Read turkana Ngiepesoi 3 Bible Online

Ngiepesoi 3 - turkana bible

Ngiepesoi 3

¹Kotere nguna, elipit ayong Paulo Akuj. Ayong lo arae eenat kotere Kiristo ka esi ngibukui lu nyiraakasi Ngiyaudi.

²Iirasi esi iteni atamar kotere ajokis a Akuj, ketaanyun ayong etich lo atosub niajokon kengarakinea esi.

³Edodiuni Akuj ngakiro namunonoe nugu sodi ketoyen ayong. (Egirit ayong eger a ngakiro kanguna a aurianut,

⁴ani kisomata esi ngakiro na egir ayong, iyenunete esi eger lo ayenea ayong ngakiro namunonoe a Kiristo.)

⁵Pekolong sek alimokinitae ngitunga ngakiro namunonoe nguna, nakaneni kotere agogongu a Etau a Akuj, edodik tokona Akuj ngimeanara lu italeuno ka ngikadwarak keng.

⁶ Ngakiro namunonoe nguna kesi na ikote nege kotere ngakiro naajokak, epiari Akuj ngibukui lu nyerai Ngiyaudi dang ka Ngiyaudi aapei. Eraakasi kesi dang ngika a akwaan anapei kangina nabo emorete akichikakinet nakolong ekongio Akuj ani a Yesu Kiristo.

⁷Aliwor ayong eketataman ngakiro a Akuj kotere ajokis a Akuj na emam ache ikwaanatar, naketaanyuni ngesi ayong a agogongu ana esubea ngesi etich.

⁸Tani karai ayong lo nyekayenikinitae noi akidwang ngulu italeuno a Akuj daang lu nyeyenikinitae, abu Akuj kainak ayong ajokis na etatamea ngibukui lu nyerai Ngiyaudi ebari a Kiristo lo nyengichunio etiae keng,

⁹sodi esingolik ngitunga daang eger lo ichichiyere namunonoe kolong areat Akuj. Emunonit kolong Akuj na erai Akasuban a ibore kadaang ngakiro nugu ngirwa daang.

¹⁰Arai ekokini ngesi neni sodi ani ngirwa lu tokona lugu, toyeneta ngapolosio a ngimalaikae ka ngationisio a adis aosou a Akuj nagelagela, alotunga a ekanisa.

¹¹Asubi Akuj nguna kotere ngakiro nakajik na areat ngesi, na eyookini ngesi ani a Yesu Kiristo, Ekapolon yok.

¹²Nyikiriaka ngoni alosit nia Akuj a atitinyu ani kimorikinor aapei ka Kiristo, atonupa ngakiro keng.

¹³Tokona bocha, kemaimai esi atamar warasi ngakiro na kaboliare ayong kotere esi nyiilout ngitai kus, kainyo eraakasi ngakiro nguna nakingarakinet esi.

¹⁴Kotere nguna, ariediki ayong alongaren Akuj Apa,

¹⁵na erai ngesi isiakinit ngalesea ka ngiborei daang lu eya nadis ka nakwap.

¹⁶Elipit Akuj atamar kitaanyu esi agogongu a Etau keng, alobari alo a apolou keng, sodi kitenik agogongu ngina ngitai kus totitinyeketo.

¹⁷Elipit nabo ayong atamar tolom Kiristo lotai kus ani inupitotor esi ngakiro keng. Elipit ayong atamar tosubut esi lu ilijakina ngaten ka ngatiak kus namina,

¹⁸sodi taanyuneta esi ka ngikanupak daang agogongu na iyeneta eger lo epoloo noi amina a Kiristo emam kona itemio awoyau ka aurianut a ngiwaitin keng kadaang.

¹⁹Ee, toyeneta esi amina a Kiristo na idwangit aosou daang, sodi kilelebun ateneanut a Akuj daang nikus.

²⁰Epuro lo epedori asubakin nakaalak na idwangito na kilipa ngoni kori nakitamit, kotere agogongu keng na esubi etich aniyok.

²¹Kimiekisi Akuj tagatae alotunga a ekanisa ka nia Kiristo, ngirwa daang, nakajik! Aamen.