub naajokak, kainyo ani pekilou esi akisub naajokak, enangi akolongit nakianyunea ngoni ngakiro na ikote ngalemet.

¹⁰Tokona bocha, ani keyei kona kikoni, echamit ngirwa daang kisubea ngitunga daang naajokak, tarai cha noi lu kirai ka ngoni ngikanupak aapei.

¹¹Kingolikisi eger lokegirakinea ayong esi ngagiran naapolok a akan kang a ilope!

¹²Ngitunga lu esakete kitojokae kesi kitinganakinete esi atamar kilenger. Esubete kesi kongina sodi nyeboliare kotere ni atoanea Yesu anapir.

¹³Nyiwapito tani lu ilengeritae etal, erai esakete kesi esi kilenger sodi kiwogatar ni kilengereta esi.

¹⁴Ani alowae kang, erai akitu naatoanea Ekapolon Yesu Kiristo anapir ngesi bon ewogar ayong. Kotere ni atoanea Kiristo anapir, ikoni eboyor loaronon ibore ni atoana anikang nabo ekoni ayong ibore nikatoan anakwap.

¹⁵Nyekachitae erai kilengeritae itwaan kori kemam, ibore ni esakitae ngesi itwaan aliwor nikitetet.

¹⁶Ani lu iwapito etal lo aloboyor kech, agasi atamar kiruko ka ekisil ta ngisien, meere kesi dang make, tani ngitunga lu eseunit Akuj daang!

¹⁷Ani arumori tokona, nyasaki itwaan kechan nabo, kainyo idodiunito ngaporos na eya nakwaan nakang atamar arai ayong ekasuban etich a Yesu.

¹⁸Ngikaitotoi kang, agasi ayong atamar kiruko esi daang ka ajokis a Ekapolon yok Yesu Kiristo. Aamen.