Read turkana Ngiepesoi 1 Bible Online

Ngiepesoi 1 - turkana bible

Ngiepesoi 1

¹ Ayong Paulo lo arai emeanara a Yesu Kiristo kotere echami a Akuj, ngesi kegirakinit esi abarua naga. Kegirakinit esi ngitunga a Akuj lu iyakasi Epeso, lu iliworosi lu kimunoi dir ani imorikinotor aapei ka Yesu Kiristo.

²Agasi atamar kitaanyu esi Akuj Apayok ka Ekapolon Yesu Kiristo ajokis ka ekisil.

³Kimiekisi atobuakisi Akuj na erai Apakeng a Ekapolon yok Yesu Kiristo alakara! Kainyo kipia ngoni ani kimorikinor aapei ka Kiristo, kitaanyu ekeny daang lo Etau a Akuj lo eyei wadaang a adis.

⁴Kolong eringa tani akwap nyesubuna, kiseuni Akuj ngoni atoliworos ngikeng ani kimorikinor aapei ka Kiristo, sodi atoliworotor ngoni lu kitaleuno nabo lu nyikisechit anikeng. Kotere amina keng

⁵atiakuni kolong Akuj a angorot akitaraun ngoni ngide keng ani a Yesu Kiristo, amina ngesi nguna nabo asakit kikokis neni.

⁶Kimiekisi epuro Akuj kotere apolou a ajokis keng, kotere nikiinakinea ngesi ngoni Lokookeng lominat pas!

⁷Kotere ni atoanea Kiristo, kilachakin ngoni, ngesi atamar, kirimakin ngasechesea yok. Etenoono dir ajokis a Akuj,

⁸ nakitaanyuni ngesi ngoni lokojokon noi, elal noi emam ibore itemere! Kotere aosou ka achwaanu,

⁹asubakini Akuj nakolong atiakunit. Sodi kiteyen ngoni ngakiro namunonoe nakolong areat ngesi atamar eyookini ani a Yesu Kiristo.

¹⁰Ngakiro na ereat Akuj nguna, na iyookinosi na enangea ngirwa lu esakit Akuj, ngesi echunakini wapei ngiborei daang lu eya nadis ka lu eya kwap, erai Kiristo ngesi erai ekarikon kech.

¹¹Esubasi ngakiro daang loger lo ereat Akuj ka lo etiakunit ngesi, nakaneni kiseuni ngoni Akuj atarata ngitunga keng kotere echami keng lokimorikinor ngoni aapei ka Kiristo, itemem ka nakolong sek atiakunit ngesi anakisiakinet.

¹²Kimiekisi sua lukolong kisiauni akigienokin Kiristo epuro apolou a Akuj!

¹³Iliworosi esi dang ngitunga a Akuj na iirareta ngakiro na iteni a Akuj, Ngakiro Naajokak nakitaanyunete esi ayuuno. Inupete esi ngakiro a Kiristo, sodi kitogerak Akuj esi agerasit a Etau keng ani kitaanyunea esi Etau keng lokolong kichikakinit.

¹⁴Etau a Akuj ngesi kiweikinit ngoni atoyeneta atamar kianyuni daang nakolong echikakinit Akuj ngitunga keng. Itoodiunito nguna atamar itaanyuni Akuj lu eraakasi ngikeng alachakino nakajik. Kimiekisi epuro apolou keng!

¹⁵Kotere nguna, napei kolong eirarea ayong atamar inupa esi ngakiro a Ekapolon Yesu nabo iminasi ngitunga daang a Akuj,

¹⁶nyepalikina ayong abuakinit Akuj alakara kotere esi. Ketamunit ayong esi anakilipet kang

¹⁷nabo elipit Akuj a Ekapolon yok Yesu Kiristo, Apa lo epol atamar kitaanyu esi Etau a Akuj. Kitiliwori Etau ngolo esi lukoosok sodi kidodik esi Akuj, toyenuneta esi ngesi.

¹⁸Agasi ayong atamar tangaar ngitamen kus taanyungareta akicha keng. Sodi toyeneta esi ngakiro na igienoi nakinyarak ngesi esi, ka etiae lo ejokia noi apiaro na ichikakinit ngesi ngitunga keng.

¹⁹Ka eger lo etenoonio noi apolou keng na esubi etich aniyok alu kinupit Akuj. Ikwaan agogongu na esubi etich aniyok ka agogongu nakaagongon noi

²⁰nakolong eteyaruni Kiristo anakitu, kisiboik ngesi nakan na aloteten a adis.

²¹Ani eyei ngesi kaina, epolot ngesi noi idwangit ngikapolok daang lu eya nadis kalu eya nalup, idwangit ngapolon ka ngationisio daang. Eyenikinitae ekiro keng noi akidwang ngirora luche daang lu iturutoe anakwap kana ka nache monan isidiun.

²²Etook Akuj ibore daang nia Kiristo topolok ngesi, epotor ngesi ainakin ngitunga a ekanisa erai Ekapolon.

²³ Eraakasi ngitunga a ekanisa akwaan a Kiristo, eten Kiristo ngitunga a ekanisa ani eraakar ngesi etemok ibore daang awadaang.