Read turkana Ngiepesoi 4 Bible Online

Ngiepesoi 4 - turkana bible

Ngiepesoi 4

¹Tokona, kemaimai ayong lo kaenitae kotere ni asubea etich a Ekapolon esi atamar, kibooyoto eboyor lo itemem ka eger lokolong kinyaraa esi Akuj.

²Toliworos jiik ngitunga lu itiditeuna ka lukaalimok ta lu etitinyonokinete ngakiro. Kidodiutu atamar iminan esi ani inaikineta ngakiro na ichwanganakinete luche.

³Kirichakisi aliwor ngipei kirikit Etau a Akuj a ekisil alo kimorikinit esi aapei.

⁴Eyei akwaan apei ka Etau a Akuj epei, loger lo eraakar akigieno nakinyaraa esi Akuj apei.

⁵Eyei Ekapolon epei, apei akiroit na anupitae ka akibatiso apei,

⁶ eyei Akuj apei na erai Apakeng a ngitunga kadaang, na erai Ekapolon kadaang, esubi etich ani eya daang nabo eyei nibore daang.

⁷Aanyu ipei yok daang ajokis erai ainakinet, itemem ka na epotori Kiristo.

⁸ Loger lo igiritere nagiran kona, “Naalosio ngesi kidiama, toriko ngirikon lukaalak, dio ainanakin ngitunga ngainakinet.”

⁹Tokona nyoni idodiunit atamar “alosi kidiama?” Idodiunit atamar esiauni ngesi totiyaar kwap nalup.

¹⁰Nakaneni ngolo atiyaun kwap ngesi lopei alosi kidiama, kipor tani adis, sodi minio ngesi wadaang a akwap.

¹¹Erai ngesi “ainanakini ngitunga ngainakinet”, aseuni ngiche toliworos ngimeanara, toliworos ngiche ngikadwarak a Akuj, toliworos ngiche ngiketutukok ngakiro a Akuj, toliworos ngiche ngikeyokok ngitunga a ekanisa ta ngiche toliworos ngiketatamak.

¹²Asubi ngesi kongina sodi tosubakinotor ngitunga keng lubekon kitemokinotor akisub etich lo erai eka a ekiristoonu, sodi kitenikineta akwaan a Kiristo.

¹³Sodi atoliworotor ngoni daang ngipei ani kinupitor ngakiro a Akuj ka nikiyenea Lokookeng a Akuj, kiliwor ngoni ngitunga lu kipol, lu kianyu dir ateneanut na Kiristo.

¹⁴Sodi atojongoto nabo ngoni aliwor ngide lu irianarete ngitunga lukamodeanak a ngakitatamet kech ana a alioko, ingalaanario ama ka ama.

¹⁵Meere kongina, ejoikinit kiruoro iteni a amina etenikinos aloboyor kadaang ekokisi Kiristo lo erai ekarikon.

¹⁶ Kotere nikirikitor ngesi ngoni, erekin nginerin daang a akwaan wapei, nabo totingakis ngisigerememea lu eya nakwaan daang. Sodi ani na esubea ekinier daang etich loger lo esakitere, isikokin daang kitenikin kotere amina.

¹⁷Tokona bocha, kechikichiki ayong esi a Ekiro a Ekapolon atamar, nyiirubakis ibooyete loger a ngibukui alu nyerai Ngiyaudi, lu eraakasi ngitamen kech ngipasiyek,

¹⁸nabo ariboki achwaanu kech. Eloka kesi anakiyar a Akuj, kotere abaangu ka akichananu.

¹⁹Emam ngakiro eringa itimete kesi, alomakis akiwapit etereku a ngawat emerasi ta eboyor loaronon a emalaanu, emam ibore ekachito.

²⁰Nakaneni pekolong itatamasi esi ngakiro a Kiristo na ikote neni!

²¹Iirasi esi ngakiro keng dir ani kona iraakatar ngirukitos keng, apon esi kitatam ngakiro na iteni na eya nia Yesu.

²²Tokona, tapalikisi eboyor kus lokolong ngorot, lo erai ibooyoto esi loger lokolong ibooyoto, eboyor longorot lokolong enyasunit etereku keng lokengalan.

²³Ejoikinit ngitai kus ka ngitamen kus eliworosi lukiteat,

²⁴ nabo echamit esi ikokinete lu inapito eboyor lokitetet, lo esubunitae alokikwaane a Akuj nabo idodiuna anakiyar ana iteni ana etenoono tarai na italeuno.

²⁵Tojongoto robo akiruoro alioko! Ejoikinit itwaan daang isuruori ekidunyet keng ngakiro na iteni, kainyo kirai ngoni ngipei anakwaan a Kiristo.

²⁶Ani kingo iyong, wara akingo kon nyikitesech iyong nabo wara nyiingo apaaran juui tanang edoyori akolong.

²⁷Wara nyiitaanyu Ekipe nikaaloman aloboyor kon.

²⁸Ejoikinit ekokolan epalikini akoko dio tosub etich loajokon a ngakan keng sodi taanyunea ibore ni ingarakinea ngikebootok.

²⁹Warasi ngakituk kus nyeelimut ngakiro naaronok, nakaneni kiruoro naajokak na ingarakinete luche loger lo esakitotor, sodi tojoikis na ilimuni iyong lu iirarete.

³⁰Warasi nyiisialolong Etau a Akuj, kainyo Etau a Akuj ngesi erai agerasit a Akuj na eyei nikus, ngesi kiweikinit esi atoyeneta atamar enangi Akolongit na elachakinea Akuj daang lu agieli ngesi.

³¹Tapalikisi ngiman daang ka anyunyura ta angoit. Tapalikisi echale ka ekiyeny ta aremo daang.

³² Ajoikinit esi iliworosi lukapatanak, lu elilim ngitai ani eya luche, nabo torimanakinos make, loger lokirimakinea esi Akuj ani a Kiristo.