Read turkana Ngipilipi 1 Bible Online

Ngipilipi 1 - turkana bible

Ngipilipi 1

¹Ayong Paulo ka Timoteo lu kirai ngikasubak etich a Yesu Kiristo kesi kigirunit abarua naga. Kigirakinit esi ngikanupak lu iyakasi Pilipi, lu imorikinosi aapei ka Yesu Kiristo, ka esi ngikarikok ta lu ingarakinito ngitunga a ekanisa.

² Kigatakinit esi ajokis ka ekisil a Akuj Apayok ka Ekapolon Yesu Kiristo.

³Abuanakini ayong Akuj kang alakara esaa daang loketamunea esi,

⁴ani esaa lo kelipanakinea ayong esi daang, elipeene ayong alakara.

⁵Kainyo kingarakis esi ayong alotich alo a akitatam ngakiro naajokak napei ana kolongit ana ekingaren tanang tokona.

⁶Nakaneni ayeni ayong dir atamar, Akuj nakolong esiakini etich loajokon lo anikus, erubakini esubi naajokak tanang Akolongit na a Yesu Kiristo.

⁷Ketamunit ayong esi jiik! Kotere nguna, itemokino ayong etami ngakiro kus loger lo tokona etamea. Kainyo ianyut esi daang ka ayong aapei ajokis naketaanyu ayong Akuj, napei ana tokona kaenitere ayong alojela ka tani nakolong pekaenitere ayong na eruoror ngakiro naajokak etenik lokojokon.

⁸Akuj ngesi eyeni atamar eruoro ayong ngakiro na iteni na abalar itorunit amina nakaminar esi daang lotau a Yesu Kiristo a elope.

⁹Elipit atamar torubak amina kus iatanakin talalar, imorikina aapei ka aosou na iteni ta ayenut ngakiro lokojokon,

¹⁰sodi toseuneta esi ngakiro naajokak noi. Dio toliworor eboyor kus lo ikiuna emam akisech tani edit Akolongit na Kiristo.

¹¹Eupiyarete eboyor kus ngakiro naajokak na iteni na eraakasi Yesu Kiristo bon itatakanuuni, sodi kikusere ka akipur Akuj.

¹²Ngikaitotoi kang, asaki ayong esi toyena atamar ngakiro daang na asubakin anikang, kengarakis ayong noi akikobar ngakiro naajokak toyenunae.

¹³Kotere nguna, ayena ngikeyokok a akai a ekapolon ka luche daang eya nege atamar kaenitae ayong alojela ani araakar ekasuban etich a Kiristo.

¹⁴ Anupa tani ngikaitotoi ngikaalak Ekapolon Yesu lokojokon ani kaenitere ayong alojela, atitinyoketa tani dang jiik itatamete ngakiro a Akuj peemito.

¹⁵Iteni dir, eya ngiche kech lu itatamete ngakiro a Kiristo eyei ibore ni iterekuyarit nabo kiburuate. Nakaneni, itatamete luche ngakiro a Kiristo ani ejoikinitotor ngitai kech.

¹⁶Esubete ngulu nguna kotere amina, kainyo eyenete kesi atamar ketaanyu Akuj ayong etich lo aikinitor ngakiro naajokak.

¹⁷Itatamete luche ngakiro a Kiristo ani ebolotor, nyitatamete kotere ni eminatar, ebaasi kesi kori ketaanyunete ayong ngichan ngiche eringa kaenitae alojela.

¹⁸Etamario tokona ai! Alakara ayong erai kitatamete ngitunga ngakiro a Kiristo a ngirotin kadaang, kerai alotai ajokak kori alotai aronok. Arubakini ayong alakara kotere nguna,

¹⁹kainyo ayeni ayong atamar kalachakinio kotere ni ilipitotor esi ka ni kengarakinea Etau a Yesu Kiristo.

²⁰Ngakiro na kemuito ayong noi nabo na egieno ayong ngesi na atamar nyekeruma ayong ngileech alotich kang tani wadiochichi. Nakaneni asaki ayong atotitinyer jiik ka tokona dang, sodi kipuruunere Kiristo aloboyor kang kadaang, erai kayari ayong kori katoana.

²¹Kainyo, akiyar ngesi nyo? Ani alowae kang, erai akiyar Kiristo. Eyauni akitu ngakiro naajokak noi.

²²Nakaneni ani karubak ayong ayari sodi atosubea etich lo ejok noi, nyayeni ayong atamar nyoni ejok, akiyar kori akitu.

²³Keriyaritae ayong a ngiwaitin a ngiarei. Asaki ayong noi aisikin eboyor lo atolot eruko ka Kiristo, ibore ejok noi ngini,

²⁴nakaneni ejok noi anikus erai karubak ayong ayari.

²⁵Anupit ayong dir akiroit ngina, kotere anupit ngina, ayeni atamar arubakini kirukit ka esi daang, sodi kengarak esi torotokis ngaren nabo talakaros ananupit kus.

²⁶Sodi ani nakirukio ayong ka esi nabo, minio esi ibore ni iwogatar kotere ayong aloboyor alo imorikinotor esi aapei ka Yesu Kiristo.

²⁷Tokona, akiroit nateno ngesi na ejoikinitor eboyor kus ikokini eger lo echamakinitae anakiro ana ajokak a Yesu Kiristo. Sodi ani kabu ayong aanyun esi kori pekabu, eirarea ayong atamar eteniyete ngakiro a eboyor kus ipuposi esi daang. Eira tani atamar ikote esi lu itijiete Ekipe aapei kotere ni inupitotor ngakiro naajokak.

²⁸Warasi nyieam ngimoe kus, erai ejoikinit ititinyekerosi jiik. Kidodikini esi ibore ngini atamar ebukorosi kesi sodi kidwanga esi kainyo Akuj ngesi kitaanyunit esi agogongu na idwangeta.

²⁹Kainyo esi kesi ianyut ajokis na isubeta etich a Kiristo, meere kotere ni inupeta ngakiro keng bon, nakaneni erai tani nikiboliare kotere ngesi.

³⁰ Ipedorete tokona akimorikin ka ayong alojie. Ejie ngolo ngesi lopei kolong iteete ayong aji, ani kona tokona nabo ipupioto, ngesi lo tokona aringa ayong aji.