Read turkana Ngiepesoi 5 Bible Online

Ngiepesoi 5 - turkana bible

Ngiepesoi 5

¹Kona iraakatar esi ngide a Akuj luminan, ejoikinit esi ikwaanikinosi ka ngesi.

² Ejoikinit amina eriki eboyor kus, loger lokiminar ngoni Kiristo tolem akiyar keng kotere ngoni, erai alemunet nakakukunyon nabo akipeyos na italakari Akuj.

³Kona iraakatar esi ngikanupak, nyechamit ngakiro na elomit, ka emalaanu ta arorokanut elimunio anikus.

⁴Kori nyitemokino esi iruorosi ngakiro nakenyasunak kori na a ngimeny ta na a aratanu. Ejoikinit esi ibuakinete Akuj alakara.

⁵Toyena atamar emam nikaloman kori nimalaat ta itwaan ni etereku (kainyo ikoni etereku akilipit ngakujo nasubuna) ni elomari napolou a Kiristo ka na a Akuj.

⁶Warasi itwaan nyikingal esi a ngakiro anapasiyek, ngakiro napei nugu ngesi eanyuneta ngitunga lu nyerai ngikanupak anyunyura a Akuj.

⁷Tojongoto arukit ka ngitunga lu ikote neni.

⁸Iyakasi kolong esi naribu, nakaneni kona irauneta ngitunga a Ekapolon, ipean esi nakicha. Ejoikinit tokona esi ibooyete loger a ngitunga alu eya nakicha.

⁹Kainyo akicha ngesi itatakanuuni ngakiro naajokak dir ka na eteniyete ta na iteni.

¹⁰Tasaka akiyen na italakarete Ekapolon.

¹¹Warasi nyiisuba ngakiro napasiyek na esubete ngitunga, ngakiro na eraakasi ngaka aribu. Nakaneni ejoikinit iwolunete kikilakis. (

¹²Kainyo kitimi tani akiruor ngakiro na esubete kesi imunonito.)

¹³Ani kidodiun ngakiro daang anakicha, etakanuni dir eboyor kech lo a iteni,

¹⁴kainyo ibore daang ni idodiunio kileereu, eliwor akicha. Nguna ngesi igiritere nagiran kona, “Tonyou iyong ekajoton, toyaru, sodi kinwaku akicha a Kiristo.”

¹⁵Tokona, tochoikinos a eger alo ibooyoto esi. Nyiboikinosi loger a ngikabangabangae, kiboikinos loger a ngikoosok.

¹⁶Tosuba naajokak esaa daang lo ianyuneta nikaaloman, kainyo eraakasi ngirwa lugu luaronok.

¹⁷ Nyiibangaketa robo, nakaneni tasaka akiyen na esaki Ekapolon Akuj esi tosuba.

¹⁸Tapalikisi elewas a epurot, kainyo erai ibore ngini ni inyasuni eboyor kus, nakaneni ejoikinit esi kilelebun Etau a Akuj.

¹⁹Kiruoro a ngakiro a ngieosio ka ngiitesio ta ngieosio a Etau a Akuj, toeonokisi Akuj ngiitesinei ka ngieosio, ibuakinito Ekapolon alakara alotai kus.

²⁰Tobuakisi Akuj Apa alakara ngirwa daang kotere ibore daang, alokiro a Ekapolon yok Yesu Kiristo.

²¹Kidodenakinos arimatoi ani ikeritotor esi Kiristo.

²²Esi ngaberu, kiwapa ngakiro a ngikiliok kus loger lo iwapitotor na a Ekapolon Yesu.

²³Kainyo epolokinit ekile aberu keng loger lo epolokinitor Kiristo ngitunga a ekanisa, nabo erai Kiristo Ekayuunan a ngitunga a ekanisa alu eraakasi akwaan keng.

²⁴ Kona iwapitotor ngitunga a ekanisa ngakiro a Kiristo, loger lopei ngolo, ejoikinit ngaberu iwapete ngakiro kata lokile kech anakiro kadaang.

²⁵Esi ngikiliok, tominakisi ngaberu kus loger lo aminar Kiristo ngitunga a ekanisa sodi tolemun totoan kotere kesi.

²⁶Asubi ngesi kongina sodi kitiliwo ngitunga a ekanisa lu italeuno ani a Akuj, kotere akiroit keng, erai kitoseg mono ani ilotarere a ngakipi.

²⁷Sodi taanyunea ngesi ngitunga a ekanisa lu italeuno, lu ikiuna emam aporos, kori akemer kori nginyas ngiche luaronok.

²⁸Echamit ngikiliok eminakinete ngaberu kech loger lo eminatar kesi ngawat kech a ngikulepek. Ekile lo emina aberu keng, eminin ngesi bon. (

²⁹Emam itwaan nakanuan eremokino akwaan keng, erai ngesi eketanan nabo tochoik loger lo echoikinitor Kiristo ngitunga a ekanisa:

³⁰kainyo kikoni ngoni nginerin a akwaan keng.)

³¹Loger lo igiritere nagiran kona, “kotere nguna, eisikini ekile apakeng ka itiokeng, sodi kimorikin ka aberu keng, dio toliworos luarei ngulu ngipei.”

³²Eya ngakiro na iteni namunonoe idodiunitae anagiran kanu, na ayeni ayong atamar eraakasi ngakiro a Kiristo ka ngitunga a ekanisa.

³³ Nakaneni eraakasi tani ngakus, ejoikinit ekile daang emina aberu keng loger lo eminar ngesi akwaan keng a ilope, nabo ejoikinit aberu daang ekeri lokile keng.