Read turkana Ngiepesoi 2 Bible Online

Ngiepesoi 2 - turkana bible

Ngiepesoi 2

¹Kolong ekingaren, ikote esi lu atoakito ngitai kotere ngakiro na ichwangakinito ka ngasechesea kus.

²Ngirwa ngulu, iwapito esi eboyor loaronon a akwap, iwapito Ekipe lo epolokinit ngipean daang lu irimito kidiama, ngesi epolokinit ngitunga lu nyenupito Akuj.

³ Kikwaan tani kolong ngoni daang ka kesi, kiboi kiwapit eboyor loaronon a etereku, kisubi ngoni na ajoikinito ngawat ka ngitamen yok. Kiboi ngoni ananyunyura a Akuj loger a ngitunga aluche kadaang.

⁴Nakaneni emam ibore itemere ngisien a Akuj nabo etiono amina nakiminar ngesi ngoni,

⁵tani kolong nakikonea ngoni ngitunga lukatoak kotere ngasechesea yok, kiteyaru ngesi ngoni ka Kiristo aapei. Erai ajokis a Akuj ngesi kiyuunere esi.

⁶Kona kimorikinor ngoni ka Yesu Kiristo aapei, kiteyaru Akuj ngoni ka ngesi eboikinos nadis.

⁷Asubi ngesi nguna kidodiunea ngirwa lumonan isidiunosi eger lo etionio noi ajokis keng anamina ana kidodikinit ngesi ngoni ani a Yesu Kiristo.

⁸Kainyo kiyuun esi a ajokis a Akuj ani inupitotor Akuj. Nyianyunete esi ani eyakatar ngakiro itionikinete, erai ainakinet a Akuj.

⁹Nyitorunit tani lotichisio lu isubete esi, sodi tongop itwaan ibore ni inisar.

¹⁰Kirai ngoni ngisubuna a Akuj, ani kona kimorikinor ngoni ka Yesu Kiristo aapei, echamit ngoni kiboi eboyor loajokon lokolong kirekinit ngesi ngoni atamar eboikinos.

¹¹Kitamutu atamar ikote kolong esi ngibukui lu nyirai Ngiyaudi ai, esi lu kinyarito Ngiyaudi “lu nyikilengeritae” Ngiyaudi lu elimokina atamar, “kilengeritae” (taraakas ngakiro nguna na esubeta ngitunga ngawat kech).

¹²Toyena atamar itiakara esi ani a Kiristo ngirwa ngulu. Iraakasi esi ngitunga lugelayek peimorikina ka ngitunga luseuna a Akuj. Pekimarunitae esi anachamuneta ana ekongokini Akuj ngitunga keng. Ibooyete esi anakwap kana emam ibore igienosi nabo amam Akuj anikus.

¹³Nakaneni tokona, kona irauneta esi ngipei ka Yesu Kiristo, kitapuun esi lukolong iloka diyete Akuj kotere ngaakot a Kiristo na abukorosi.

¹⁴Kainyo kiinu ngoni Kiristo elope ekisil ani emorikinea ngesi Ngiyaudi ka ngibukui lu nyerai Ngiyaudi toliworos ngipei. Kotere ni atoanea ngesi, achaka ngesi aremo nakolong ekoni awas nakitiakit ngoni.

¹⁵Kitongopea ngesi etal a Ngiyaudi ka ngakichiket keng ta ngikitetio daang a ngitalio, sodi kitiliworea ngesi ngibukui luarei ngulu ngitunga ngipei lu emorikin ka ngesi aapei, kikok eyauni ekisil neni.

¹⁶Kotere ni atoanea Kiristo anapir, enyasu ngesi aremo kech, nabo emorik ngibukui ngulu arata ngipei sodi tobuu kesi nia Akuj.

¹⁷Kongina bocha, abuni Kiristo kitatam esi ngibukui lu nyirai Ngiyaudi lusek iloka ani a Akuj, Ngakiro Naajokak a ekisil, kitatam tani Ngiyaudi lu aapiyete ani a Akuj.

¹⁸ Ngoni daang lu kirai Ngiyaudi ka ngibukui lu nyerai Ngiyaudi kiponi nia Akuj Apayok a Etau a epei kotere Kiristo.

¹⁹Tokona bocha, nyeringa nabo esi ngibukui lu nyerai Ngiyaudi iraakasi ngipeyok kori ngitunga lugelayek, iliworosi tokona esi ngipei ka ngitunga a Akuj nabo ngiyenet a Akuj.

²⁰Iraakasi esi dang epewae a aduket ana kolong esiakinete ngimeanara ka ngikadwarak a Akuj, Yesu Kiristo elope ngesi amoru naapolon igangit akai na edukio ngina.

²¹Erai Ngesi igangit akai ngina daang kiten sodi topolooror toliwor akai a Akuj na italeuno.

²²Kotere ni imorikinotor esi ka ngesi aapei. Kidukio esi dang aapei ka luche toliworotor ni ibooyo Akuj a Etau keng.