Read turkana Ngiepesoi 6 Bible Online

Ngiepesoi 6 - turkana bible

Ngiepesoi 6

¹Esi ngide, kiwapa ngakiro a ngikauriak kus ani a Ekapolon Yesu, kainyo ejok akikokin neni.

²Etal lo ekingaren lo iatakinitae akichikakinet a apiaro ngesi lo ebeyo, “Toker apakon ka itiokon,

³ sodi taanyunea naajokak, nabo kiboi nikooyen anakwap.”

⁴Ani esi ngikauriak a ngide, warasi nyiitongoeneta ngide kus, erai ejoikinit esi itanunete kesi irikinito nabo kitatamete alokiristoonu.

⁵Esi ngikedalak, kiwapa ngakiro a ngitunga alu kipolokinito esi iemito nabo tamaranete, tosuba kongina ejoikinit ngitai kus, esibit Kiristo ngesi isubanakinete esi kongina.

⁶Nyiisuba robo kongina esaa lo kiteere bon ani isaketa esi kesi kitominakis esi, nakaneni tosuba na esaki Akuj a ngitai kus kadaang, iraakasi ngikedalak a Kiristo.

⁷Tosuba etich kus lo iraakatar esi ngikedalak ilakara, esibit isubete esi etich a Kiristo, meere lo a ngitunga.

⁸ Toyena atamar etachi Ekapolon Yesu itwaan daang a etich aloajokon esubi, kerai ekedalan kori lo nyerai ekedalan.

⁹ Esi ngikapolok, tosubeta ngikedalak kus napei nguna tojongoto akitukurian. Toyena atamar erai Ekapolon kus ka lo a ngikedalak kus epei anadis, imarunit ngesi ngitunga daang atamar ikwaan.

¹⁰Arumoret kanguna, togogongioto ani imorikinotor ka Ekapolon Yesu nabo kotere agogongu keng nakationon.

¹¹Totinga ngiboro daang lujiet lukiinak esi Akuj, sodi kipiunioto esi ngakiro naaronok nakilokitor Ekipe.

¹²Kainyo nyikiji ngoni ka ngitunga nakaneni kiji ka ngipean luaronok lu eya nadis, ngikapolok, ngikarikok ta ngipean luaronok lu epolokinito ngakwapea na a aribu nugu.

¹³ Kotere nguna, totinga tokona ngiboro a Akuj lujiet! Sodi ani enangi akolongit naaronon, kipiunioto esi Ekipe alojie, ani esal a ejie, kidongo esi iweikinito ejie.

¹⁴Tokona, toweikisi ejie a ngakiro ana iteni ikote aruba na iinikinito esi naabor, kikokis ngakiro na eteniyete ibore ni inapito esi alorarum iyuunitotor erarum.

¹⁵Kikok eger lo kimuitor esi alimor Ngakiro Naajokak a ekisil ngamuk na inapito esi.

¹⁶Kitiliwosi anupit ngakiro a Akuj aupwal ngirwa daang, kainyo ngesi igakineta esi ngimalea a amod lukakwanak lu egumuununi Ekipe.

¹⁷Sodi tachamut ayuuno ikoni apukot na a ngasua, ani akiroit a Akuj ikoni ekileng lo kiinakini esi Etau a Akuj.

¹⁸Tosuba nguna daang ilipito, isakete Akuj kingarak. Kilipeeneta jiik loger lo kirikitor Etau a Akuj. Kotere nguna kirichakinos warasi ngakiro nyikilout ngitai, kilipa jiik kotere ngikanupak daang.

¹⁹Kilipakinae tani ayong, sodi kedodikin ayong ngakiro na alimuni na asakea akiruorikin, sodi eruor ayong a atitinyu nabo esileereu ngakiro namunonoe anakiro ana ajokak a Akuj.

²⁰Kotere ngakiro naajokak nugu, aweikinit ayong Akuj tani tokona kaenitae alojela. Kilipa sodi eruoror ayong ngakiro naajokak loger lo echamit eruoro.

²¹Kisisakini esi Tukiko ngakiro kang toyeneta na asubi ayong. Erai ngesi lokaatoyok lo eminae nabo ekasuban etich a Ekapolon lo emunoi.

²² Ngakiro nguna ngesi ameunitor ayong ngesi nikus, kisisak esi eger lo kibooyo sua daang kane nabo kingarak esi talakaros.

²³Agasi atamar Akuj Apa ka Ekapolon Yesu Kiristo, kitaanyut ngikaitotoi lukiristoi daang ekisil ka amina ta anupit ngakiro a Akuj.

²⁴Agasi atamar taanyut esi daang ajokis a Akuj, esi lu iminasi Ekapolon yok Yesu Kiristo a amina ana nyedaun.